¹ Gope ekõ etakrã djebi buchãgi, go bykuapyre rõ Seba, go rõ Bieri tey'y, go rõ Benjamin irõndygi, go rõ mibyma mibyatygi, go inama: nadje rekollaeche bue djapowa Daviddji, emi Isai raydji, go Israel puagi wywy opago modo pendje tapype. ² Gobu go kbe'e wywy Israel puagi wedjama Davidpe owà Saba kuere rupi, go rõ Bicri tey'y Juda puagi wywy rõ oma David kuere rupi go y purã wachu Jordan djiwe Jerusalen pewe. ⁴ Gobu ymachidja wachugi inama Amasape: nuãba gami cho chãruwa kbe'e wywy Juda puatydjiwe, go Brewipychã kreybu pendje ekõbagami cho endape. ⁵ Amasa oma nuãbawã Juda puagi wywype, go bitana djapowã go krey'y idjape ina nongapyrepe. ⁶ Go nongabu David inama Abisaipe: Go Seba Bicri tey'y, kowebu go djapo buchã echewerã nadjedji go Asalom nonga llawerã go buare nuãbagara go cho buetygi wywype, emi mudjã gara gogi wywy kuere rupi, gogi wywygi ikẽlãwã go tapy tarã tykõ pechepyre djawãpe, gogi wywy kadjallawã nadje chã ruwa. ⁷ Gobu rõ Abisai nuãbamami kbe'e ĩngi Joab ipo wydji, emi go Ceret puatygi, emi Pelet puatygi, emi go kryba echegi wywy, gogi wywy wẽrõma djo Jerusalen puare mudjãwa go Seba, Bicri tapy kuere rupi. ⁹ Gobu rõ inama Amasape: Dje ĩngatu ko cho pawe?, go kawama dja ipo llurekuatywagipe Amasa butadji go idja djyka pychewã kura. ¹⁰ Go Amasa kuallãma pe'ẽ akua pukudji go ingi Joab ipo llachupe; Gobu Joab pychoma gogipe idja djã bychechepe, gobu go leekawo roma modo ywype gobu wama emi manoma, go idjape pycho tarãllãbu. Gobu Joab emi dja pawe Abisai gog wywy oma Seba kuere rupi, go rõ Bicri tey'y, gogipe mudjãwã. ¹¹ Emi etakrã Joab kbe'e puama idja djawe, go inama: go prawogi Davidpe emi Joabpe, ogami Joab rupi ¹² Gobu Amasa echewe dheno romallã ape bychepe emi idja eche buy wachu roma ĩ, go duwe wywy wachagi go rupi maima reko go ehewedji. Go buare kbe'e igi Joabdji wechãbu go duwegi wywy mai rekobu go ehewedji, gobu Amasa echewe payllama djono go djorã rekuaty, pechemami tyru chepe wachudji. ¹³ Go Daydjã babu echewe apepuare, go ekõgi djiwe wachapama mudjã roma o Joabpe, go mudjãwã Seba, Bicri tey'e kuere rupi. ¹⁴ Go Seba wachama o Israel irõndy ywy rupi Abel-bet-maaca pewe. Gogi irõndy wywy nuãma owã emi idja kuere rupi. ¹⁵ Joab rõ idja kbe'e wywydji mama roma modo Abel-bet-maacape. Emi puaã roma modo ywy kmambu wachu embe romami go tapy tarã tykõ pychopyre embe wywy rupi, gobu go ekoady puagi wywy pachoma tapy ywy pechepyregi ytywã ¹⁶ Gobu rõ etakrã kudjã tõngatugi djawu chidjama idja tapy tarãdjiwe. Inama: wedugami. Pedje wedugami. cho puka omatã ina gami Joabpe ekowã kowepe cho djawuwã idjadji. ¹⁷ Go Joab kobu go endape, go kudjã inama: dje ko Joab?. Go inama: guei cho, go kudja inama emi idjape: wedu gami dje buety djawu. Go Joab inama emi. Ku'u gamu cho weduwã. ¹⁸ Gobu rò idja djawuma emi go inama: uochebema go djawupyty, go bue kuachegi etakrã bue, prandu gami Abel puagipe; emi go nonga go bue'e kuapama. ¹⁹ Ore tapy tarã ekõady okryra gatu emi ore ekoandy Israelpe go tapy tarã bychepe, emi dje buã'ã mibuchã bawã Israel ekõady etakrã tapy tarã ai'i djiwagi Israel ekoady. Ko dje djapo buchãba go Apã Wachu llapo? ²⁰ Joab inama emi: go nonga llawerã kowebu djueillawã chope, cho krapi emollã emi djapi emollã pedje ekõady. ²¹ Ore kuara etakrã kbe'e Efrain puatygipe, bykuapyre Seba, Bicri tey'y ka chidja buãgi ymachidja wachu Davidpe, go etakrã megami chope. Me'ẽ orepe, gobu cho owerã pedje ekõady puare. Go kudjã inama Joabpe, kowepe idja to'õwe djapipyrã djepe tykõ pechepyre llabu ²² Gobu go kudjã to'õ gatugi oma djawuwã idja ekoãdy puagi wywype Seba to'õ modowã Bicri tey'ype. Gobu djapima modo towe Joabpe; gobu rõ Joab mibyma emi opama gogi wywy idja tapype. Gobu Joab ekõma emi ymachidja wachu endape Jerusalenpe. ²³ Gobu rõ Joab nuãma reko Israel tõ allãgi, emi Benain, Joiada tey'y nuãma reko Ceret puagi emi pelet puagi wywype. ²⁴ Emi Adoran nuama buta matãdy wywype, emi Josafat, Ahilud tey'y, ekõ ymachidja wachu David ipo wydji. ²⁵ Seva kuachia paratygi, Sadoc emi ABiatar, rõ pa'i wywyma. ²⁶ Emi Ira, etakrã Jair puagi, go rõ David pa'i.