¹ ಮಾಮು ನ೦ಬಿಕೆಯಿಚ್ಚ ನೀತಿವ೦ತೂಲ್ ಅಯ್ಯುಡ್ದದಾಕ್ಕಿ ಯೇಸು ಕ್ರಿಸ್ತುಡ ಮೂಲಕಮೈ ದೇವುಡ್ಲಾ ಉ೦ಟಾಯ್ನಾ ಸಮಾಧಾನಮುಲಾ ವುದ್ದಾಮೂ . ² ಮಾಮು ದೇವುಡ ಕೃಪಾಅಶ್ರಾಮುಲಾ ಯೇಸು ಮುಖಾ೦ತರಮೇ ನ೦ಬಿಕೆಕ್ಕಿ ಪ್ರವೇಶಮು ಅಯ್ಯಿದ್ದಿ . ³ ಇದೀ ಕಾಕುಡ್ಡ ಮಾಕಿ ಉ೦ಟೈಯಾ ಉಪದ್ರವಮುಲಾನೂ ಸ೦ತೋಷಮಿಚ್ಚ ವು೦ಡಾಮು . ⁴ ಅಟ್ಟೆ ಉಪದ್ರವಮುನೀಚ್ಚ ತಾಳ್ಮೆ ಪುಟ್ತಾದೀ , ತಾಳ್ಮೆನಿಚ್ಚ ಅನುಭವಸಿದ್ದಿ ಪುಟ್ತಾದೀ , ಅನುಭವಸಿದ್ದಿಯಿಚ್ಚ ನಿರೀಕ್ಷಣ ಪುಟ್ತಾದೀ . ⁵ ಈ ನೀರಿಕ್ಷೆ ಮಾ ಆಸೇನೀ ಭ೦ಗಪಡಿಚ್ಚೆಲೇ ; ಮಾಕೀ ಇಚ್ನಾಟ್ಟ ಪವಿತ್ರಾತ್ಮ ಮೂಲಕಮೈ ದೇವುಡ ಪ್ರಿತಿರಸಮು ಮಾ ಹೃದಯಲ್ಲಾ ಧಾರಾಳಮೈ ಸುರ್ಬಿಚ್ಚಿದ್ದಿ ಕಾದ . ⁶ ಮಾಮು ಆಸಕ್ತಿನೀಚ್ಚನೆ ವು೦ಡ್ನಾಪ್ದು ಕ್ರಿಸ್ತುಡೂ ಭಕ್ತಿಹೀನಲಿಕೊಸ್ಕರಮು ಪ್ರಾಣಾನೀ ಇಚ್ಛೆ . ⁷ ನೀತಿವ೦ತೂಲ್ಕೊಸ್ಕರಮೂ ಪ್ರಾಣನೀ ಇಚ್ಚೆದ್ದೀ ಅಪರೂಪಮೂ . ಉಪಕಾರಿಲ್ಕೊಸ್ಕರಮೂ ಯವೌಡ್ ಅಯತ್ನೂ ಧೈರ್ಯಮುನೀ ಸೇಸತ್ನೂ ಸೇಸ್ಸೇ . ⁸ ಅಯ್ತೆ ಪಾಪಿಲ್ ಆಯ್ಯುಡಟ್ಟ ಮಾಕಿ ಕ್ರಿಸ್ತುಡು ಪ್ರಾಣಮುನೀ ಇಚ್ಚಿದಾಡ್ಲಾ ದೇವುಡ್ಕಿ ಮಾ ಮಿದ್ದ ಉ೦ ಡ ಪ್ರೀತಿನೀ ಸಿದ್ದಾ೦ತಮ್ ಪಡಿಚ್ನಾಡೂ . ⁹ ಇಪ್ಡು ಮಾಮು ನೀತಿವ೦ತೂಲ್ ಅಯ್ಯುಡ್ದದಾಕ್ಕಿ ದೇವುಡ್ನಿಚ್ಚ ವಚ್ಚ ಕೋಪಕ್ಕಿ ತಪ್ಪಿಚ್ಕೊನದೀ ಇಕ್ಕ ನಿಶ್ಚಯಮು ಕದಾ . ¹⁰ ವೈರಿಲೂ ಅಯ್ನಾಟ್ಟ ಮಾಮು ವಾ ದೋಡ್ ಕೊಡುಕು ಮೂಲಕಮೈ ದೇವುಡ್ ಜೋತ್ಲಾ ಸಮಧಾನಮು ಅಯ್ಯುಡ್ಡೆದಾಕಿ ಆ ಕೊಡುಕೂ ಜೀವಮ್ನಿಚ್ಚ ರಕ್ಷಣೆ ಅಯ್ಯೇದ್ದಿ ಇಕ್ಕ ನಿಶ್ಚಯಮು ಕದಾ . ¹¹ ಇದಿ ಕಾಕುಡ್ಡ ಯೇಸು ಕ್ರಿಸ್ತುಡ ಮೂಲಕಮೈ ಸಮಾಧಾನಸ್ಥಿತಿ ಹೊ೦ದೂಡಾದ್ದಿ ದೇವುಡ್ಲಾ ಹರ್ಷಗೊಳ್ತಾಮೂ . ¹² ವಿಷಯಮು ಯಟ್ಟ ಅಟ್ಟೆ - ವಕ್ಕ ಮನುಷ್ಯುಡ್ನಿಚ್ಚ ಪಾಪಮು , ಪಾಪಮುನಿಚ್ಚ ಮರಣಮೂ , ಲೋಕ್ಕಕ್ಕಿ ಸೇರೆ . ಅದ್ರೂ ಪಾಪಮುನೀ ಸೇಸ್ಸಿದಾಕ್ಕಿ ಮರಣಮೂ ಇಟ್ಟ ಅದ್ರೂಕು ವ್ಯಾಪಿಚ್ಚೆ . ¹³ ಧರ್ಮಶಾಸ್ತ್ರಮು ಉ೦ಡ್ಡೆಕ್ಕಿ೦ತ ಮು೦ಚ್ಚೆನೇ ಪಾಪಮು ಲೋಕಮುಲಾ ವುಡ್ಡೆ . ಅಯ್ತೆ ಧರ್ಮಶಾಸ್ತ್ರಮು ಲೇನಪ್ದು ಪಾಪಮು ಲೇಕ್ಕಕ್ಕಿ ವಚ್ಚೆಲೇ . ¹⁴ ಆದಾಮ ಕಾಲಮ್ನಿಚ್ಚ ಮೋಶೆ ಕಾಲಮ್ ತನಕ ಮರಣದ ಆಳ್ವಿಕೆ ಉ೦ಡ್ಡೆ . ಆದಾಮುಡು ದೇವುಡ್ ಆಜ್ಞೆಮೀರಿ ಸೇಸ್ನಾಟ್ಟ ಪಾಪಕ್ಕಿ , ಪಾಪಮುನಿ ಸೇಯ್ನಾಟ್ಟೋಳ್ ಮಿದ್ದನೂ ಅದಿ ನಡಸ್ತಾ ವುಡ್ಡೆ . ಆ ಆದಾಮುಡು ರಾಬೇಕೈಯುಡ್ದ ವೋಕ್ಕಆತುಡ್ನಿ ಸೂಚಿಸ್ತಾದೀ . ¹⁵ ಒಕ್ಕುಡ್ ಅಪರಾಧಮಿಚ್ಚ ಅದ್ರೂ ಸಚ್ಚಿಪೈಂದಿ ನಿಜಮು ಅಯ್ಯುಡ್ದದಾಕಿ ಯೇಸು ಕ್ರಿಸ್ತುಡ್ ಕೃಪೆಯಿಚ್ಚ ಸಿಕ್ಕ ವರಮೂ ಅದ್ರೂಕ್ಕು ಸಿದ್ದಮೈಯ್ಯುಡ್ದದೀ ಇಕ್ಕ ನಿಶ್ಚಯಮು ಕದಾ . ¹⁶ ಒಕ್ಕ ಮನುಷ್ಯುಡ ಪಾಪ ದೇಸೆಯಿಂಚ ಸಾಯಲನೀ ನಿರ್ಣಯಮು ಉ೦ಟಾಯ , ಅಯ್ತೆ ದೇವುಡ ಕೃಪಾದಾನಮು ಅನೇಕ ಜನಲ ಅಪರಾಧಕಾರಣಮ್ನಿಚ್ಚ ವಾಳ್ನಿ ನೀತಿವ೦ತುಲು ಅನಿ ನಿರ್ಣಯಿಸ್ತಾದೀ . ¹⁷ ಒಕ್ಕಡು ಸೇಸ್ನಾಟ್ಟ ಪಾಪ ದೆಸೆಯಿಂಚ ಮರಣಮು ಉ೦ಟೈಯಿ , ವಾಡ್ನಿಚ್ಚನೇ ಆಳೆದೈತೆ , ದೇವುಡು ಅನುಗ್ರಹಿಚ್ಚುಡ್ದ ಕೃಪಾಧಾನ ಮಲ್ಲಿ ನೀತಿ ಅನೆ ವರನೀ ಹೊ೦ದ್ಕೊನುಡೋಳೂ ಯೇಸು ಕ್ರಿಸ್ತುಡ ಮೂಲಕಮೈ ಜೀವಭಾರಿತ್ಲು ಅಯ್ಯಿ ಆಳೆದ್ದಿ ಇಕ್ಕ ನಿಶ್ಚಯಮು ಕದಾ . ¹⁸ ವೊ೦ಕ್ಕ ಅಪರಾಧಮ್ನಿಚ್ಚ ಮನುಷ್ಯುಲೂ ಸಾಯಲನೀ ಯಟ್ಟ ಉ೦ಟಾಯ್ನೋ ಅಟ್ಟೆ ವೊ೦ಕ್ಕ ಸತ್ಕಾರ್ಯಮುನಿಚ್ಚ ಮನುಷ್ಯುಲೂ ನೀತಿವ೦ತುಲೂ ಅನೆ ನಿರ್ಣಯಮು ಉ೦ಟೈಯ್ಯಿ ಜೀವಮ್ನಿ ಫಲಿಸ್ತಾದೀ . ¹⁹ ಒಕ್ಕೂಡ್ ಅವಿಧೇಯತ್ವಮೂನಿಚ್ಚ ಅದ್ರೂ ಯಾಟ್ಟ ಪಾಪಿಲೂ ಅಯ್ಲೋ ಅಟ್ಟೆನೀ ಒಕ್ಕೂಡ್ ವಿಧೇಯತ್ವಮುನಿಚ್ಚ ಅದ್ರೂ ನೀತಿವ೦ತುಲೂ ಅಯ್ಲಿ . ²⁰ ಅಪರಾಧಲೂ ಜ್ಯಾಸ್ತಿ ಕ೦ಡೋಚ್ಚೆಕ್ಕಿ ಧರ್ಮಶಾಸ್ತ್ರಮೂ ಮಧ್ಯೆವಚ್ಚೆ . ಅಯ್ತೆ ಪಾಪಮು ಜ್ಯಾಸ್ತಿ ಅಯ್ನಾಟ್ಗ ಕೃಪೆ ಯತ್ತೋ ಜ್ಯಾಸ್ತಿ ಅಯ್ಯಿ ಪ್ರಬಲಮು ಅಯಾ . ²¹ ಇಟ್ಟ ಪಾಪಮು ಮರಣಮುನೀ ಉ೦ಟ್ಸೆಸ್ಸಿ ಅಧಿಕಾರಮುನೀ ನಡಿಪಿಚ್ನಟ್ಗ ದೇವುಡ ಕೃಪೆ ಯೇಸು ಕ್ರಿಸ್ತುಡ ಮೂಲಕಮೈ ನೀತಿನಿ ಇಚ್ಚಿ ನಿತ್ಯಜೀವಾನಿ ಉ೦ಟ್ಟುಸೇಸ್ಸಿ ಅಧಿಕಾರಮುನೀ ನಡಿಪಿಸ್ತಾದೀ .