16 ¹ ولما كمل يوم السبت ، اشترت مريم المجدلية و مريم أم يعقوب وسالومة ، عطور عشان يروحن يعطرنه . ² ويوم الأحد ، راحن للقبر بدري مع طلوع الشمس . ³ وكانن يتكلمن بينهن بين: "منه اللي شيبعد لنا الحجر من باب القبر؟" ⁴ ولما شافن ، ابصرن الحجر مش موجود قده مبعود مع إنو كان كبير جداً . ⁵ ودخلن للقبر ، وأبصرن بالجهة اليمين واحد شباب جالس ، ولابس ثوب أبيض ، فخافن . ⁶ فقلهن: "ما تخافنش! أنتن تدورن يسوع الناصري اللي صُلب ، ما عادش موجود هنا ، قد قام! شوفن! هذا المكان اللي كان مقبور فيبه . ⁷ روحن وكلمن تلاميذه وبطرس: إنُه شيسبقكم للجليل . وهناك باتشوفه مثلما قلكم." ⁸ فخرجن سريع وهربن من القبر وهن خائفات ومستغربات . وما كلمنش واحد بشيء لإنهن خائفات . ⁹ وبعدما قام يسوع مُبكر بأول يوم من الأسبوع ، ظهر لمريم المجدلية اللي كان خَرج من فيبه سبعه شياطين . ¹⁰ فراحت وكلمت اصحابه ، وكانوا ينوحُوا ويبكوا . ¹¹ ولما سمعوا أنهُ حي وإنو شفته ، ما صدقوش . ¹² وبعدا ظهر يسوع بنفسه بشكل ثاني لأثنين من أصحابه كانوا بطريقهم للقرية . ¹³ فمشوا وكلموا الباقيين ، بس هم ما صدقوش . ¹⁴ وبالأخير ظهر للأحد عشر تلميذ وهم كانوا جالسين ، و صيح عليهم لإنهم مافيش معاهم إيمان وقلوبهم قاسية ، لإنهم ما صدقوش اللي شافوه بعد قومته . ¹⁵ وقلهم: "اِمشوا للعالم كُله ، وبشروا الناس كُلهم بالإنجيل . ¹⁶ من يُومن ويتعمد ينجي ، واللي ما يؤمنش يهلك . ¹⁷ وهذا المعجزات تتبع المؤمنين: يخرجوا الشياطين باسمي ويتكلموا بلغات جديدة ، ¹⁸ ويمسكوا الحيات بيداتهم ، ولو شربوا سم قاتل ما يقعش بهم حاجه ، ويطرحوا ايديهم على المريضين فيشفوا. ¹⁹ وبعدما كلمهم الرب يسوع ، ارتفع للسماء ، وجلس جنب يمين الله . ²⁰ وبعدا اصحابه مشوا يبشروا بالإنجيل بكل مكان ، والمسيح يعمل معاهم ، ويثبت الكلمة بالمعجزات التابعه .