1 ¹ ከክያጃካ ባሪዮ ካኣይ ሐዋርያካ ኢየሱስ ክርስቶሴ ከጳውሎስ እን ሺዎጝ፣ ከጪኔ ጉዋዩ ሶስቴንስ፤ ² ከቶኦካ ይሁኔንካ ባሪዮ እን ኣኔን ቆሮንቶሱጝ፤ ይሁሼንኬ ኢየሱስ ክርስቶሴ፣ ከእን ኣይ ታቺ ጊዬይዬ ታቺ ጉዋዩዬ ከጊታይ ኣኔን ኦጉዋይካ ራቅ ጊዬይ ሺወን ሮጝካ ኢየሱስ ክርስቶስ ታቺ እን ጉዋዩ ፓይላ ከጊታይካ ኣይ ውርካ ይሁኔኔ ሺዎጝ፤ ³ ከባሪዮ ከሹቡጌን ጉዋዩ፣ ከታቺ እንዻ ከኢየሱስ ክርስቶስ ኣይኔኔ ሹቃዬ ካኣይሼ እየው። {ጎሺ} ⁴ ከኢየሱስ ክርስቶስ ናንዳካ ኣይኔን እን ጋዬ እየውጝ ሹ ጮል ናንዳካ እየው ሃጎሺባ ባሪዮ። ⁵ ናንዳካ ኦ ከኦኬ ጉዩ ፓይላ ይንዻ ከሃሳዋ ፓይላ፣ ከኦኬ እባጄንዻ ፓይላ የሳጊያያ ከእሺ፤ ⁶ ናንዳካ ክርስቶስ እን ሃሜይሼ እየውዻ ኣኔባ ኦጉዩ። ⁷ ዬ ዹዋልሺኔንካ ኢየሱስ ክርስቶስ ታቺ እን ጉዋዩጝ የኣኒናባ ከፎሽካዺዬን ካሊዬኔ፣ ኣይኔንካ መንፈስ ክየምጵንዻ ጆግሼኬን እየው። ⁸ ከሹካ ኢየሱስ ክርስቶስ ታቺ እን ጉዋዩጝ የኣንቴኬን ዻብሾዬ ከጌይንቶጝ እሺ ሌይ ሃምካ ቱንሱጝ ሻም ጫንቃሌ [ዻው] እየውባ። ⁹ ሃምካ ውዋጝ፣ ባሪዮ እን ሺውሼ እየው ሃምካ ኢየሱስ ክርስቶ ታቺ እን ጉዋዩጝ ሃኬና ጌርምኔ። {ላልሚኔን እን ቱል ኦካ ቶኦካ ይሁኔንካ ውርካ ቆሮንቶሱጝ} ¹⁰ ጪኒጌን ናኒ ዮ፤ ላልሚኔን ካማር ኦካ ጫቃን ጉዩ ኣኔን፣ ሻን ክየም፣ ቃቦ ክየም ካኣኒኔ ኦጉዩጝ፤ ከዋይሺንቴ ጋጙጝ ከሮጝካ ኢየሱስ ክርስቶስ ታቺ እን ጉዋዩጝ ሃይወን እየውባ። ¹¹ ጪኒጌን ናኒ ዮ፤ ኦካ ጫቃን ጉዩ ኣኔ ዜርማጝ ሃዋይያ ከኦካ ውርካ ጶሮካ ቀሎዔ፤ ¹² ክያጃ እንዻ ሃእያጝ፤ ከኦጉዩ ክየም ሺጝ፣ ኣን ሃኣይካ ጳውሎስያጝ፣ ኑዋ ሺጝ ኣን ሃኣይካ ኣጵሎስ፤ ፕርዻ ክየም ሺጝ ኣን ሃኣይካ ኬፍያጝ፣ ኑዋ ፕር ሺጝ ኣን ሃኣይካ ክርስቶስ። ¹³ ኣይባዬ ክርስቶስ ካሺያይ? ኤጳውሎስካ ጻጵያይ ናንዳካ እየው? ሞ ዱቅያ እየው ከሮጝካ ጳውሎስ? ¹⁴ ከኦካ ቀርስጶሴ ከኦካ ጋይዮሴ እንቃ ከኦጉዩ ውር ክየምጵንዻ ናንዳካ እን ማሬ ዱቅዬን ሃጎሺባ ባሪዮ፤ ¹⁵ ዬ ከዱቅህንቴኬ ሮጝ ናኑጝ ውር ክየምጵንዻ ኬና ሃሳው ኣኔኬን። ¹⁶ ከኣኩሉክ ሃዱቅያ ውርካ ጶሮካ እስጢፋኖስ፤ ዬ ከኦግዬይ እንቃ ሃዱቅዮጝ ጌይኬን ኦናኒ ጶቅ። ¹⁷ ክርስቶስ ይዕሲዬ ኣን ካሜይሼ ውር ክያጃ ሹቃዬ ጊያ ዬ ማር እንካ ዱቅኔዬን፤ ጻጵኔንካ ክርስቶስዻ ማሬ ማም እያይ ኣዬኑጝ፣ ሃሜይሼኬን ውር ከሃሳዋካ ፓካልማሞካ ውር። {ክርስቶስ ሃቁዋቅቲካ ባሪዮዬ ፓካልማሞዬ} ¹⁸ ክያጃካ ጻጵኔን ናንዳካ እንካ [ጌርሺኖጝ] ሃሞኚነት፤ ዬ ናንዳካ ኡዋው ሃኦ? ሃቁዋቅቲካ ባሪዮ፤ ¹⁹ ሺጝ እያጜ ቶኳዬ፤ «ሃካይሲባ ፓካልማሞካ ፓካላን፤ ሃሻሚባ ኦኬ እባጄንካ ውር ጊታይ እባጅ ኦኬ ማም እያይ። ²⁰ ፓካልማሞ ኣኔን ኦን? ጌጳሞካ ኣኔን ኦን? ባሪዮ ካኒ ሻምኬ ፓካልማሞካ ፔኑጝ ሞኛሞ? ²¹ እን ናሹጝኬ ፓካልማሞካ ባሪዮጝ ፔኑጝ ከፓካልማሞ ኔኒ ናንዳካጝ ካውሺኔ ባሪዮ እባጄኑጝ፣ ከሞኛሞካ ውር ሜይሼን ካጝ ኣምኒ ካባይሺሾጝ ማቲያ ክያጃ ሹቃካ ባሪዮ። ²² ኣይን ኦኑጝ ውርካ አይሁድ ዎሽ ዹዋልሺኔን ሹቃሹቃ ጊታይ፤ ውርካ ግሪክዻ ዎሽ ፓካልማሞ፤ ²³ ዬ ኡዋው ሃሜይቴባ ውር ክርስቶስ እን ጻጵዮጝ፤ ይንዻ ናንዳካ አይሁድ ሃካቲሚኔን፣ ፕር ናንዳካ ኣሕዛብ ሃሞኚነት። ²⁴ ዬ ናንዳካ ጊታይ ባሪዮ ሺዎጝ፣ ኣይኒን ውርካ ኣይሁዱጝ ኣይኒን ውርካ ግሪኩጝ፣ ክርስቶስ ሃቁዋቅትካ ባሪዮ፣ ሃፓካልማሞካ ባሪዮ። ²⁵ ናንዳካ ኦ ከኦካ ፓካልማሞካ ውር ሳጊ ሞኛሞካ ባሪዮ ሳጊባ፣ ከኦካ ቁዋቅቲካ ውርዻ ሳጊ ዻቾካ ባሪዮ ቁዋቅትሽባ። ²⁶ ጪኒጌን ናኒዮ፤ ከሹ እን ሺወ እየው የኣይቴ ኦጝ ይንዳ ቃቢዬ፤ ከኦኬ ኣሽክዬንካ ውር ከኦጉዩ ጁዋናን ጉዩ የካኔ ኣያኬን ጊታይ እባጂ ኦኮጝ፤ ጁዋናን ጉዩ የካኔ ኣያኬን ቁዋቃን፤ ጁዋናን ጉዩ ካኒ ጅሽኬን ከኦካ ውርካ ጶሮክ ታቺ። ²⁷ ኣይባዬ ባሪዮ ካቦኩንሲ ፓካላኔ እድያ ኦኬ ሞኚካ ፔን፤ ባሪዮ ካቦኩንሲ ቁዋቃኔ እድያ ኦኬ ዻቹጉካ ፔን። ²⁸ እን ጎቢዮጝ ካማር ኣኔኔ ባሪዮ ካሻሞጝ፤ ከኦካ ፔኑጝ ኦይን ኣይ ይርኬ ቦውዬዬ፣ እድያ ኦይን ማሬ ራቅዻ ኣዬኑጝ፤ ²⁹ ይንዻ ውር ክየም ካማር ኦካ ሌሜን ኔኒ ቃይዬኔ ጊያ። ³⁰ ከኢየሱስ ክርስቶን ኣዬን የማቲቶጝ ሃእን ናሹጝኬ እሹጝ፤ እሺ ከታካ ባሪዮ ማቲያ ፓካልማሞ ጉዋዩ፣ ጫንቃል ኣዬን ጉዋዩዬ ይሁኔን ጉዋዩዬ፣ [ቤዛ ጉዋዩዻ]። ³¹ ኣኪ