15 ¹ ولما طلع الصُبح ، اتفقوا رؤساء الكهنة والشيوخ وكتبة التوراة والمجلس الأعلى كُله ، وقيدوا يسوع ، واخذوه وسلموه لعند بيلاطس . ² فقله بيلاطس: "أنت ملك اليهود؟" فجاوبه: "أنت تقول." ³ وأتهمه رؤساء الكهنة بتهم كثيرة . ⁴ فسأله بيلاطس: "مله جاوب بشيء؟ شوف كم ياتُهم يشهدوها علوك!" ⁵ أما يسوع ولا جاوب بشيء ، لما أستغرب بيلاطس . ⁶ وكان بيلاطس عادته بالعيد يُفك لهم واحد محبوس يشتُنه . ⁷ وكان في رجال اسمه باراباس محبوس مع اصحابه اللي قتلوا وقت المشاكل . ⁸ فراحوا الناس لعند بيلاطس وطلبوا مُنه يفعلهم حسب عادته . ⁹ فكلمهم بيلاطس: "تشتوا مني افك لكم ملك اليهود؟" ¹⁰ لأنه داري إن رؤساء الكهنة سلموا لعنده يسوع لحسدهم . ¹¹ بس رؤساء الكهنة علموا الشعب يقولوا نشتي تخرج لنا باراباس . ¹² فرجع بيلاطس وقلهم: "إيش أسوي باللي تُسموه ملك اليهود؟" ¹³ فصيحوا: "إصلبه!" ¹⁴ فقلهم بيلاطس: "ليش؟ إيش الذنب اللي فعله؟" فصيحوا بصوت قوي: "إصلبه!" ¹⁵ لإنو بيلاطس كأن يشتي يرضي الشعب ، فخرج باراباس ، وجلد يسوع وبعدين سلمه عشان يصلب . ¹⁶ فاخذ العسكر يسوع لداخل قصر الولاية ، وجمعوا عسكر الكتيبة كُلهم . ¹⁷ ولبسوه رداء أرجواني ، وضفروا تاج من الشوك وطرحوه على رأسُه . ¹⁸ وقاموا يسلموا علوه ويقولوا له: "السلام ياملك اليهود!" ¹⁹ وكانوا يضربوا رأسه بعصا ، ويتفلوا لفوقه ، ويركعوا على ركبهم ويسجدوا له . ²⁰ وبعدما استهزأو به ، خلعوا من فوقه الرداء الأرجواني ، ولبسوه ثيابه ، واخذوه للخارج عشان يصلبوه . ²¹ وكان سمعان القيرواني ، أبو إسكندر وروفا ، بالطريق راجع من الوادي ، فغصبوه يتحمل صليب يسوع . ²² واخذوا يسوع لمكان اسمه جُلجثة ، يعني مكان الجُمجُمة . ²³ وجابوا له خمر مخلط بمر ، وهو ما رضيش يشرب . ²⁴ وبعدما صلبوه ، وزعوا ثيابه بينهم بالقرعة ، عشان يعرفوا إيش كل واحد منهم شيحصل . ²⁵ والساعة كانت تسع الصبح لما صلبوه . ²⁶ وكتبوا ورقة بتهمته: "ملك اليهود."

²⁷ وصلبوا معه اثنان سرق ، واحد باليمين والثاني باليسار . ²⁸ فحصل الكلام المكتوب اللي يقول: "حُسب مع المجرمين." ²⁹ والناس اللي كانوا يمشوا من هناك يسبوا له ويهزوا رؤسهم ويقولوا له: "يا اللي باتهدم الهيكل وتبنه بثلاث أيام! ³⁰ خارج نفسك ، وانزل من فوق الصليب!" ³¹ وحتى رؤساء الكهنة وكتبة التوراة كانوا يستهزأو فيبه ويتكلموا بينهم بين: "أنقذ غيره وماقدرش ينقذ نفسه ، ³² خلوه ينزل ذلحين من فوق الصليب ، هذا المسيح ملك إسرائيل ، فنشوفه ونصدقه!" واثنان السرق المصلوبين معه كانوا يشتموه . ³³ ووقت الظهر ، غطي الظلام كل الأرض للساعة ثلاث العصر . ³⁴ والساعة ثلاث ، صرخ يسوع بصوت قوي: "ألوي ، ألوي ، ليش شبقتني؟" وتعني: "إلهي ، إلهي ، ليش فلتني؟" ³⁵ فسمعوا اللي كانوا موجودين هناك وقالوا: "هوذا يدعي للنبي إيليا." ³⁶ فجري واحد لعنده ، وملأ إسفنجة بالخل ، وطرحه براس العصا ، ورفعه لعنده عشان يشرب وهو يتكلم: "خلوه! لنشوف إيلياء بيجي ينزله." ³⁷ وصرخ يسوع بصوت قوي ومات . ³⁸ فأنشقت الستارة الموجودة بالهيكل لأثنان أقسام من فوق لتح ³⁹ ولما شاف الضابط قائد الحرس اللي كان واقف مُقابله ، كيف مات ، قال: "من صدق الرجال هذا كان ابن الله."

⁴⁰ وكان في نسوان كثير يشوفن من بعيد منهن مريم المجدلية ، ومريم أم يعقوب الصغير ويُوسي وسالومة . ⁴¹ هاذن كانن يتبعنه ويخدمنه لما كان بالجليل ، وفي كثير منهن كانن قد مشن معه للقدس . ⁴² وكان هذا وقت التجهيز ، اليوم اللي قبل السبت ، ولما جاء الليل ، ⁴³ جاء يوسف الرامي ، اللي هو عضو كبير بالمجلس الأعلى ، ومن اللي هم منتظرين ملكوت الله ، فدخل بشجاعة لعند بيلاطس ، وطلب منه جُثة يسوع . ⁴⁴ وأستغرب بيلاطس كيف مات بهذا السرعة ، ودعي قائد الحرس وسأله: "له فترة من وقت موته؟" كم له من وقت موته" ⁴⁵ ولما عرف من قائد الحرس ، سمح ليوسف بالجثة . ⁴⁶ فاشترى يُوسف كفن من الكتان وكفنه فيبه ، وطرحه بقبر كان منحوت داخل صخرة ، وغطي باب القبر بحجر . ⁴⁷ وشأفت مريم المجدلية و مريم أم يُوسي أينه قبره .