10 ¹ يا إخواني، كم أنا مشتاق من قلبي، وأصلي عشان بنو إسرائيل ينجوا. ² فأنا أشهد لهم عند الله إن معاهم غيرة لله، ولكن غيرة بدون معرفة. ³ فهم ما عرفوش طريقة الله اللي يحسب فيبه الإنسان صالح عنده، فحاولوا تكون لهم طريقتهم الخاصة ، بس ما خضعوش لطريقة الله. ⁴ فهدف الشريعة هو المسيح، فأي واحد يؤمن بالمسيح الله يعتبره صالح.

⁵ أما الصلاح اللي يجي من الشريعة، فقال موسى: "اللي شيعمل بهذا الحاجات شيحي بهن." ⁶ أما الصلاح اللي يجي من الإيمان، فقال موسى: "ما تقولش بقلبك منوه يطلع للسماء؟" عشان ينزل المسيح من السماء. ⁷ وما تقولش: منوه شينزل لبين الأموات؟عشان المسيح يقوم من بين الأموات. ⁸ ومكتوب بالكتاب كمان: "الكلمة قريبة منك بشفتيك وبقلبك." وهذا كلمة الإيمان اللي نبشر فيبه: ⁹ إنك تشهد بشفتيك وتقول: "إن يسوع هو رب، وتؤمن بقلبك أن الله أقامه من بين الأموات وبهذا أنت تنجو. ¹⁰ لإن الإيمان بالقلب يجيب الصلاح، والاعتراف بالفم يؤكد الخلاص، ¹¹ فالكتاب يقول: "أي واحد مؤمن فيبه ما يستحيش." ¹² وما فيش فرق بين اليهودي وغير اليهودي، لأن كُلهم معاهم رب واحد، وهو غني يجيب لكل واحد يدعوه. ¹³ والكتاب يقول: "أي واحد يدعوا الله ينجو." ¹⁴ بس كيف يدعوه إلا لو آمنوا فيبه؟ وكيف شأمنوا فيبه إلا لو سمعوا عنه؟ وكيف شأسمعوا عنه إلا لو واحد جاء لعندهم وبشرهم؟ ¹⁵ وكيف شيبشرهم إلا لو رسله الله لعندهم؟ والكتاب يقول: "ما أحسن اللي يجيبوا لنا البشرى."

¹⁶ ومش كُلهم صدقوا الإنجيل. فإشعياء يقول: "يا رب، منوه صدق رسالتي؟" ¹⁷ فالإيمان يجي من سماع الرسالة، والرسالة هي الكلمة اللي تكلمنا عن المسيح.

¹⁸ وأنا أقول: هُم ما سمعوش؟ لا سمعوا. فالكتاب يقول: "كُل العالم سمع اصواتهم، وكلامهم وصل لكُل العالم." ¹⁹ ومرة ثانيه أقول:هُم بني إسرائيل ما فهموش؟ لا فهموا. فموسى يقول بالأول بقول الله: "بأخليكم تغارون، لأني شأستخدم شعب بدون هوية. وشأغضبكم، لأني شأشتخدم شعب جاهل." ²⁰ وإشعياء يتجراء ويقول: "اللي ما طلبوني حصلوني، وأظهرت نفسي للي ما سألوش عليا." ²¹ وقال عن إسرائيل: "طول اليوم مددت يدي لشعب عاصي وعنيد."