¹ Kowe bue wywy wembabu Absalon kawama wyra wata dja llapora, bepurã tãrãdjiwe, emi 50 kbe'e mỹrõ takuãngi wywy dja chã ruwa. ² Gobu Absalon krey wemba puã ekõandy go tapy wachu ikẽ llambatype; go ekoãndype bue buchã djapotygi djawẽ idja ĩma djawu bowoatygi nonga. Go Ache wywype pranduma: Ma ekoãndy pua rõ dje? Go ache inama go ekõandy bykuapyre rõ idja go ekõawe. ³ Gobu Absalon inama go wywype: Maĩ gami, go dje inawegi ina gatu. Ĩllãwera etakra djepe wenduwagi kowe ekõandype ymachidjagi chã ruwã. ⁴ Emi Absalon ina wyche: Buerã chope mi cherã ymachdija djawu bowoatygi kowe ekõandype Ache wywy bue buchã djapogi mĩ gatuwã? ⁵ Gobu ache kmarabu idja chã ruwa idja kawãma idja ipodji emi eche djuwy gatuma idjape. ⁶ Go nonga Absalon djapo ekõ Israel ekõandy puagi wywydji, ekõmbu ymachidjagi endape bue mĩ gatuwã; go nonga Absalon djapoma Israel pua idjape prawowã. ⁷ Chengypychã ruybu Absalon pukama Israel ymachidjape: Chope wedja gami cho owã Hebronpe, gope cho bue keĩwerã cho inawe nonga. ⁸ Cho rõ djawa mearẽ cho ĩware go Gesur ywy Jerusalenpe ekowã cho mudjãwera Apã Wachupe. ⁹ Go ymachidja wachugi inama: O ga mondo okryra gatype. Gobu Absalon oma Hebrompe. ¹⁰ Gobu emi Absalon buema mondo djawu rawã Israel irõndy wywy chapa rupi inama: Pendje wendubu mimby mimbywã pendje inawerã: Absalon ymachidja wachuma Hebronpe! ¹¹ Oma emi Absalon rupi 200 kbe'e wywy Jerusalen pua pukapyregi, kowegi wywy oma idja rupi bue kuabechepe. ¹² Emi Absalon bue keĩ rekobu pukama go Ahitofel Gilonpuagi. Go rõ Davidpe djawu gatu meandygi. Go nonga chidja roma mondo go Ache, tãrã buchã roma dja Absalon kuere rupi. ¹³ Etakrã djawu ratygi ekõma David endape inama: Ache wywy Israel pua oma Absalon kuere rupi. ¹⁴ Gobu David inama dja buetygi wywype idja djawẽ ĩngi Jerusalenpe: Puã ga mondo nandje kandjãwã. Nandje ollãmbu kandjãllãwerã Absalondjiwa. Idja ekõwerã ñandjepe bropawã pẽ bukupe cho irõndy wywype emi. ¹⁵ Ymachidja wachu buetygi wywy inama: Kowepe ore ĩ dje buetygi, ore wywy djapowerã ymachidja wachu inandy nonga. ¹⁶ Gobu go ymachidja wachu wẽma o, go dja irõndy wywydji erupi, emi wedjama etakrã tapa kudja dja rekotygi go Tapy warowã. ¹⁸ Wema o go ymachidja wachu dja irondy wywydji go dja kuere rupima djo. Go tapy tarã Jerusalen rypy djiwe ĩmbama. ¹⁷ Go idja buetygi wywy ekõma idja djawẽ go Seret emi Pelet puagi wywy, Geteo puagi wywy emi wachapa tapa tapa kbe'e ekõwegi erupi go ekoãndy Gatpuare, go wywy oma ymachidja wachugi chã ruwa. ¹⁹ Emi inama ymachidja wachugi go Itai Get puagipe: Buerã dje ekõ ore rupi? O ga mondo dje ymachidja wachugi djawẽ. Dje rõ duwe rekuatywa, dje emi buetygi nonga. ²⁰ Nondje kreybu dje ekõwe, kowebu dje odjuema ore kuere rupi? Cho kuabeche cho lluãwã rekuaty. Djewy kua dje ekõawe rekuaty rapa ga mondo dje irondy wywype. Jehova prawo gatupe emi bue gatupe gorawẽ llambarã. ²¹ Gobu go Itai inama go ymachidja wachugipe: Go Apã Wachu manollãndy emi ore Rekoatygi ymachidja wachu ekõ gatuwerã, cho wedjallãwerã ore ekõandy pua ymachidja wachugi. Cho manobu djepe gope emi ĩwerã dje buetygi. ²² Gobu David inama Itaipe: Edjo ore rupi. Gobu Itai oma dja irondy wywydji emi David irondy wywy. ²³ Ache wywy chinga wachupa roma. Gobu wachama o y tuwy Sedron, go nonga emi ymachidja wachu. Ache wywy oma idja chã ruwa go ka irõllãndy rekuaty. ²⁴ Oma emi pai Sadoc, go rupi opama Levita wywy go rama wyradji djapopyre Apã Wachu djawu llãmbaty djiwe go wedjama pai Abiata djawe go Ache wywy wembapewe Tapy tarã puare. ²⁵ Go ymachidja wachugi inama Sadocpe: Kowebu ra ga mondo arka wyradji djapopyre Apã Wachu llambatygi go tapy tãrãpe. Apã Wachu chope maĩmbu cho djewywerã wyche wyradji djapopyre Apã Wachu llambaty maĩwa dja endape. ²⁶ Idja inambu chope: Cho prawollãma djepe, idja ipope cho ĩ idja djapodjuebu djapowerã chope. ²⁷ Ymachidja Wachugi inama emi pai Sadocpe: Dje emi Abiatar dje tey o ga mondo go tapy tãrã Jerusalenpe pendje mirõgi dja tey wywydji, dje tey Ahimaasdji emi Abiatar tey Jonatandji. ²⁸ Cho rõ ĩwerã ka irõllã rupi go djawu chope pendje eru pewe. ²⁹ Sadoc emi Abiatar rama mondo Arca Apã Wachu djawu llambatygi Jerusalenpe; gope ĩma. ³⁰ David oma ita kuambuku Olivope. Ape rupi pychãeche emi chinga roma o dja tãrã pechepyre o achy buare, emi idja irõndy wywy tãrã pechepapyre wywy emi edji chinga roma o idja kuere rupi. ³¹ Davidpe kiubu Ahitofel idja peka chidja endawe mi Absalondji, pukama Apã Wachupe bue buchã Ahitofel rõ puare matambawã. ³² David wẽmbu go ita kuambuku akãpe go Apã Wachudji pukatype, wema djo idja chã ruwa Hasai arquita wywy irõndydjiwa idja tyru ochopapyre emi ywy idja tõndji o achy buare. ³³ David inama idjape: Dje ekõmbu cho rupi, chope dje rõ puy wachuwerã. ³⁴ Dje obu Jerusalenpe ina ga mondo Absalonpe: Ymachidja wachugi, cho rõ ĩwerã dje buatygirã. Cho bitawerã djedji dje llaporã, cho bitawe nonga dje Apãpe. Go nonga dje Abitofelpe mĩwerã krãmpĩwã. ³⁵ Gope ĩ pa'i Sadoc emi Abiatar.Go mirõngipe kiu ga mondo bue wywy dje wendupawegi ymachidja wachu tapype. ³⁶ Idja tey wywy ĩ gope: Ahimaas emi Jonatan. Go wywydji go ekõngabu chope bue wywy kiuwã wendupawegi. ³⁷ Husai, David irõeche, wẽma djo Jerusalenpe, go Absalon ikẽma djo tapy tarã djawãpe.