ሃፑክ 11 {ጴጥሮስ ሃናንዳካኦ ሁሉኬ ሃምካ ቶኦካ ውር ጊታይ ማር ይሁኔኑጝ ሜይሼያ እንግን} ¹ ሐዋርያታኔ ጪኒጌን ጊታይ ኣኔን ይሁዳዬ ውር ጊታይ ማር ይሁኔን ፕር [ጎሜ] ክያጃካ ባሪዮጝ ዋያ። ² ዬ ጴጥሮስ ከሹ እን ቱሌ ኢየሩሳሌሙጝ፤ ውርካ ይሁኔን ጊታይ ኣይኬ ውርካ ቆርኔኑጝ ዻብሺያ፤ ³ ሺጝ እያጝዻ፤ የሁሉኪ ሃምካ ውር ጊታይ ማሬ ቆሬኔ የኣሜንያይ ከእንግን? ⁴ ዬ ጴጥሮስ ሺጝ እያጜ ክያጃ እን ቦኬ ካርሲዬ ካርሲያ እንግን ሜይሼን፤ ⁵ ሃይወን ኦካ ከተማካ ኢዮጴዬ ሃጌይያ ሹካ ኬና ኣኔን ኦካ [ኦኬ ኣይኔን ቱዎጝ፤ ኦኬና ሙኔን ጫርቄ ታቺ፤ ከኦካ ኦ ኣሁራን ጎሜ ጎብሼ ኦይን ኣን ሃኣኔ ከፎላዬ ሃጌይያ፤ ⁶ ሃሁቤኔ ሃቶይ ዳቡጝዻያጝ፤ ዳቢ ጊታኬና ኣኔ ጃፍ ኣሁር፤ ዳቢካ ዱይ፣ ኦግታይ ሙኔ ጁጁሬን ከዳሊዬ ኩባር ጊታይ ዋርኬ ዾዮኬ ሃጌይያ። ⁷ ከሹ እን ሃዋይያ ናቅዲ ኬና ሺጝ ጴጥሮስ ዮ፤ ናሹጜ ኒቄ ቃውባ። ⁸ ኣንዻ ሃሺጚ ታቹጝ ዮ፤ ሃይጝያጝ ኣይኬን፤ ኣን ኦኬ ጋራ ጊታይ ወይ ኦታይ ማሬ ይሁሺኔን ክየምጵንዻ ሁሉክ ኦካ ቶግ ናኒዬ እባጅኬን። ⁹ ናቅዲ እንዻ እንቃ ሺጝ፤ እን ባሪዮ ሻሜ ጫንቃሉጝ እን ኦይኬ ኦኬ ጋራ ኮመኔ ሜይሼያ ኣን ከፎላ። ¹⁰ ሌሜያ እንካ ማክንሳዻ፤ ጩዋ ቦሼያ ፓይላ እያጝካ ፎላጝ። ¹¹ ከሰዓት እን ልኪ ውር ጅያን ከቂሳርያ ይዕሲሼ ዮጝ ናኒዬ ፓዬኔ ጎር ኦካ ቶኦ እን ኣን ሃኣኔ ሃፑክ ክያኒዬ፤ ¹² መንፈስ ቅዱስ ክየምጵንዻ [ካማር ወልውልዬኔ] ካካሜኬ እንግኑጝ ሜይሼያ ኣን። ጊታጝዻ ጪኒጌን ላ ፓያ ከኣን ፤ ሃሁሉክያ ቶኦካ ውር እንዻ። ¹³ እሺዻ ውርካ ኤርጎካ ባሪዮ ዾሬ ቶኦ ኔኒ ክያኒዬ ጌዬዬ ዋይሼ እሺ እያንዻ ሜይሼያ ኡዋው፤ ይዕሲሼ ውር እያጝካ ኢዮጴዬ ሺውሺሽባ እን ሺጜ ጴጥሮስ ስምዖን፤ ¹⁴ እሺዻ ሜይሼባ እኔ ውርካ ጶሮክ ኑኑዬ ክያጃ ኬና ከባይሽቴ። ¹⁵ ኣንዻ ካኒ ሃካርሲባ ሃሳውኔን መንፈስ ቅዱስ፤ ከሌሜን ከእያይ ጎብሼ ኡዋው ፓይላጝ ጎብሼያ እንግንዻ። ¹⁶ ከሹ እን ዮሐንስ ዱቅያ ከሙዋ፤ ዬ እየው የዱቅናባ ከመንፈስ ቅዱስ ሺጝ እያይኔ ክያጃ እን ታቺ እጝ ክያጆጝ ጌይሼያ ኣን ጶቅ። ¹⁷ ኣኪ ባሪዮ ከኢየሱስ ክርስቶስ ታቺ እን ሃኣምኒያያጝ ኣይን እን ጋዬ ኡዋው ሃኣያያ እንግንዻያጝ፤ ኣኪ፤ ከቻሊዬ ባሪዮ ሪቤን ኣን ሃኣይ ኒን? ¹⁸ ከሹ እን ዋዬ እንዻጝ ካይሲ ኦይንካ ክያጄዬ ሺጝ እያጜ ጎሺያ ባሪዮ፤ ይጝ ኣያያጝ፤ [ውር ጊታይ ማር ይኔን] ካፓይኔ ሃምካ ዻቆጝ ፤ ጌባሪዮ ኣያ እንግን ይሁኔን እያጝጌ። ¹⁹ ከክያጃ እን ናሹጝኬ ዋኬንካ ኢስጢፋኖስ ውርካ ይሁኔን ጊታይ ላልሜኑጝ ክያጃካ ባሪዮ ሜይሼ ውርካ ኣይሁድጵኔ ሌይ ፍንቄ፣ ላይ ቆጵሮሴ ሌይ ሻዋ ኣንጾኪያ። ²⁰ ዬ ውር ክየም ክየም ጊታይ ፓዬንኬ ቆጵሮሴ ከቀሬናዬ ፓይሼ እያጝካ ኣንጾኪያዬ ናንዳካ ግርክዻ ፓይላ ከሜይሼን ክያጃ ሹቃካ ኢየሱስ ታቺ እን ሜይሼያ እንግን። ²¹ ቡዋካ ታቺ እንዻ ኣኔንኬ እንግን፤ ውር ጊታይ ኮሜን ካሎን ኣይ ጁዋኑዻ ኣምኒዬ ዋክሼያ ታቺ። ²² ሃሳው ኔኒዻ ሄክሻ ሃምካ ናቡካ ውር ጊታይ ኣኔን ኦካ ቶኦካ ይሁኔን እን ኣኔን ኢየሩሳሌሙጝ፤ ውርካ ቶኦካ ይሁኔን እንዻ ይዕሲሼያ በርናባስ እያጝካ ኣንጾኪያጝ። ²³ እሺዻ ሄክሻ ሃሚኔ ባሪዮ እን ኣሽክዬ ከኣይኔኑጝ ከሹ እን ጌዮጝ ዋዝንዽያ፤ ፓይላ ካሎን ከሻን ከታቺ እን ኤርምኔን ካቁዋቅትሾጝ ክሊያ እንግን። ²⁴ እሺዻ ሃኬና ቆቁሼ መንፈስ ቅዱሴ እምነቴ ሃውር ሹቃ፤ ዛርሲ ጊታኬና ኮመን ኣይ ጁዋኑዻ ሌሜና ሃምካ ታቺ እን። ²⁵ ከኦይን ጩዋ በርናባስ ናንዳካ ሳውል ዎሼን ኩይሼያ እያጝካ ጠርሴሱጝ፤ ²⁶ ከሹ እን ጌዮጝ ቦኩኔያ ዮጝካ ኣንጾኪያጝ፤ እንግን ዻዋን ከቶኦካ ይሁኔን እን ኣኔን ኦይን ኣይን ቦን ክየም ፓሲ ጊርርሲያ ካሎን ዛርሲ ጁዋኑ፤ ውር ጊታይካ ዻይኔንዻ ከሹ እንካ ሌሜን ከኦካ ኣንጾኪያ ሺጝ ውርካ ይሁኔኔ ሺዋ። ²⁷ ከሹ እን ውርካ ቶካ ባሪዮ ክየም ክየም ከኢየሩሳሌም ጎብሼያ እያጝካ ኣንጾኪያጝ፤ ²⁸ ከኦግዬይዻ ክየም እን ሺጜ ኣጋቦስ ናሹጜ ከፔን ፓይላ ኣዬ ካሽ ታቹጝ መንፈስ ቅዱስ ሜይሼ እሺዬ ኪያጃ፤ ይንዻ ከቦንካ ቄሳር ቀላውዴዎስ ሙኔና። ²⁹ ውር ጊታይካ ዻይኔንዻ ክየም ክየም እን [ካንታ] ጊታዬይ ቻሊዮጝ ቡሌ ጪኒጌን ጊታይ ጊዬይ ቆቤን ይሁዳ ኬልሺዬን ቱምያ፤ ³⁰ ኬልሾ እንዻ ከቡዋካ በርናባሴ ሳውሌ ከሃምካ ውር ጌጵሹጋን ይዕሲሼን፤ ሻማ እኑጝ።