5 ¹ لما آمنا بالله حصلنا سلام معه بربنا يسوع المسيح. ² وبفضلُه كمان دخلنا بالإيمان لهذه النعمة اللي نِحنا عايشين فيبه الآن،وفرحين لإنُه عندنا أمل إنُه نشارك بمجد الله، ³ نفرح حتى ونحنا بين المشاكل،لإنُه من الضيق والشدة نتعلم الصبر، ⁴ والصبر يُخلينحنا ننتصر على المشاكل،والإنتصار يجيب لنا الأمل ، ⁵ وأملنا ما يخيبش،لإنُ الله سكب محبتُه بقلوبنا بالروح القُدس اللي جابه لنا.

⁶ بوقت ما كِنا عاجزين،مات المسيح عشان المُذنبين بالوقت اللي حدده الله. ⁷ صعب إنُه واحد يُضحي بنفسُه ويموت من شان شخص طيب، إحتمال يُسَابِـل واحد عشان شخص طيب كثير. ⁸ لكن الله أثبت لنا محبتُه، ونحنا عادنحنا مُذنبين ، مات المسيح من شاننا.

⁹ مادام الله اعتبرنحنا صالحين بواسطة دم يسوع المسيح اللي ضحي فيبُه من شاننا،فنِحنا أكيد شننجي من غضب الله بواسطة المسيح. ¹⁰ كِنا أعداء لله، واصطلحنا معه بموت ابنه من شاننا، فأكيد بعد ما اصطلحنا شننجي بواسطة حياته! ¹¹ وأكثر من كِذا نفرح بالله،بفضل ربنا يسوع المسيح اللي صالحنا معه. ¹² أجاءت الخطيئة للعالم على يد إنسان واحد، وجابت الخطيئة معها الموت،عشان كِذا وجب الموت على كل البشرلإنُه كلهم مُذنبين.

¹³ فالخطيئة كانت مُنتشر بالعالم من قبل ما تجي توراة موسى،لكن ماكنش تُحسب على الناس لإنُه مافيش توراة. ¹⁴ رغم كِذا ،سيطرالموت على الناس من عهد آدم لاعهد موسى، حِتى اللي ماعملوش ذنب مثل ذنب آدم.وآدم كان إشارة للمسيح اللي بيجي بعده .

¹⁵ لكن هدية الله تختلف على خطيئة آدم.إذا كانوا الناس كلهم ماتوا بسبب ذنب إنسان واحد،فالأولى إنُ تزيد عليهم نعمة الله والهدية المجانية بواسطة إنسان واحد هو يسوع المسيح. ¹⁶ في فرق بالنتيجة بين هدية الله وبين خطيئة إنسان واحد. ذنب إنسان واحد قاد البشر للهلاك،لكن النعمة جابت لهم الصلاح حتى بعد ماعملوا كثير من الذنوب. ¹⁷ خطيئة إنسان واحد خلت الموت يُسيطر على البشربسبب آذاك الواحد.لكن الآن اللي يحصلوا نعمة الله وهدية الصلاح ،أكيد بيملكوا بالحياة الأبدية بواسطة يسوع المسيح الواحد.

¹⁸ مثلما إنُ خطيئة إنسان واحد قادت البشر كلهم للهلاك،برضو صلاح إنسان واحد جاب الصلاح والحياة لكل البشر. ¹⁹ ومثلما إنُه بمعصية إنسان واحد خلي كل البشر مُذنبين،برضو بطاعة إنسان واحد يرجعو كلهم صالحين .

²⁰ أجاءت التوراة وكثرت المعاصي،لكن كُلما كَثرت معاصي الناس ، تزيد نعمة الله اكثر. ²¹ مثلما الخطيئة سيطرت وجابت الموت،برضو النعمة تُسيطر عن طريق الصلاح، وتوصلنا للحياة الأبدية بواسطة ربنا يسوع المسيح.