9 ¹ أقول الصدق بالمسيح، ما أكذبش، وضميري شاهد لي بالروح القدس، ² أنا فيبي زعل زيادة، وبقلبي ألم ما ينقطعش: ³ كنتو أتمني لو أكون انا نفسي محروم من المسيح في سبيل إخواني ، بني جنسي حسب الجسد. ⁴ فهم بني إسرائيل، والله جعلهم أولاده ، وأظهر لهم جلاله، وجاب لهم العهود والشريعة والعبادة والوعود. ⁵ وهم نسل الآباء الأولين، وكمان العائلة البشرية اللي ولد فيبها المسيح،اللي هو الله المُعظم فوق الكل، له الحمد الى الأبد . آمين ⁶ هذا ما يعنيش انُه الله ما حفظش وعده ، مش كل بني إسرائيل هم شعب الله بحق، ⁷ ولا كل نسل إبراهيم هم أولاده بحق ، إنما قال الله لإبراهيم :" عن طريق إسحاق يكون نسلك." ⁸ هذا يعني أنو أولاد الجسد مش هم أولاد الله ، إنما أولاد الوعد يحسبون نسل. ⁹ فهذي هي كلمة الوعد : " شارجع بالوقت المحدد، وشيكون لسارة ابن."

¹⁰ مش كذا بس ، ورفقة كمان، قاحلبت من رجّال واحد، من إسحاق أبينا، ¹¹ لكن قبل ما يولدوا ،وقبل أنو يعملوا خير او شر، وعلشان تُنفذ خطة الله بالإختيار ، لأنه يختار الناس مش على أساس اعمالهم إنما بدعوة منهُ، ¹² قال الله لرفقة إنو الكبير شيكون خادم للصغير. ¹³ وقال كمان بكتابه : " أحببت يعقوب وكرهت عيسو."

¹⁴ فأيش يعني هذا ؟ هل الله ظالم؟ لا ، هو منزه من هذا! ¹⁵ قا قال لموسى: " إنا أرحم من أرحمه ، وأشفق على من أشفق علوه !" ¹⁶ فالاختيار إذن يعتمد على رحمة الله، مش على رغبة الإنسان او مجهوده. ¹⁷ وقد قال الله بالكتاب لفرعون: " انا قيمتك علشان تظهر قوتي عن طريقك، وعلشان يكلم الناس باسمي بكل العالم ." ¹⁸ فالله يرحم من يشاء ، ويقسي على من يشاء.

¹⁹ هنا شتقول لي : " ليش يلومنا الله ؟ ومنو يقدر انو يقاوم مشيئته ؟" ²⁰ فأجيبك : منو انت يا إنسان علشان ترد على الله ؟ هل يعترض الله الوعاء على صانعه ويقول : " ليش صنعتنا بهذي الطريقة؟" ²¹ مش من حق الفخاري أنو يعمل ما يشتي بالطين ، فيعمل من نفس القطعة وعاء للإستعمال الرفيع وثاني للإستعمال الوضيع ؟ ²² وهذا هو نفس الشيء اللي عمله الله : أنه كان يشتي يظهر غضبه ويعلن قوته ، فا اتحمل بكل صبر الناس اللي غضب عليهم ، اللي هم بالطريق للهلاك. ²³ وهذا بقصد انو يعلن غنى مجده بأوعية الرحمة اللي سبق فأعدها للمجد، ²⁴ فهو دعينا ، مش من بين اليهود وحدهم ، إنما كمان من بين الشعوب الأخرى. ²⁵ مثلما قال بكتاب هوشع:" اللي ما كانوش شعبي أدعوهم شعبي ، واللي ما كانتش محبوبة أدعوها محبوبة، ²⁶ وبنفس المكان اللي قال لله لهم فيبه : " أنتم مش شعبي ، هناك يدعون أبناء الله الحي . " ²⁷ وإشعياء يصيح بشأن بني إسرائيل ويقول : " حتى واذا كان بنو إسرائيل كثيرين زيادة مثل رمل البحر ، مشبقيش منهم إلا عدد قليل فقط ينجو. ²⁸ لأن الله يُنفذ حكمه على العالم ، فوراً وبصفة نهائية . " ²⁹ مثلما قال إشعياء كمان قبل كذا: " لو كانش الله القدير حفظ لنا نسلاً ، لكنا مثل سدوم ، ورجعنا مثل عمُورة. " ³⁰ فأيش هي خلاصة القول؟ إن الأمم اللي ما كانوش يجروا بعد البر ، قاوصلوا البر ، بس هو البر القائم على أساس الإيمان . ³¹ إما إسرائيل، وقد كانوا يجروا بعد شريعة توصل الى البر ، بس هم فشلوا في العمل بالشريعة. ³² ليش؟ لأنهم أتكلوا على الأعمال بدل من الإيمان. فاصطدموا بحجر يجعلهم يتعثروا، ³³ مثلمايقول الكتاب: " انتبهوا !أنا اضع بالقدس حجري يخلي الناس يعثروا، وصخرة تخليهم يفلتوا ، واللي ما يؤمن به ما يستحيش."