¹ ಯೇಸು ಈ ಮಾಟ್ಲುನoತ ಆಡಿ ಮುಗ್ಬಿಚ್ಚಿನ್ಮಿಂದ ತನ್ ಶಿಷ್ಯುಲ್ಕಿ - ರೊಂಡು ನಾಲು ಆಯಿನ್ಮಿಂದ ಪಸ್ಕ ಪಂಡ್ಗ ವಸ್ತಾದನಿ ತಿಳ್ಚ್ನಾರು , ² ಅಪ್ಡು ಮನುಷ್ಯು ಕುಮಾರುಡ್ನಿ ಶಿಲುಬೇಕಿ ಏಸೆದಾನ್ಕಿ ಒಪ್ಪಿಚ್ಚಿಇಚ್ಚೇದಿ ಅಯ್ತಾದಿ ಅನಿ ಸೊಪ್ಪೆ . ³ - ಆ ಕಾಲುಮ್ಲ ಪೆದ್ ಯಾಜುಕುಲು ಪ್ರಜೆ ಪೆದ್ದೋಳು ಕಾಯಫುಡನೆ ಪೆದ್ ಯಾಜಕುಡು ಮಟನ್ಕಿ ಕೂಡೋಚ್ಚಿ ⁴ ಯೇಸುನಿ ಉಪಾಯ್ಮಿಂಚ ಪಟ್ಕೊನಿ ಸೊಂಪಾಲನಾಯಿ ಆಲೋಚ್ನುಮು ಸೇಸ್ಕೊನ್ರಿ . ⁵ ಆಯ್ತೆನು - ಪಂಡುಗ್ಲ ಪಟ್ಕೊಕುಡ್ದು , ಮಾ ಜನಲ್ಲಾ ಗದ್ದಲ್ಮಾಯಿನಿ ಅನಿ ಮಾಟ್ಲಾಡ್ಕೊನ್ರಿ . ⁶ ಯೇಸು ಬೆಥಾನ್ಯುಮ್ಲ ಕುಷ್ಟರೋಗಿಯಾಯಿನ ಸೀಮೊನುಡು ಇನ್ಟ್ಲ ⁷ ವುನ್ನಪ್ಡು ಓಕ್ ಆಡ್ದಿ ಬಹು ಬೆಲೆವುಂಡೆ ಸುಗಂದ್ಮು ತೈಲ್ಮು ಭರಣಿನಿ ⁸ ಸೀಸ್ಕೊನಿ ವಾಡ್ ದೆಗ್ರಿಕ್ಕಿ ವಚ್ಚಿ ವಾಡು ಊಟುಮ್ಕಿ ಕುಚ್ಚೋನುoಡೆನಪ್ಡು ಆ ತೈಲುಮ್ನಿ ವಾಡ್ ತಲಕೈ ಮಿಂದ ಪೋಸಿ . ⁹ ಶಿಷ್ಯುಲು ದೀನ್ನಿ ಕನಿ ಕೋಪ್ಮುಸೇಸ್ಕೊನಿ - ಈ ನಷ್ಟ್ಮು ಎಂದ್ಗೂ ? ಈ ತೈಲುಮ್ನಿ ಬಹಳ್ಮು ದುಡ್ಳುಕಿ ಅಮ್ಮಿ ಬಡುವ್ಳುಕಿ ಇಯ್ಬೋದಾಯುಣ್ಣೆ ಅನ್ರಿ . ¹⁰ ಯೇಸು ದಾನ್ನಿ ತಿಲ್ಸಿ ವಾಳ್ಕಿ - ಈ ಆಡ್ದಿಕಿ ಎಂದ್ಗೂ ತೊಂದ್ರಿನಿ ಇಸ್ತಾರು ? ಇದಿ ನಾಕಿ ಮಂಚಿ ಕಾರ್ಯುಮ್ನಿ ಸೇಸಿಂದಿ . ¹¹ ಬಡುವ್ಲು ಎಪ್ಡೂ ಮೀ ದೆಗ್ರ ವುಂಟಾರು , ಆಯ್ತೆ ನಾನು ಮೀಲಾ ಎಪ್ಡೂ ವುಂಡೇಟ್ಲೆದು . ¹² ಇದಿ ಈ ತೈಲುಮ್ನಿ ನಾ ಪೈಮಿಂದ ಪೋಸಿಂದಿ ನಾ ಉತ್ರುಮುಕ್ರಿಯೇಕಾಯಿನೆ . ¹³ ಈ ಸುವಾರ್ತುಮು ಸರ್ವಲೋಕ್ಮುಲ ಯಾನ್ಯಾನ ಸಾರಟ್ಗಾಯ್ತೇನೋ ಆನನ ಇದಿ ಸೇಸಿಂದ್ನಿ ಸಹ್ಮು ದೀನ್ ನೆನ್ಪಕಾಯಿ ಸೊಪ್ಪೊಳನಿ ಮೀಕಿ ಸತ್ಯುಮಾಯಿ ಸೊಪ್ತಾನು ಅನಿ ಸೊಪ್ಪೆ . ¹⁴ ಆಮಿಂದ ಪನ್ನೆಂಡು ಮಂದಿ ಶಿಷ್ಯುಲ್ಲಾ ಒಕ್ಡಾಯಿನ ಇಸ್ಕರಿಯೂತ ಯೂದುಡನೋಡು ಪೆದ್ ಯಾಜಕುಲು ದೆಗ್ರುಕಿ ಪಾಯಿ - ¹⁵ ನಾನು ವಾಡ್ನಿ ಮೀಕಿ ಪಟ್ಟಿಸ್ತೆ ನಾಕಿ ಏಮಿ ಇಸ್ತಾರು ? ಅನೆ . ವಾಳು ವಾಡ್ಕಿ ಮುಪೈ ರೂಪಾಯ್ಲು ತೂಗಿ ಇಚ್ರಿ . ¹⁶ ಅಪ್ಡಿಂಚ ವಾಡು ವಾಡ್ನಿ ಪಟ್ಟಿಚ್ಚೆದಾನ್ಕಿ ಅನ್ಕೂಲ್ಮಾಯಿನ ಸಮಯ್ಮ್ನಿ ಸೂಸ್ತವುಂಡೆ . ¹⁷ ಪುಲ್ಪುಲೇನಿನ ರೊಟ್ಟ ಪಂಡ್ಗ ಮೊದ್ಲುನೆ ನಾಡುಲ ಶಿಷ್ಯುಲು ಯೇಸು ದೆಗ್ರುಕಿ ವಚ್ಚಿ - ಪಸ್ಕುಮಿನ ಊಟ್ಮು ಸೇಸೆದಾನ್ಕಿ ಮಾಮು ನೀಕಿ ಯಾನ ಸಿದ್ಮು ಸೇಯಾಲಂಟಾವು ಅನಿ ಅಡ್ಗೇಕಿ ವಾಡು - ¹⁸ ಮೀರು ಪಟ್ಣುಮುನೋನ್ಕಿ ಇಟ್ಟೋಡ್ ದೆಗ್ರುಕಿ ಪಾಯಿ ವಾಡ್ಕಿ - ನಾ ಕಾಲ್ಮು ಸಮೀಪ್ಮಾಯೇ , ನೀ ಇನ್ಟ್ಲ ನಾ ಶಿಷ್ಯುಲು ಜೊತ್ಲ ಪಸ್ಕುಮು ಪಂಡ್ಗ ಸೇಸ್ತಾನನಿ ಭೋದಕುಡು ಸೊಪ್ತಾಡು ಅನಿ ಸೊಪ್ಪಂಡ್ರಿ ಅನೆ . ¹⁹ ಶಿಷ್ಯುಲು ಯೇಸು ವಾಳ್ಕಿ ಅಪ್ಪಣ್ಮು ಇಚ್ನಟ್ಗ ಸೇಸಿ ಪಸ್ಕಂಕಿ ಸೌರಿಚ್ರಿ . ²⁰ ಮಾಟಾಲ ಆಯಿನಪ್ಡು ವಾಡು ಪನ್ನೆಂಡು ಮಂದಿಲು ಶಿಷ್ಯುಲು ಜೊತ್ಲ ಊಟುಮ್ಕಿ ಕುಚ್ಚೋನೆ . ²¹ ವಾಳು ಊಟ್ಮು ಸೇಸೆನಪ್ಡು ವಾಡು - ಮೀಲಾ ಒಕ್ಡು ನನ್ನೀ ಪಟ್ಟಿಸ್ತಾಡು ಅನಿ ಮೀಕಿ ಸತ್ಯುಮಾಯಿ ಸೊಪ್ತಾನು ಅನೆ . ²² ಅಪ್ಡು ವಾಳು ಬಹಳ್ಮು ದುಖ್ಮು ಪಡಿ - ಸ್ವಾಮೀ , ನಾನ್ಕಾದೆ ಅನಿ ಪ್ರತಿಯೊಕ್ಳು ಅಡ್ಗೆಕಾಯ್ರಿ . ²³ ದಾನ್ಕ್ ವಾಡು - ಬಟ್ಟುಲ್ಲಾ ನಾ ಜೊತ್ಲ ಸೈ ಅದ್ಡೋಡೇ ನನ್ನೀ ಪಟ್ಟಿಚ್ಚೋಡು . ²⁴ ಮನುಷ್ಯ ಕುಮಾರುಡು ಪಾತಾಡು ಸರಿ , ಅಟ್ಟೆ ವಾಡ್ ವಿಷಯ್ಮಾಯಿ ರಾಸಿಂದಿಕದ . ಆಯ್ತೆ ಯೋಡು ಮನುಷ್ಯಕುಮಾರುಡ್ನಿ ಪಟ್ಟಿಸ್ತಾಡೋ ವಾಡ್ ಗತಿನಿ ಏಮಿ ಸೊಪ್ಪುದ್ನು . ಆ ಮನುಷ್ಯುಡು ಪುಟ್ಟುಂಡ್ಪಾತೆ ವಾಡ್ಕಿ ಮಂಚಿದಾಯುಂಡೆ ಅನೆ . ²⁵ ಅಪ್ಡು ವಾಡ್ನಿ ಪಟ್ಟಿಯಾಲನುoಡಿನ ಯೂದುಡು - ಗುರುವಾ , ನಾನ್ಕಾದೆ ? ಅನಲಾಯಿ ಯೇಸು ವಾಡ್ಕಿ - ನುವ್ವೇ ಸೊಪ್ತ್ವಿ ಅನಿ ಸೊಪ್ಪೆ . ²⁶ ವಾಳು ಊಟ್ಮು ಸೇಸೆನಪ್ಡು ಯೇಸು ರೊಟ್ನಿ ಸೀಸ್ಕೊನಿ ದೇವುಡು ಸ್ತೋತ್ರುಮು ಸೇಸಿ ಇರ್ಸಿ ಶಿಷ್ಯುಲ್ಕಿ ಇಚ್ಚಿ - ಸೀಸ್ಕೊಂಡ್ರಿ , ತಿನಂಡ್ರಿ , ಇದಿ ನಾ ದೇಹುಮು ಅನೆ . ²⁷ ಆಮಿಂದ ಪಾತ್ರೆನಿ ಸೀಸ್ಕೋನಿ ಸ್ತೋತ್ರುಮು ಸೇಸಿ ವಾಳ್ಕಿ ಇಚ್ಚಿ - ²⁸ ದೀಂಟ್ಲವುಂಡೆದಾನ್ನಿ ಅಂದ್ರು ತಾಗಂಡ್ರಿ , ಇದಿ ನಾ ರಕ್ತುಮು , ಇದಿ ಒಡಂಬಡಿಕ ರಕ್ತುಮು, ಇದಿ ಪಾಪಾಲು ಕ್ಷಮೆಕಾಯಿ ಬಹು ಜನಲು ಕೋಸ್ಕರ್ಮು ಪೋಸಿನ ರಕ್ತುಮು . ²⁹ ನಾನು ನಾ ತಂಡ್ರಿ ರಾಜ್ಯುಮ್ಲ ದ್ರಾಕ್ಷರಸುಮ್ನಿ ಮೀ ಜೊತ್ಲ ಕೊತ್ತುದಾಯಿ ತಾಗೇ ನಾಡುಗಂಟ ಇಂಕ ತಾಗೇಕೆ ಲೇದು ಅನಿ ಮೀಕಿ ಸೊಪ್ತಾನು ಅನೆ . ³⁰ ಅಮಿಂದ ವಾಳ್ ಕೀರ್ತನೇನಿ ಸೊಪ್ಪಿ ಅಂದ್ಮು ಮಾನ್ಲುಲ ಗುಡ್ಡಂಕಿ ಪಾಯ್ರಿ . ³¹ ಅಪ್ಡು ಯೇಸು , ವಾಳ್ಕಿ ಮೀರಂದ್ರು , ಈ ರಾತ್ರಿ ನಾ ವಿಷಯುಮ್ಲ ದಿಗ್ಲು ಪಡಿ ಎನ್ಕಿಕಿಜರಿಸ್ತಾರು . ಗೊರ್ರೋಡ್ನಿ ಕೊಟ್ತಾನು , ಹಿಂಡಿನ ಗೊರ್ಲು ಚದರಿಪಾತಾವಿ ಅನಿ ರಾಸಿಂದೆ . ³² ಆಯ್ತೆ ನಾನು ಜೀವಿತ್ಮಾಯಿ ಲೇಸಿನ್ಮಿಂದ ನೀ ಮುಂದ್ರ ಗಲಿಲಾಯಂಕಿ ಪಾತಾನು ಅನಿ ಸೊಪ್ಪೆ . ³³ ಪೇತ್ರುಡು ವಾಡ್ಕಿ - ಅಂದ್ರು ನೀ ವಿಷಯುಮ್ಲ ದಿಗ್ಲುಪಡಿ ಎನ್ಕಜರಿಸ್ತೆನು ನಾನು ಎಪ್ಡುಕು ಎನ್ಕಜರ್ಸೇಟ್ಲೆದು ಅನಿ ಉತ್ರುಮು ಇಚ್ಚೇಕಿ ಯೇಸು - ನೀಕಿ ಸತ್ಯುಮಾಯಿ ಸೊಪ್ತಾನು . ³⁴ ಇದೇ ರಾತ್ರಿಲ ಕೋಡಿಕೂಸೇಕಿಂತ ಮುಂದ್ರ ನುವ್ವ ನಾ ವಿಷಯುಮ್ಲ - ವಾಡ್ನಿ ಅರಿಲೇದು ಅನಿ ಮೂಡು ಸಾರಿ ಸೊಪ್ತಾವು ಅನೆ . ³⁵ ಪೇತ್ರುಡು ವಾಡ್ಕಿ - ನಾನು ನೀ ಜೊತ್ಲ ಸಚ್ಬೇಕಾಯ್ತೆನು ನಿನ್ನಿ ಅರಿಲೇದು ಅನಿ ಸೊಪ್ಪೇಕೆಲೇದು ಅನಿ ಸೊಪ್ಪೆ . ದಾನಂತೆ ಶಿಷ್ಯುಲಂದ್ರು ಸೊಪ್ರಿ . ³⁶ ಆಮಿಂದ ಯೇಸು ವಾಡ್ ಶಿಷ್ಯುಲು ಜೊತ್ಲ ಗೆತ್ಸೆಮನೆ ಅನೆ ತೋಟುಮ್ಕಿ ವಚ್ಚಿ ವಾಳ್ಕಿ - ಇನ್ನೆ ಕುಚ್ಚೊಂಡ್ರಿ , ನಾನು ಅಕ್ಡಿಕಿ ಪಾಯಿ ಪ್ರಾರ್ಥ್ನುಮು ಸೇಸಿ ವಸ್ತಾನು ³⁷ ಅನಿ ಸೊಪ್ಪಿ ಪೇತ್ರುಡ್ನಿ ಜೆಬೇದಾಯುಡು ಇದ್ರು ಬಿಡ್ಳುನಿ ತೋಡ್ಕೋನಿ ಪಾಯಿ ದುಖ್ಮು ಪಡಿ ಮನುಮುಗುಂದಿನೋಡು ಆಯೇ . ³⁸ ಮಲಿ ವಾಳ್ಕಿ - ನಾ ಪ್ರಾಣುಮು ಸಚ್ಚೆಅಂತ ದುಖ್ಮುಕಿ ನೋನಾಯಿಂದಿ , ³⁹ ಮೀರು ಇನ್ನೆ ವುಂಡಿ ನಾ ಜೊತ್ಲ ಎಚ್ರುಮಾಯುನ್ಡoಡ್ರಿ ಅನಿ ಸೊಪ್ಪಿ ಕೊಂಚ್ಮು ಮುಂದ್ರ ಪಾಯಿ ಬೋರಲುಪಡಿ - ನಾ ತಂಡ್ರಿಯೇ , ಸಾದ್ಯುಮಾಯುಂಟೆ ಈ ಪಾತ್ರೆ ನನ್ನೀ ಇಡ್ಸಿ ಪೋನಿ , ಎಟ್ಟು ನಾ ಚಿತ್ಮುಲಾಕ ಆವ್ಕುನ್ನಾ ನೀ ಚಿತ್ಮುಲಾಕನೆ ಆವ್ನಿ ಅನಿ ದೇವುಡ್ನಿ ಪ್ರಾರ್ಥಿಚ್ಚೆ . ⁴⁰ ಆಮಿಂದ ಆ ಶಿಷ್ಯುಲು ದೆಗ್ರುಕಿ ವಚ್ಚಿ ವಾಳು ನಿದ್ರ ಸೇಸೆದ್ನಿ ಕನಿ ಪೇತ್ರುಡ್ಕಿ - ಇಟ್ಟೋ ? ಓಕ್ ಗಲ್ಗೆಯಾಯ್ತೆನು ನಾ ಜೊತ್ಲ ಎಚ್ರುಮಾಯುಂಟಾರಾ ? ⁴¹ ಶೋಧನೆಕಿ ನೋನ್ಕಾಕುನಟ್ಗ ಎಚ್ರುಮಾಯುಂಡಿ ಪ್ರಾರ್ಥಿಯಂಡ್ರಿ , ಮನ್ಸು ಸಿದ್ಮಾಯಿಂದಿ ಸರಿ , ಆಯ್ತೆ ದೇಹುಮ್ಕಿ ಬಲ್ಮು ಸಾಲೆಟ್ಲೆ ಅನಿ ಸೊಪ್ಪೆ . ⁴² ತಿರ್ಗಿ ರೊಂಡ್ನೆ ಸಾರಿ ಪಾಯಿ - ನಾ ತಂಡ್ರಿ , ನಾನು ತಾಗಿನ ಹೊರ್ತು ಈ ಪಾತ್ರೆ ಇಡ್ಸಿ ಪೋಗುಡ್ದಾಯುಂಟೆ ನೀ ಚಿತ್ಮೆ ಆವ್ನಿ ಅನಿ ಪ್ರಾರ್ಥ್ನುಮು ಸೇಸೆ . ⁴³ ವಾಡು ತಿರ್ಗಿ ವಚ್ನಪ್ಡು ವಾಳು ನಿದ್ರ ಸೇಸೆದಾನ್ನಿ ಕನೆ , ವಾಳ್ ಕಂಡ್ಳು ಬಾರ್ಮಾಯುಂಡೆ . ⁴⁴ ಆಮಿಂದ ತಿರ್ಗಿ ವಾಳ್ನಿ ಇಡ್ಸಿ ಪಾಯಿ ತಿರ್ಗಿ ಅದೇ ಮಾಟ್ನಿ ಸೊಪ್ತ ಮೂಡ್ನೆ ಸಾರಿ ಪ್ರಾರ್ಥಿಚ್ಚೆ . ⁴⁵ ಆಮಿಂದ ಶಿಷ್ಯುಲು ದೆಗ್ರುಕಿ ವಚ್ಚಿ ವಾಳ್ಕಿ - ಮೀರು ಇಂಕ ನಿದ್ರ ಸೇಸಿ ಧಣಿವುನಿ ಆರ್ಬಿಚ್ಕೊಂಡ್ರಿ , ಇಗೋ ಗಳ್ಗೆ ಸಮೀಪಿಚ್ಚೆ , ಇಪ್ಡು ಮನುಷ್ಯು ಕುಮಾರುಡು ದುರ್ಜನ್ಮು ಸೇತ್ಕಿ ಒಪ್ಪಿಚ್ಚಲ್ಪಡ್ತಾಡು . ⁴⁶ ಲೇಯಂಡ್ರಿ , ಪದಾಮು , ನನ್ನೀ ಪಟ್ಟಿಚ್ಚೋಡು ಹತ್ರುಮ್ಕಿ ವಚ್ನಾಡು ಸೂಡoಡ್ರಿ ಅನಿ ಸೊಪ್ಪೆ . ⁴⁷ ವಾಡು ಇಂಕ ಮಾಟ್ಲಾಡ್ತವುಂಡೆಕಿ ಇಗೋ ಪನ್ನೆಂಡು ಮಂದಿಲು ಶಿಷ್ಯುಲ್ಲಾ ಒಕ್ಡಾಯಿನ ಯೂದುಡು ವಚ್ಚೆ , ಪೆದ್ ಯಾಜಕುಲು ಜನುಲಾ ಪೆದ್ದೋಳು ವೂಳ್ ತೊಟ್ಟಿಂಚ ಬಹು ಜನಲು ಗುಂಪು ಕತ್ತಿ ಕಟ್ಳುನಿ ಪಟ್ಕೋನಿ ವಾಡ್ ಜೊತ್ಲ ವಚ್ಚೆ . ⁴⁸ ಇದ್ಕಾಕುನ್ನ ಪಟ್ಟಿಚ್ಚೋಡು ವಾಳ್ಕಿ - ನಾನು ಯೋಳ್ಕು ಮುದ್ ಪೆಡ್ತಾನೋ ವಾಡೆ ವಾಡು , ವಾಡ್ನಿ ಪಟ್ಕೊಂಡ್ರಿ ಅನಿ ಗುರ್ತು ಸೊಪ್ಪಿಚ್ಚೆ . ⁴⁹ ಕೂಡ್ಲನೆ ವಾಡು ಯೇಸು ದೆಗ್ರುಕಿ ಪಾಯಿ - ಗುರುವಾ , ನಮಸ್ಕಾರ್ಮು ಅನಿ ಸೊಪ್ಪಿ ವಾಡ್ಕಿ ಮುದ್ಪೆಟ್ಟೆ . ⁵⁰ ಯೇಸು ವಾಡ್ಕಿ - ಸ್ನೇಹಿತುಡಾ , ನುವ್ವ ವಚ್ಚಿನ ಕೆಲ್ಸ್ಮು ಇದೇನಾ ಅನಿ ಅಡ್ಗೇಕಿ ವಾಳು ಅತ್ರುಮ್ಕಿ ವಚ್ಚಿ ಯೇಸು ಮಿಂದ ಸೈ ಏಸಿ ವಾಡ್ನಿ ಪಟ್ರೀ . ⁵¹ ಪಟ್ತಾನೆ ಯೇಸು ಜೊತ್ಲ ವುಂಡೋಳ್ಳಾ ಒಕ್ಡು ಸೈಚಾಚಿ ತನ್ ಕತ್ತಿನಿ ಪಟ್ಟಿ ಪೆದ್ ಯಾಜಕುಡು ಆಳ್ನಿ ಕೊಟ್ಟಿ ವಾಡ್ ಶವ್ನಿ ನರ್ಕಿ ಏಸೆ . ⁵² ಅಪ್ಡು ಯೇಸು ವಾಡ್ಕಿ - ನೀ ಕತ್ತಿನಿ ತಿರ್ಗಿ ಓರೆಲಾ ಸೇರಿಯ್ಯಿ , ಕತ್ತಿನಿ ಪಟ್ನೋಳoದ್ರುನು ಕತ್ತಿಯಿಂಚ ಸಸ್ತಾರು . ⁵³ ನಾನು ನಾ ತಂಡ್ರಿನಿ ಬೇಡ್ಕೊನಿಲೇನು ಅನಿ ಬೇಡ್ಕೊಂಟೆ ವಾಡು ನಾಕಿ ಇಪ್ಡೆ ಪನ್ನೆಂಡು ಗಣಲುಕಿಂತ ಹೆಕ್ವ ಮಂದಿ ದೇವದೂತುಲ್ನಿ ಅoಪಿಚ್ಚೆಟ್ಲೆದುಅನಿ ನೆನ್ಸ್ತಾವಾ ? ⁵⁴ ಅಂಪಿಸ್ತೆ ನಾಕಿ ಇಟ್ಟಿಟ್ಟೆದಿ ಅವಾಲನೆ ಶಾಸ್ತ್ರುಮು ಮಾಟ್ಳು ನೆರ್ವೆರ್ತಾದಿ ಎಟ್ಟ ಅನಿ ಸೊಪ್ಪೆ . ⁵⁵ ಅದೇ ಗಲ್ಗುಲಾ ಯೇಸು ಗುಂಪುಗುಂಪಾಯಿ ಕೂಡುಂಡಿನ ಜನಲ್ಕಿ - ದೊಂಗ್ಲುನಿ ಪಟ್ಟೆದಾನ್ಕಿ ವಚ್ನಟ್ಗ ಕತ್ತಿಲ್ನಿ ಕಟ್ಳುನಿ ಸೀಸ್ಕೊನಿ ನನ್ನೀ ಪಟ್ಟೆದಾಂಕಿ ವಸ್ತ್ರ ? ⁵⁶ ನಾನು ದಿನಾಲು ದೇವುಡು ಆಲಯುಮ್ಲ ಕುಚ್ಚೋನಿ ಭೋದಿಚ್ಚೆನಪ್ಡು ಮೀರು ನನ್ನೀ ಪಟ್ಳೆದು , ಆಯ್ತೆ ಪ್ರವಾದಿಲು ರಾಸಿನ ವಚುನುಮ್ಲು ನೆರ್ವೆರೆಅಟ್ಗ ಇದಂತ ಆಯೇ ಅನಿ ಸೊಪ್ಪೆ . ಅಪ್ಡು ಶಿಷ್ಯುಲು ಅಂದ್ರು ವಾಡ್ನಿ ಇಡ್ಸಿ ಪಾರಿ ಪಾಯ್ರಿ . ⁵⁷ ಯೇಸುನಿ ಪಟ್ನೋಳು ವಾಡ್ನಿ ಪೆದ್ ಯಾಜಕುಡಾಯಿನ ಕಾಯಫುಡು ದೆಗ್ರುಕಿ ಸೀಸ್ಕೋನಿ ಪಾಯ್ರಿ . ⁵⁸ ಆನ ಶಾಸ್ತ್ರಿಲು ಪೆದ್ದೋಳು ಕೂಡಿ ವಚ್ಚುಂಡ್ರಿ . ಪೇತ್ರುಡಾಯ್ತೇನೋ ದೂರ್ಮಿಂಚ ವಾಡ್ ಎನ್ಕ ಪಾತ ಪೆದ್ ಯಾಜಕುಡ ಮಟಮು ಅಂಗಳ್ಮು ಗಂಟ ವಚ್ಚಿ ನೋನ್ಕಿ ಒಕ್ಕಿ ವಾಡ್ ಗತಿ ಏಮಾಯ್ತಾದೋ ಸೂಡಾಲನಿ ಓಲೇಕಾರುಡು ಜೊತ್ಲ ಕುಚ್ಚೋನೆ . ⁵⁹ ಅಪ್ಡು ಪೆದ್ಯಾಜಕುಡು ಪೆದ್ ಸಬೆಯೋಳಂದ್ರು ಯೇಸುನಿ ಸೊಂಪಿಬೀಯಾಲನಿ ವಾಡ್ ಮಿಂದ ಸುಳ್ಳು ಸಾಕ್ಷಿನಿ ಹುಡುಕ್ರಿ , ಆಯ್ತೆ ಬಹು ಮಂದಿಲು ಸುಳ್ಳು ಸಾಕ್ಷಿಲು ವಚ್ಚಿ ನಿಲ್ಪಡ್ತೆನು ಸಿಕ್ಲೇದು . ^{60 61} ಕಡೇಕಿ ಇದ್ರೂ ಮುಂದ್ರಿಕಿ ವಚ್ಚಿ - ನಾನು ದೇವುಡು ಆಲಯುಮ್ನಿ ಪಡೇಸಿ ಮೂಡು ನೆಲುಲ ಕಟ್ಟೆಕಿಬಲ್ಲುಡು ಅನಿ ವೂಡು ಸೊಪ್ಪೆ , ⁶² ಅಪ್ಡು ಪೆದ್ ಯಾಜಕುಡು ಲೇಸಿ ನಿಲ್ಪಡಿ - ನುವ್ವೇಮಿ ಉತ್ರುಮು ಇಚ್ಚೆಟ್ಲೆದಾ ? ವೂಳು ನೀ ಮಿಂದ ಸೊಪ್ಪೆ ಸಾಕ್ಷಿ ಏಮಿ ಅನಿ ವಾಡ್ನಿ ಅಡುಗ್ರಿ . ⁶³ ಆಯ್ತೆ ಯೇಸು ಊರ್ಕುಂಡೆ .ಅಪ್ಡು ಪೆದ್ ಯಾಜಕುಡು - ನೀಕಿ ಜೂಡುಸ್ವರೂಪ್ಮಾಯಿನ ದೇವುಡು ಆಣೆನಿ ಪೆಡ್ತಾನು , ನುವ್ವ ದೇವುಡು ಕುಮಾರುಡಾಯಿನ ಕ್ರಿಸ್ತುಡು ಹೌನೋ ಕಾದೋ ಅನೇದ್ನಿ ನಾಕಿ ಸೊಪ್ಪಾಲ ಅನಾಯಿ ಯೇಸು - ⁶⁴ ನುವ್ವೇ ಸೊಪ್ನಾವು , ಇದ್ಕಾಕುನ್ನಾ ಇಂಕ್ಮಿಂದ ಮನುಷ್ಯಕುಮಾರುಡು ಸರ್ವಶಕ್ತುಡು ಕುಡುಮ್ ತೊಟ್ಟುಲ ಆಸಿನ್ಮು ಆಯುಂಡೆದ್ನಿ ಆಕಾಶ್ಮುಲ ಮೆಘಾಲು ಮಿಂದ ಕುಚ್ಚೋನಿ ವಚ್ಚೆದಾನ್ನಿ ಕಂಟಾರು ಅನಿ ಮೀಕಿ ಸೊಪ್ತಾನು ಅನೆ . ⁶⁵ ಅಪ್ಡು ಪೆದ್ ಯಾಜಕುಡು ತನ್ ಬಟ್ಳುನಿ ಸಿಂಪ್ಕೊನಿ - ಇದಿ ದೇವುಡು ದೂಷಣ್ಮು ಮಾಟ , ಮಾಕಿ ಸಾಕ್ಷಿಲು ಇಂಕ ಎಂದ್ಗೂ ಕಾವಾಲ ? ವೂಡು ಇಪ್ಡೆ ಆಡಿನ ದೂಷಣ್ಮು ಮಾಟ್ನಿ ಇನ್ನಾರೆ , ⁶⁶ ಮೀಕಿ ಎಟ್ಟ ಸೂಪಸ್ತಾದಿ ? ಅನೇಕಿ ವೂಡು ಮರಣ್ಮು ದಂಡನೆನಿ ಹೊಂದೆತಕ್ಕೋಡು ಅನಿ ಉತ್ರುಮಿಚ್ಚೆ . ⁶⁷ ಅಪ್ಡು ವಾಡ್ ಮಕುಮಿಂದ ಊಸಿ ವಾಡ್ನಿ ಗುದ್ರಿ , ಕೆಲುವ್ಲು ವಾಡ್ ಕೆನ್ನುಕಿ ಕೊಟ್ಟಿ - ⁶⁸ ಕ್ರಿಸ್ತುಡಾ , ನಿನ್ನಿ ಕೊಟ್ನೋಳುಯೋಳು ? ಮಾಕಿ ಪ್ರವಾದನ್ಮು ಸೊಪ್ಪು ಅನ್ರಿ . ಇಕ್ಡುಕಿ ಪೇತ್ರುಡು ಆಕ್ಟರ ಅಂಗಳುಮ್ಲ ಕುಚ್ಚೋನುಂಡೆ . ⁶⁹ ಆನ ಓಕ್ ದಾಸಿ ವಾಡ್ ದೆಗ್ರುಕಿ ವಚ್ಚಿ - ನುವ್ವ ಸಹ್ಮು ಗಲಿಲಾಯ್ಮಿನ ಯೇಸು ಜೊತ್ಲ ವುಣ್ಣೋಡು ಅನ್ನಪ್ಡು ವಾಡು - ⁷⁰ ಕಾದು , ನುವ್ವ ಏಮಂಟಾವೋ ನಾಕಿ ಗೊತ್ಲೇದು ಅನಿ ಅಂದ್ರು ಮುಂದ್ರ ಸೊಪ್ಪೆ . ⁷¹ ವಾಡು ಆನಿಂಚ ವಾಕ್ಲಿ ತೊಟ್ಗಿ ಪಾಯ್ನಪ್ಡು ಇನ್ಕೊಕ್ತಿ ವಾಡ್ನಿ ಕನಿ ಆನುಂಡೋಳ್ಕಿ - ವೂಡು ನಜರೇತುಡು ಯೇಸು ಜೊತ್ಲ ವುಣ್ಣೋಡು ಅನಿ ಸೊಪ್ಪೆ . ⁷² ವಾಡು ತಿರ್ಗಿ - ಕಾದು , ಆ ಮನುಷ್ಯುಡ್ನಿ ನಾನರಿಲೆ ಅನಿ ಆಣೆ ಪೆಟ್ಕೊನಿ ಸೊಪ್ಪೆ . ⁷³ ಕೊಂಚ್ಮು ಪೊದ್ ಮಿಂದ ಆನ ನಿಲ್ಪಡ್ನೋಳು ಮುಂದ್ರುಕಿ ವಚ್ಚಿ ಪೇತ್ರುಡ್ಕಿ - ನಿಶ್ಚಯ್ಮಾಯಿ ನುವ್ವ ಸಹ್ಮು ವಾಳ್ಳಾ ಒಕ್ಡು , ನೀ ಭಾಷನೆ ನುವ್ವ ಗಲಿಲಾಯ್ಮೊಡು ಅನಿ ಸೂಪಿಸ್ತಾದಿ ಅನಿ ಸೊಪ್ಪ್ನಪ್ಡು ವಾಡು - ⁷⁴ ಆ ಮನುಷ್ಯುಡ್ನಿ ನಾನರೆಲೇದು ಅನಿ ಸೊಪ್ಪಿ ಶಾಪ್ಮು ಏಬಿಚ್ಕೊನೆದಾನ್ಕು ಆಣೆ ಪೆಟ್ಕೊನೆದಾನ್ಕು ಪ್ರಾರಂಭಿಚ್ಚೆ . ಕೂಡ್ಲನೆ ಕೋಡಿ ಕೂಸೇ . ⁷⁵ ಕೋಡಿ ಕೂಸೇಕಿಂತ ಮುಂದ್ರ ಮೂಡು ಸಾರಿ ನಾ ವಿಷಯುಮ್ಲ ವಾಡ್ನಿ ಅರೆಲೇ ಅನೆದಾಯಿ ಸೊಪ್ತಾವು ಅನಿ ಯೇಸು ಸೊಪ್ಪಿನ ಮಾಟ್ನಿ ನೆನ್ಸ್ಕೋನಿ ಆಕ್ಟರ್ಕಿ ಪಾಯಿ ಬಹು ವ್ಯಥೆ ಪಡಿ ಏಡ್ಸೆ .