¹ Isboset, Saul tey'y, kuabu Abner manoma Hebrompe, idja eche praruma. Go Israel pua wywy krymballãma. ² Go Saul tey reko mirõ kbe'e, rõ allãngi ymachidjagi. Etakrã bykuapyre rõ Baana, go duwe rõ Recab. Go mirõngi rõ Rimon tey'y, Beerot pua, Benjamin irõndy wywydjiwa. ³ Kovegi Beerot wywy kandjãwe Gitainpe, emi gope ekõ wyche duwe rekuatywagi nonga kowe krey pewe. ⁵ Rimon tey wywy, Beerot puagi, Recab emi Baan, oma go krey'y aku rupiwe go ikẽ Isboset tapype, idja ikẽmbu kreywabu idja tapy djãwãpe. ⁶ Emi go kudjã warõndygi Isboset tapy djãwã ikẽ buchãma, go Recab emi Baana idja pawe ikẽ djemipe tapy djãwãpe. ⁷ Go ikembu go tapy djãwãpe, Isboset ikẽ llambatype, go tapy djãwape, broma idjape. Gobu idja tõ mondoma emi rama tõwe, go kandjãmbama chawã puku rupiwẽ go Araba ape rupi. ⁸ Go erumami Isboset tõwe Dawidpe, Hebronpe, go idja kiuma ymachidja wachugipe: Kowepe ĩma Isboset tõwe, Saul djepe byllãndygi teywe. Idja rõ djepe djukadjuechegi. Apã Wachu kuwẽ reko ore rekoatygi ymachidjagipe, go pepyma Saul djapo buchãweji, emi go idja irõndy wywy djãwãdjiwa wywy. ⁹ Go David djawuma emi Recab go idja pawepe Baanape, Rimon Beerot puagi tey wywype, inama: Apã Wachu rõ djãwãdjiwẽ, idja emi matãma cho djawã pua okryrallãngi. ¹⁰ Ekõmbu etakrã djawu ratygi go kiuma chope: Saul manoma. Go rõ kbeigatu kura eruma chope djawu gatu cho urywã, cho emi pychywe gogipe, emi cho mema djukawa Siclagpe, go djawu ratygi go nonga djawu eruwedjiwa. ¹¹ Kowenongabu cho djapowerã kowebu pendjedji emi, pendje bue buchã djapotydjiwa, pendje djuka buare etakrã kbe praru gatugi dja tapype, idja ikembu ikẽ llambatype. Go buare cho pukallãwerã ko go pirãwe pendje ipodji? Cho ko pendjepe matallãwerã ko kowe ywy llabudji? ¹² Go buare David inama dja buetygi wywpe djukawã idjape wywy. Gobu inama mondowã idjape ipo mirõ, mondo emi idja pychã. Go peruma Hebron y ywa puku endaty apo djawẽ. Gobu rama Isboset tõ'õ go pechema Abner ywype, Hebrompe.