1
Gobu duwe Israel ekuandype oma Hebrompe djawuwã, Dawidji djawuma reko edji. Inama idjape cho ĩ kowepe dje djãwẽ cho rõ dje ikãwe emi dje o'owe irõndyechegi.
2
Go krey wachawegi Saul ymachidja wychebu, djerõ rawe Israel chupa pua tõmumbuwã, dje eruwe kowepe emi. Kowebu roma Apã Wachu ina djepe: dje kuwẽwerã cho chupa Israeldji. Djerõ Israel ymachidjawerã kowebu.
3
Go pua wywy Israel yma chuegi djawuma ymachidja wachugi go Hebrompe. Go ymachidja David ima etakrã djawudji edji wywy Hebrodji Apã Wachu chã ruwa: Gobu mima David ymachidjawã emi Israel wywy llabu.
4
David reko endawe brewipychã tapa ruy'y ĩ endawe ymachidja: go ymachidja reko endawe chengypychã tapa ruy'y. Tãrãma ymachidja ĩwẽ.
5
Hebron pua David machidjawe Juda wywydji djypetã ruy'y go buachapa djachy manopewe: go Jerusalepe ymachidja brewipychã brewipychã ruy'y go Israel pua wywy, llabo, emi go Juda pua wywy llabu.
6
Gobu ymachidja dja irõndy wywydji oma Jerusalen ekuandype ĩ wychebu go Jebu pua: Gogi wywy djawuma reko Dawidji go ina; dje ikẽmbechewerã go chupape: chãllãngi, go eche chapagi djepe djapiwerã go chupa puare:
7
David gobu mima Sion dja ipo wydji go nonga bykuama Dawid chupa.
8
Go David inama kowebu awa rõ djopiwerã y krorõ ita djawã wachu rupi browã Jebu pua chapagi emi chãllãngi. Gogi rõ byllãeche chodji. Godjiwa rõ challãngi go eche chapagi go ikellãwerã go chupape.
9
Go David ĩma ekõwa Sion pua (Jerusalenpua) go mama gatuma go ekuandy chupa. Godjiwa bykuama David ekuandy go mi gatu roma emi dja ruwa emi Milo djãwã ruwawe.
10
Go David chidjama emi chidjachema djo go ymachidjawe roma emi. Apã Wachu ywadjiwa chidjaechegi ĩma edji.
11
Hiram, Tiro chupa ymachidja, buema idjape duwe wywy Dawid endape, tyrõãndy chidja go wyra emi itadji djapowã David endaty. Go emi eruma wyra chepe chinkykachĩ.
12
Go David kua gatuechema Apã Wachu mema chidja idjape Israel chupa ymachidja wapy endatydji emi kuwẽ gatuma edji ymachidja rekobu, Israel naina wachu roma dja chupa Israel prawo buare
13
Go David duwe rekuaty Hebron, puare oma Jerusalempe udjawã emi duwe kudjã wywydji go duwe dja prawotygi. Gobu opoma dja tey'y kbe'e emi tey'y kudjã wywy.
14
Kowe krumi opoma idja puarã Samua, Sobab, Natan, Salomon.
15
Ibhar, Elisua, Nefeg, Jafia,
16
Elisama, Eliada, emi Elifelet,
17
Filisteo pua wywy wendubu prawopyrema Dawipe ymachidja wachugirã ïmbawã Israel irondy wywy llabu, go Filisteo wywy nuãma reko ytypãwã Dawid llabu. Gogi wendu buare wedjyma djo dja tapy pechepyregidji.
18
Go Filisteo pua wywy wema migatuwã Refain ywy allãpe djorã wachupe.
19
Gobu Dawid pranduma reko Apã Wachupe; inama: Cho itywerã ko Filisteo pua wywy llabu dje miwerã ko idja wywy cho ipope. Go Apã Wachu, inama Dawidpe: puã kuã, cho ina gatu, cho miwerã Filisteo pua wywy dje ipope.
20
Go Dawqid ekõ Baalperazimpe gope David chidja reko go wywydji go ina: y prãndja nonga Apã Wachu rama chodji byllãngipe cho chã ruwa, go buare bykuama go chupa gope Baal-Perazim.
21
Filiteo wywy wedjama idja by gatugi chã'ã nonga, go Dawid dja irõndy wywydji tatape mendypama.
22
Filisteo pua wywy ekõmbama emi, go kruru reko Refain ywy allãpe.
23
Gobu Dawid pranduma emi Apã Wachupe gobu inama idjape djopieme idja chã ruwa djere kua go wakua go wywy llabu dja etuawe rekuaty.
24
gogi wywy wendubu go watama o pychã pãmbu wachu go mirõ wyra akãdjiwa gobu wa kua go wywy llabu pendje Apã owera pendje chã ruwa bropawerã Filisteo pua wywype.
25
Gobu Dawid djapo roma Apã Wachu inawe nonga idjape go djuka reko Filisteo pua wywype Gebadjiwe wëpewe Gezer krãpipewe.