6 ¹ إذن ايش نقول؟ هل نستمر بعمل المعصية علشان تتواجد النعمة ؟ ² لا سمح الله! إحنا اللي متنا بالنسبة للمعصية، فكيف نعيش بعد كذا بها؟ ³ ما تعرفوش انُه إحنا كلنا أتعمدنا علشان نتحد بالمسيح، اتعمدنا علشان نشترك معه بموته؟ ⁴ وبسبب هذا اندفنا معه بالمعمودية للموت، مثلما اقُيم المسيح من الأموات بمجد الأب ، كمان إحنا نمشي بحياة جديدة .

⁵ ومادمنا قا اتحدنا بُه بموت يشبه موته،فكمان شنتحد به بقيامته. ⁶ فإحنا نعرف هذا: أنُو ابن الإنسان صاحب الطبيعة القديمة اللي هو فينا قا صُلب معه علشان يبطل جسد المعصية فما نبقيش عبيد للمعصية فيما بعد. ⁷ فاللي مات قا تحرر من المعصية. ⁸ ومادام احنا متنا مع المسيح ، فإحنا نؤمن كمان اننا شنحي معه ، ⁹ لأننا على يقين بإنو المسيح ، وقاقام من بين الأموات، ماشيموتش مرة ثاني،لانه الموت مالوش سيادة علوه بعد . ¹⁰ لأنه بموته، قا مات علشان الخطيئة مرة واحدة، وبحياته، يحيا الله . ¹¹ وكذلك انتم كمان ،أعتبروا انفسكم أموات بالنسبة للمعصية وأحياء لله في المسيح يسوع .

¹² لهذا لا تسمحوش للمعصية إنو تتحكم بجسدكم الميت، فتتقادوا لشهواته. ¹³ ولاتقدموش أعضاء جسمكم للمعصية أسلحة للإثم ، إنما قدموا انفسكم لله بإعتبار أنكم الآن أحياء من الموت . وقدموا اعضاء جسمكم لهُ، أسلحة لعمل البر. ¹⁴ فما بيكونش للمعصية سيادة عليكم ، لأنكم انتم مش خاضعين للشريعة انما للنعمة . ¹⁵ فأيش أذن؟ هل نعمل المعصية لأننا ما نخضعش للشريعة بل للنعمة؟ لا سمح الله! ¹⁶ ما تدروش انكم لما تقدموا أنفسكم عبيد للطاعة، تكونوا للي تطيعونه عبيد : إما للمعصية فإلى الموت ، وإما للطاعة فإلى البر ؟ ¹⁷ إنما الشكر لله ، لانكم كنتم عبيد للمعصية بس اطعتم من القلب صيغة التعليم اللي أطرحتم بعهدته . ¹⁸ والآن ، إذا تحررتم من المعصية ، أصبحتم عبيد للبر . ¹⁹ انا أستخدم هنا تعبيرات بشرية لأننا عارف ضعفكم البشري. فأنتم زمان قدمتم أعضاء جسمكم مثل العبيد للنجاسة والشر المتزايد، فالآن لازم تقدمونها مثل العبيد للطهارة والبر . ²⁰ لأنكم لما كنتم عبيد للمعصية، كنتم أحرار من البر. ²¹ بس أي ربح ربحتموه من الأموراللي تخجلوا بها الآن، ولا عقوبتها إلا الموت. ²² أما الآن، وقا أتحررتم من المعصية وأصبحتم عبيد لله، والنتيجة هي الحياة الصالحة ، وبعدين حياة الخلود . ²³ لأن الأجر حق المعصية هي الموت ، أما الهدية اللي يجيبها الله هي حياة الخلود عن طريق المسيح يسوع ربنا .