¹ Elyo Yahweh aishilekulanda kuli Mose ati, ''Kabiye no kufuma mu ncende ino, webo elo na bantu bobe abo wafunishe mu calo ca Egypto. Kabiyeni ku calo uko nalapile kuli Abraham, kuli Isaac kabili na kuli Yakobo, ilyo nebo nalandile ati, nebo nkapela aba mulupwa lwenu; ² Nebo nkatuma malaika ukumitangilila mwebo, kabili nebo nkafunyamo abena Canani, abena Amoli, abena Hiti, abena Peresi, abena Hifi, elo na bena Yebushi. ³ Kabiyeni ku calo ici, icitonya umukaka no buci, lelo nebo nshaye namwebo, pamulandu wakuti mwebo mulibantu abakosa imitima. Nebo kuti namyonawila munshila.'' ⁴ Ilyo aba bantu baumfwile aya mashiwi yakutinya, balyambile ukulosha, ekabili takwali nangu umo uwafyele icakumubonekela ubune. ⁵ Yahweh aishilekulanda kuli Mose ati, ''Landa ku bena Israeli ati, 'Mwebo muli bantu abakosa imitima.Ngacakwebati nebo naya namwebo mukashitafye akanono, nebo kuti naonaula mwebo. Eco nomba, fuleni ifyakuimwena ubune fyenu pakuti nebo mpingule ifyo mufwile ukucita mwebo.''' ⁶ Eco abena Israeli balifulile ifyakuimwena ubune fyabo pa lupili lwa mi Horib ukufuma apo tabatalile abafwalapo. ⁷ Mose alipitile itenti kabili alimikile kunse ya nkambi, eko asesesheko akatalamukila ukufuma ku nkambi. Alilinikile ati li tenti lya kukumaninamo. Onse uukofwaya ukwipusha kuli Yahweh ifili fyonse ali nokufuma kunse ya nkambi. ⁸ Ilyo Mose alefuma ukuya kunse ukwali itenti bonse abantu balefuma no kutalama pa myenshi ya ma tenti yabo kabili no kulolesha kuli Mose mpakafye aingila mwi mukati, ⁹ Lilyalinefye Mose aingila mwi tenti, ikumbi lyaikila no kutalama pa mwinshi we tenti, elo Yahweh atampa ukulanda kuli Mose. ¹⁰ Lilyalinefye abantu bonse babona ikumbi lyakufitisha lyatalama pa mwinshi we tenti, baima elo batampa ukushinshimuna, cila muntu pamwinshi we tenti lyakwe. ¹¹ Yahweh alikulanda kuli Mose ninshi nabaloshanya nankwe icinso ne cinso, ngafilya umuntu balanshanya na cibusa wakwe. Elyo Mose abwelele ku nkambi, lelo umubomfi wakwe Yoshua umwana mwaume wakwa Nuni, umulumendo, ena alikushala mwi tenti. ¹² Mose alandile kuli Yahweh ati, ''Bona, walandile kuli nebo ati, 'Senda aba bantu pa bulendo bwabo; lelo taunjebele no kwishiba uyo nebo tukaya nankwe. Webo walandile ati, 'Nebo walinjishiba ishina lyandi, elo walisanga ububile mu menso yandi.' ¹³ Nomba ngandisangilwe uwabubile mu menso yobe, ndanga inshila shobe pakuti njishibe webo elo no kukonkanyapo ukusanga ububile mu menso yobe. Ibukisha ukuti uyu umushobo bantu bobe.'' ¹⁴ Yahweh aishilekwasuka ati, ''Ukubapo kwandi kuleba na mwebo, kabili nebo nkalemipela ukutusha.'' ¹⁵ Mose alandile kuli yee ati, ''Ngacakuti ukusangwapo kobe takwabe nafwe, witufunyapo pancende ino. ¹⁶ Nakucilisha, nkeshiba shani ukuti nalisanga ububile mu menso yobe, Nebo kabili na bantu bobe? Kuti cawama ngacakuti webo waya na fwebo pakwebati nebo elo na bantu bobe twapusanako ku bantu bambi bonse ababa panwe sonde?'' ¹⁷ Yahweh alandile kuli Mose ati, '' Nebo nakabili ndecita ici cintu ico webo wipwishe, pantu webo walisanga ububile mu menso yandi, kabili nebo nalikwishiba ishina lyobe.''' ¹⁸ Mose aishilekulanda ati, '''Napapata undange ubukata bobe.'' ¹⁹ Yahweh aishilekulanda ati, ''Nebo nalakulanga ubusuma bwandi bonse bupite pa menso yobe, kabili nebo ndebila ishina lyandi 'Yahweh' ku cinso cobe, nebo ndangulukila kuli uyo uo ndefwaya ukulangulukila, elo ndanga uluse kuli uyo uo ndefwaya ukulanga uluse.'' ²⁰ Lelo Yahweh alandile ati, ''Tekuti umone icinso candi, pantu uwingamona nebo kabili aba no mweo.'' ²¹ Yahweh aishilekulanda ati, ''Mona, pano pali incende mu pepi na nebo; uli no kutalama pali ili libwe. ²² Ulo ubukata bwandi bulepita apoli, nebo ndekubika mu lupako lwa libwe elo nkufimbe ukuboko kwandi mpakafye nkpite apoli. ²³ Elyo nebo ndeisafunyapo ukuboko kwandi, elo webo ubone inuma yandi, lelo icinso candi tawacibone.''