1 ¹ من بولس رسول يسوع المسيح بمشيئة الله، إلى شعب المقدس ، والمؤمنيين بيسوع المسيح بمدينة أفسس،

² لكم النعمة والسلام من الله أبونا والرب يسوع المسيح. ³ تبارك الله ،أبو ربنا يسوع المسيح،اللي باركنحنا بواسطة المسيح بكل بركة روحية بالسماء. ⁴ قبل ما يخلق العالم، اختارنحنا بواسطة يسوع المسيح،عشان نكون مقدسين وطاهرين بنظره. ⁵ وبمحبته قرر مقدماً إنه نكون أولاده بالتبني بيسوع المسيح ، بحسب مشيئته الصالحة وقصده، ⁶ عشان نسبحه على نعمته المجيدة اللي جابه لنا بواسطة ابنه المحبوب. ⁷ فالمسيح فدانحنا بدمه وغفر ذنوبنا،هذه هي نعمة الله الغنية. ⁸ اللي خليها تفيض علينا بسخاء،وهو بكامل حكمته وفهمه، ⁹ وعرفنحنا الله مشيئته اللي كانت من قبل سرّ،وهذا يتوافق مع فرحه اللي قصد انه يظهره لنا بالمسيح . ¹⁰ وهذا المخطط اللي بيحصل بالوقت المناسب،يجمع كل شيء تحت رئاسة المسيح، الأشياء اللي بالسماء واللي بالأرض. ¹¹ وبواسطة المسيح الله إختارنحنا مقدماً من شان نكون شعبه،فهو يعمل كل شيء بحسب مشيئته وحكمته. ¹² فاختارنا نحنا أول من طرحنا أملنا بالمسيح،عشان نُسبح بجلاله. ¹³ وانتم كمان لما سمعتم رسالة الله الحقيقية، اللي هو الإنجيل فيبه نجاتكم،وأمنتم بالمسيح،وبواسطة المسيح طرح الله ختمه عليكم،وجاب لكم الروح القدس اللي وعد فيبه. ¹⁴ فالروح القدس هو العربون الذي يضمن إننا شنحصُل على نصيبنا من بركات الله،لما يفتدي الله شعبه كله،ونسبح بجلاله. ¹⁵ من لما سمعتُ إنكم آمنتم بالرب يسوع، وانكم تحبوا كل المؤمنيين. ¹⁶ ما توقفتوش على شكر الله من شانكم واذكركم بصلواتي، ¹⁷ و اطلب انه أبونا المجيد إله ربنا يسوع المسيح، يجيب لكم روح الحكمة والإلهام: عشان تعرفونه معرفة كاملة. ¹⁸ واطلب انه يفتح عقولكم و ينورها،عشان تعرفوا الرجاء اللي دعيكم له، والبركات الكثيرة المجيدة اللي خليها من نصيب عبيدة الصالحين، ¹⁹ وقوته العظيمة اللي مالهاش مثيل، اللي من شاننا نحنا المؤمنيين،وهي نفس القوة الفائقة اللي أظهره ²⁰ لما قيم المسيح من بين الأموات،وجلّسُه على يمينه بالسماء، ²¹ فوق كل الحكام والرؤساءوالسادة،وكل ألقاب السلطة الموجودين،موش بالعصر الحاضر بس،وبالمستقبل كمان. ²² وطرح كل شيء تحت سلطان المسيح، وجابه لأمة المؤمنين سيد على الكل. ²³ فأمة المسيح هي جسمه،وهو الذي يكمل الكل بالكل.