¹ ಅಪ್ಡು ಪರ್ಲೋಕ್ಮು ರಾಜ್ಯುಮು ಆರತಿಲ್ನಿ ಸೀಸ್ಕೊನಿ ಮದಲಿಂಗುಡ್ನಿ ಎದ್ರುಗೋನೆದಾನ್ಕಿ ಪಾಯೇನಟ್ಟ ಪದಿ ಮಂದಿಲು ಕನ್ಯೆಲ್ಕಿ ಹೋಲಿಕ್ಮು ಆಯಿಂದಿ . ² ವಾಳ್ಳಾ ಐದು ಮಂದಿಲು ಬುದ್ದಿಲೇನಿನೋಳು , ಐದು ಮಂದಿ ಬುದ್ದಿವಂತೆಲು . ³ ಬುದ್ದಿಲೇನಿನೋಳು ವಾಳ್ ಆರ್ಥಿಲ್ನಿ ಸೀಸ್ಕೊನ್ರಿ , ಆಯ್ತೆ ಅಂದ್ಮು ಸೀಸ್ಕೊಲೇದು . ⁴ ಬುದ್ದಿವಂತೆಲು ವಾಳ್ ಆರ್ತಿಲು ಜೊತ್ಲ ಪಾತ್ರುಲ್ಲಾ ಅಂದ್ಮು ಸೀಸ್ಕೊನ್ರಿ . ⁵ ಮದಲಿಂಗುಡು ವಚ್ಚೆದಾನ್ಕಿ ತಡ್ಮುಸೇಸೆಕಿ ವಾಳಂದ್ರು ತೂಗ್ಡಿಚ್ಚಿ ಪೊಂಗೊನ್ರಿ . ⁶ ಆಯ್ತೆ ಅರ್ದ್ಮು ರಾತ್ರಿಲ - ಇಗೋ , ಮದಲಿಂಗುಡು | ವಾಡ್ನಿ ಎದ್ರುಗೊನೆದಾನ್ಕಿ ಪದಂಡ್ರಿ ಅನೆ ಕೂಸಾಯೇ . ⁷ ಅಪ್ಡು ಆ ಕನ್ಯೆಲಂದ್ರು ಲೇಸಿ ವಾಳ್ ಆರ್ತಿಲ್ನಿ ನೆಟ್ಗಸೇಸ್ರಿ . ⁸ ಅಟ್ಟೆ ಬುದ್ದಿಲೇನೋಳು ಬುದ್ದಿವಂತುಲ್ಕಿ - ಮೀ ಅಂದ್ಮುಲ ಮಾಕಿ ಕೊಂಚ್ಮು ಇಯಂಡ್ರಿ . ⁹ ಮಾ ಆರ್ತಿಲು ಆರ್ಪಾತಾವಿ ಅನಿ ಸೊಪ್ಪೆ . ಅಂದ್ಗೆ ಆ ಬುದ್ದಿವಂತುಲು - ಮೀಕಿ ಇಸ್ತೆ ಮಾಕು ಮೀಕುವೆ ಸಾಲ್ಕುಣ್ಣಾ ಪಾಯಿನಿ , ಮೀರು ಮಾರೋಳು ದೆಗ್ರುಕಿ ಪಾಯಿ ಕೊನ್ಕೊಂಟೆ ಮಂಚಿದಿ ಅನ್ರಿ . ¹⁰ ವಾಳು ಕೊನ್ಕೊನೆದಾನ್ಕಿ ಪಾಯ್ನಪ್ಡು ಮದಲಿಂಗುಡು ವಚ್ಚೆ . ಸಿದ್ಮುಆಯುಂಡೋಳು ವಾಡ್ ಜೊತ್ಲ ಪೆಂಡ್ಲಿ ಇಂಟ್ಕಿ ಪಾಯ್ರಿ . ವಾಕ್ಲಿ ಮೂಸಾಯೆ . ¹¹ ಆಮಿಂದ ಉಳ್ಸಿನ ಕನ್ಯೆಲು ಸಹ್ಮು ವಚ್ಚಿ - ಸ್ವಾಮೀ , ಸ್ವಾಮೀ , ಮಾಕಿ ತೆರಿಯಂಡ್ರಿ ಅನ್ರಿ . ¹² ಯೇಸು - ಮಿಮ್ಮುಲ್ನಿ ನಾನರಿಲೇದು ಅನಿ ಮೀಕಿ ಸತ್ಯುಮಾಯಿ ಸೊಪ್ತಾನು ಅನೆ . ¹³ ದಾನ್ನಿಂಚ ಆ ದಿನ್ಮಾಯ್ತೆನು ಗಳಿಗೆಯಾಯ್ತೆನು ಮೀಕಿ ಗೊತ್ಲೆಂದಾಯಿಂದಾನಿಂಚ ಎಚ್ರುಮಾಯುಂಡಡ್ರಿ . ¹⁴ ದೇಶಾಂತ್ರುಮ್ಕಿ ಪಾಯೇ ಓಕ್ ಮನುಷ್ಯುಡು ತನ್ ಆಳುಲ್ನಿ ಪಿಲ್ಚಿ ವಾಳ್ಕಿ ತನ್ ಆಸ್ತಿನಿ ಒಪ್ಪಿಚ್ಚಿ ಇಚ್ನಟ್ಗುನ್ಟಾದಿ . ¹⁵ ವಾಡು ಒಕ್ಡಿಕಿ ಐದು ತಲಾಂತು , ಒಕ್ಡುಕಿ ರೊಂಡು , ಒಕ್ಡುಕಿ ಒಕ್ಟಿ , ಇಟ್ಟ ವಾಡ್ ವಾಡ್ ಸಾಮರ್ಥ್ಯುಮು ಪ್ರಕಾರ್ಮು ಇಚ್ಚಿ ಬೇರೊಕ್ಟಿ ದೇಶುಮ್ಕಿ ಪಾಯೇ . ¹⁶ ಐದು ತಲಾಂತು ಹೊಂದ್ನೋಡು ಪಾಯಿ ದಾನ್ನಿ ವ್ಯಾಪರಂಕಿ ಏಸಿ ಇಂಕ ಐದು ತಲಾಂತು ಗಳಿಚ್ಕೋನೆ . ¹⁷ ಅಟ್ಟೆನೆ ರೊಂಡು ತಲಾಂತ್ಮು ಹೊಂದಿನೋಡು ಇಂಕ ರೊಂಡು ಸಂಪಾದಿಚ್ಕೋನೆ . ¹⁸ ಆಯ್ತೆ ಓಕ್ ತಲಾಂತು ಹೊಂದ್ನೋಡು ಪಾಯಿ ಭೂಮಿನಿ ಅಗ್ಸಿ ವಾಡ್ ಧಣಿ ದುಡ್ಲುನಿ ಮೂಸ್ಪೆಟ್ಟೆ . ¹⁹ ಬಹುಕಾಲ್ಮು ಮಿಂದ ಆ ಆಳ್ಳುಲ ಧಣಿಡು ವಚ್ಚಿ ವಾಳಿಂಚ ಲೆಕ್ಮು ಸೀಸ್ಕೊನೆಕಿ ಐದು ತಲಾಂತು ಹೊಂದ್ನೋಡು ಮುಂದ್ರಿಕಿ ವಚ್ಚಿ ಇಂಕ ಐದು ತಲಾಂತು ಎತ್ಕೊಚ್ಚಿ - ²⁰ ಸ್ವಾಮೀ , ನುವ್ವ ಐದು ತಲಾಂತುನಿ ನಾಕಿ ಇಚ್ಚುoಟ್ವೆ , ಸೀಸ್ಕೋ ಇಂಕ ಐದು ತಲಾಂತುನಿ ಸಂಪಾದಿಚ್ನಾನು ಅನೆ . ²¹ ವಾಡ್ ಧಣಿ - ಭಲಾ , ನಂಬಿಗಸ್ತುಡೈನ ಮಂಚಿ ಆಳು ನುವ್ವ , ಕೊಂಚ್ಮು ಕೆಲ್ಸ್ಮುಲ ನಂಬಿಗಸ್ತುಡಾಯಿನಾವು , ಪೆದ್ ಕೆಲ್ಸುಮ್ಲ ನಿನ್ನಿ ಪೆಡ್ತಾನು , ನೀ ಧಣಿಡು ಸೌಭಾಗ್ಯುಮುಲ ಸೇರು ಅನೆ . ²² ಅಪ್ಡು ರೊಂಡು ತಲಾಂತು ಹೊಂದ್ನೋಡು ಮುಂದ್ರುಕಿ ವಚ್ಚಿ - ಸ್ವಾಮೀ ನಾಕಿ ರೊಂಡು ತಲಾಂತು ಒಪ್ಪಿಚ್ನಾವೆ , ಸೀಸ್ಕೋ ಇಂಕ ರೊಂಡು ತಲಾಂತೂ ಸಂಪಾದಿಚ್ನಾನು ಅನೆ . ²³ ವಾಡ್ ಧಣಿ ವಾಡ್ಕಿ - ಭಲಾ ನಂಬಿಗಸ್ತುಡೈನ ಮಂಚಿ ಆಳು ನುವ್ವ , ಕೊಂಚ್ಮು ಕೆಲ್ಸ್ಮುಲ ನಂಬಿಗಸ್ತುಡಾಯಿನಾವು , ಪೆದ್ ಕೆಲ್ಸುಮ್ಲ ನಿನ್ನಿ ಪೆಡ್ತಾನು , ನೀ ಧಣಿ ಸೌಭಾಗ್ಯುಮ್ಲ ಸೇರು ಅನಿ ಸೊಪ್ಪೆ . ²⁴ ಆಮಿಂದ ಓಕ್ಕೆ ತಲಾಂತು ಹೊಂದ್ನೋಡು ಸಹ್ಮು ಮುಂದ್ರುಕಿ ವಚ್ಚಿ - ಸ್ವಾಮೀ ನುವ್ವ ಕಟಿಣ್ಮು ಮನುಷ್ಯುಡು , ನುವ್ವ ಬಿತ್ಲೆನಿನ್ದಾoಟ್ಲ ಕೊಸೋಡು , ²⁵ ನುವ್ವ ತೂರ್ಲೆನಿಂದಾoಟ್ಲ ರಾಶಿ ಸೇಸ್ಕೊನೋಡು ಅನಿ ತಿಲ್ಸ್ಕೊನಿ ಹೆದ್ರುಕೊನಿ ಪಾಯಿ ನೀ ತಲಾಂತ್ನಿ ಭೂಮಿಲ ಮೂಸ್ಪೆಡ್ತಿ , ಇನ , ನೀದಿ ನೀಕೆ ಸಲ್ಲಿಂದಿ ಅನೆ . ²⁶ ಅಪ್ಡು ವಾಡ್ ಧಣಿಡು ವಾಡ್ಕಿ - ಪೈದೊಂಗ ಆಯಿನ ಶೆಡ್ದೆ ಆಳು ನುವ್ವ , ನಾನು ನುವ್ವ ಬಿತ್ಲೆನಿನ್ದಾoಟ್ಲ ಕೊಸೋಡು , ನುವ್ವ ತೂರ್ಲೆನಿಂದಾoಟ್ಲ ರಾಶಿ ಸೇಸ್ಕೊನೋಡು ಅನಿ ತಿಲ್ಸ್ಕೊನಾವ ? ²⁷ ಅಟ್ಟಾಯ್ತೆ , ನುವ್ವ ನಾ ದುಡ್ಲುನಿ ಸಾಹುಕಾರುಲ್ಲಾ ಬಡ್ಡಿಕಿ ಎಯ್ಬೇಕಾಯುಂಡೆ , ನಾನು ವಚ್ಚಿ ನಾದ್ನಿ ಬಡ್ಡಿ ಸಮೇತ್ಮು ಪಡ್ಸ್ಕೊಂದ್ನು ಅನಿ ಸೊಪ್ಪಿ ತನ್ ಸೇವಕುಲ್ಕಿ - ²⁸ ವಾಡಿಂಚ ಆ ತಲಾಂತುನಿ ಸೀಸ್ಕೊನಿ ಪದಿ ತಲಾಂತು ವುಂಡೋಡ್ಕಿ ಇಯಂಡ್ರಿ . ²⁹ ವುಂಡ್ನೋಲ್ಕಂತ ಇಚ್ಚಲ್ಪಡ್ತಾದಿ , ವಾಳ್ಕಿ ಮಲಿ ಹೆಕ್ವಾಯ್ತಾದಿ , ಲೇನೋಡಿಂಚ ವುಂಡೇದಿ ಸೀಸಲ್ಪಡ್ತಾದಿ . ³⁰ ಮಲಿ ಕೆಲ್ಸುಮ್ಕಿ ರಾಲೇನಿನ ಈ ಆಳ್ನಿ ಆಕ್ಟರ ಸೀಕ್ಟಿಕಿ ಏಸಿಡ೦ಡ್ರಿ ಅನಿ ಸೊಪ್ಪೆ . ಆನ ಗೋಳಾಟ್ಮು ಕಟಕಟ್ಮು ಪಂಡ್ಳು ಕೊರ್ಕೆದಿ ವುಂಟಾವಿ . ³¹ ಇದ್ಕಾಕುನ್ನಾ ಮನುಷ್ಯು ಕುಮಾರುಡು ತನ್ ಮಹಿಮೆಯಿಂಚ ಅಂತ ದೇವುಡು ದೂತುಲುಜೊತ್ಲ ಕೂಡಿ ವಚ್ಚೆನಪ್ಡು ತನ್ ಮಹಿಮಾ ಸಿಂಹಾಸನ್ಮುಲ ಕುಚ್ಚೊಂಟಾದು , ³² ಮಲಿ ಅನ್ನೀ ದೇಶ್ಮುಲು ಜನಲು ವಾಡ್ ಮುಂದ್ರ ಸೇರ್ತಾಲು . ³³ ಗೊರ್ರೋಡು ಮ್ಯಾಕ್ಲುನಿ ಗೊರ್ಲುನಿ ಬೇರೆಬೇರೆ ಸೇಸೆ ಪ್ರಕಾರ್ಮು ವಾಡು ವಾಳ್ನಿ ಬೇರೆ ಬೇರೆ ಸೇಸಿ ಗೊರ್ಲುನಿ ತನ್ ಕುಡುಮ್ ತೊಟ್ಟು ಮ್ಯಾಕ್ಲುನಿ ತನ್ ಎಡಮ್ ತೊಟ್ಟು ನಿಲ್ಬಿಸ್ತಾಡು . ³⁴ ಅಪ್ಡು ಅರಸುಡು ತನ್ ಕುಡುಮ್ ತೊಟ್ಟು ವುಂಡೋಳ್ಕಿ - ನಾ ತಂಡ್ರಿ ಆಶೀರ್ವಾದ್ಮು ಹೊಂದ್ನೋಳಾ ರಾಂಡ್ರಿ , ಲೋಕ್ಮಾದಿಯಿಂಚ ಮೀಕೋಸ್ಕರ್ಮು ಸಿದ್ಮುಸೇಸಿನ ರಾಜ್ಯುಮ್ನಿ ಸ್ವಾಸ್ಥ್ಯುಮೈಯಿ ಸೀಸ್ಕೊಂಡ್ರಿ . ³⁵ ನಾನು ಆಕ್ಲಾಯುಂಟಿ , ನಾಕಿ ಊಟುಮ್ಕಿ ಇಸ್ತ್ರಿ , ನಾನು ನೋರಾರುಂಟಿ , ನಾಕಿ ತಾಗೆದಾನ್ಕಿ ಇಸ್ತ್ರಿ , ಪರದೇಶಿಯಾಯುಂಟಿ , ನನ್ನೀ ಸೇರಿಚ್ಕೊಂಟ್ರೀ , ಬಟ್ಳುಲೇನೋಡಾಯುoಟಿ , ನಾಕಿ ಏಸ್ಕೊನೇಕಿ ಇಸ್ತ್ರಿ , ³⁶ ರೋಗುಮ್ಲ ಪಡುಂಟಿ , ನನ್ನೀ ಆರೈಕ್ಮು ಸೇಸೆದಾನ್ಕಿ ವಸ್ತ್ರಿ , ಸೆರಇಂಟ್ಲ ವುಂಟಿ , ನನ್ನೀ ಸೂಸೆದಾನ್ಕಿ ವಸ್ತ್ರಿ ಅನಿ ಸೊಪ್ತಾಡು . ³⁷ ದಾನ್ಕಿ ನೀತಿವಂತುಲು - ಸ್ವಾಮೀ , ಎಪ್ಡು ನುವ್ವ ಆಕ್ಲಾಯಿಂದ್ನಿ ಕನಿ ನೀಕಿ ಊಟುಮ್ಕಿ ಇಸ್ತ್ಮಿ ? ಲೇದು ನುವ್ವ ನೋರಾರಿಂದ್ನಿ ಕನಿ ತಾಗೆದಾನ್ಕಿ ಇಸ್ತ್ಮಿ ? ³⁸ ಎಪ್ಡು ನುವ್ವ ಪರದೇಶಿಯಾಯಿಂದ್ನಿ ಕನಿ ಸೇರ್ಸ್ಕೊಂಟ್ಮಿ ? ಲೇದು ನೀಕಿ ಬಟ್ಳುಲೆನಿದಾನ್ನಿ ಕನಿ ಏಸ್ಕೊನೆದಾನ್ಕಿ ಇಸ್ತ್ಮಿ ? ³⁹ ಎಪ್ಡು ನುವ್ವ ರೋಗುಮ್ಲ ಪಡುಂಡೆದಾನ್ನಿ ಲೇದು ಸೆರಇಂಟ್ಲ ವುಂಡೆದಾನ್ನಿ ಕನಿ ನಿನ್ನಿ ಸೂಸೆದಾನ್ಕಿ ವಸ್ತ್ಮಿ ಅನಿ ಉತ್ರುಮಾಯಿ ಸೊಪ್ತಾರು . ⁴⁰ ದಾನ್ಕಿ ಅರಸುಡು - ಈ ನಾ ಸಹೋದರುಲುಲಾ ಕೇವಲ್ಮು ಅಲ್ಪುಡಾಯಿನ ಒಕ್ಡುಕಿ ಏಮೇಮಿ ಸೇಸ್ತ್ರೋ ದಾನ್ನಿ ನಾಕು ಸೇಸಿನ ಅಟ್ಗಾಯೇ ಅನಿ ಮೀಕಿ ಸತ್ಯುಮಾಯಿ ಸೊಪ್ತಾನು ಅನೇದಿ . ⁴¹ ಆಮಿಂದ ವಾಡು ಎಡುಮ್ ತೊಟ್ಟು ವುಂಡೋಳ್ಕಿ - ಶಾಪ್ಮು ಗ್ರಸ್ತುಲಾ , ನನ್ನೀ ಇಡ್ಸಿ ಪಿಶಾಚುಡ್ಕು ವಾಡ್ ದೂತುಲ್ಕು ಸಿದ್ಮು ಸೇಸುಂಡೆ ನಿತ್ಯುಮು ಅಗ್ಗಿ ನೋನ್ಕಿ ಪೊಂಡ್ರಿ . ⁴² ನಾನು ಆಕ್ಲಾಯುಂಟಿ , ಮೀರು ನಾಕಿ ಊಟುಮ್ಕಿ ಇಯ್ಲೇದು , ನಾನು ನೋರಾರುಂಟಿ , ಮೀರು ನಾಕಿ ತಾಗೆದಾನ್ಕಿ ಇಯ್ಲೇದು , ಪರದೇಶಿಯಾಯುಂಟಿ , ಮೀರು ನನ್ನೀ ಸೇರ್ಸ್ಕೊಲೇದು , ಬಟ್ಳುಲೇನಿನೋಡಾಯುಂಟಿ , ⁴³ ಮೀರು ನಾಕಿ ಕಟ್ಕೊನೆದಾಂಕಿ ಇಯ್ಲೇದು , ರೋಗುಮ್ಲ ಪಡುಂಟಿ , ಸೆರಇಂಟ್ಲ ವುಂಟಿ , ಮೀರು ನನ್ನೀ ಆರೈಕ್ಮು ಸೇಸೇದಾನ್ಕಿ ರಾಲೇದು ಅನಿ ಸೊಪ್ತಾಡು . ⁴⁴ ದಾನ್ಕಿ ವಾಳು ಸಹ್ಮು - ಸ್ವಾಮೀ , ಎಪ್ಡು ನುವ್ವ ಆಕ್ಲಾಯಿಂದ್ನಿ ನುವ್ವ ನೋರಾರಿಂದ್ನಿ ನುವ್ವ ಪರದೇಶಿಯಾಯಿಂದಾನ್ನಿ ಬಟ್ಳುಲೇನೋಡಾಯಿಂದಾನ್ನಿ ರೋಗ್ಮುಲ ಪಡಿಂದಾನ್ನಿ ಸೆರೆಲವುನ್ಡಿದಾನ್ನಿ ಕನಿ ನೀಕಿ ಉಪ್ಚಾರ್ಮು ಸೇಯ್ಕುನ್ನ ಪಾತ್ಮಿ ? ಅಂಟಾರು . ⁴⁵ ಅಪ್ಡು ವಾಡು - ಮೀರು ಈ ಕೇವಲ್ಮು ಅಲ್ಪ್ಮು ಆಯ್ನೋಳ್ಳಾ ಒಕ್ಡುಕಿ ಏಮೇಮಿ ಸೇಯ್ಕುನ್ನಾ ಪಾತ್ರೋ ದಾನ್ನಿ ನಾಕು ಸೇಯ್ಕುಣ್ಣಾ ಪಾಯ್ನಟ್ಗಾಯೆ ಅನಿ ಮೀಕಿ ಸತ್ಯುಮಾಯಿ ಸೊಪ್ತಾನು ಅನ್ಟಾಡು . ⁴⁶ ಮಲಿ ವೂಳು ನಿತ್ಯುಮು ಶಿಕ್ಷೆಕು ನೀತಿವಂತುಲು ನಿತ್ಯಜೂಡ್ಕಿ ಪಾತಾರು .