¹ مگر مچھ کیا تُو مگر مچھ کانٹے سے کھینچ کر نِکال سکتا ہے؟یااُس کی زبان کو رسّی سے باندھ سکتا ہے؟ ² کیا تُو اُس کی ناک میں نکیل ڈال سکتا ہے؟ کیا تُو اُس کا جبڑا میخ سے چھید سکتا ہے؟ ³ کیا وہ تیری بُہت مِنتیں کرے گا یا تُجھ سے نرم اِلفاظ کہے گا؟ ⁴ کیا وہ تیرے ساتھ عہد کرے گا۔ تاکہ تُو ہمیشہ کے واسطے اُسے اپنا غُلام بنالے؟ ⁵ کیا تُو اُس کے ساتھ چڑیا کی طرح کھیلے گا یا اپنی بیٹیوں کے کھیل کے لئے اُسے باندھے گا؟ ⁶ کیا تاجر اُس کی خریِد و فروخت کریں گے۔ کیا سوداگر اُسے بانٹ لیں گے؟ ⁷ کیا تُو اُس کی کھال کو کانٹوں سے اَور اُس کے سر کو مچھلی مارنے کے نیزوں سے پُر کر سکتا ہے؟ ⁸ اپنا ہاتھ اُس پر رکھّ۔ جنگ کو یاد کر۔ تو تُو پھِر ایسا نہ کرے گا۔ ⁹ دیکھ کیا اُس کے شِکاری کی اُمّید بے فائدہ ہے۔ کیا وہ اُسے دیکھتے ہی گِر نہ پڑے گا۔ ¹⁰ کِسی کو جرُات نہیں کہ اُسے چھیڑے۔ پس میرے سامنے کون کھڑا رہ سکتا ہے؟ ¹¹ کِس نے پہلے مُجھے کُچھ دِیا ہے۔ کہ مَیں اُس کا بدلہ دُوں۔ تمام آسمان کے نیچے جو کُچھ ہے وہ میرا ہی ہے۔ ¹² مَیں اُس کے اعضا کے بارے میں اَور اُس کے زور اَور اُس کی آراستگی کی خُوبی کی بابت خاموشی نہ کرُوں گا۔ ¹³ کون اُس کے لباس کے دامن کو کھول سکتا ہے۔ کون اُس کے جبڑوں کی قطار کے درمیان جا سکتا ہے؟ ¹⁴ اُس کے مُنہ کے کَواڑوں کو کون کھولے گا؟ کیونکہ اُس کے دانتوں کا دائرہ ہولناک ہے۔ ¹⁵ اُس کی مضبُوط ڈھالیں نہایت عُمدہ ہَیں۔ جو گویا سخت مُہر سے جوڑی گئی ہَیں۔ ¹⁶ وہ ایک دُوسری سے ایسی جُڑی ہُوئی ہَیں کہ اُن کے درمیان سے ہَوا بھی گُزر نہیں سکتی۔ ¹⁷ وہ سب ایک دُوسری سے لگی ہوئی ہَیں اَور ایسی منسلک ہُوئی ہَیں کہ جُدا نہیں ہو سکتیں۔ ¹⁸ اُس کی چھینک سے روشنی چمکتی ہے اَور اُس کی آنکھیں صُبح کی پلکوں کی مانند ہَیں۔ ¹⁹ اُس کے مُنہ سے مَشعلیں جلتی ہَیں۔ اَور اُس سے آگ کی چنگاریاں اُڑتی ہَیں۔ ²⁰ اُس کے نتھنوں سے دُھواں اُٹھتا ہے۔ اُس ہانڈی یا دیگ کی طرح جو اُبلتی ہو۔ ²¹ اُس کے سانس سے کوئلے دَہک اُٹھتے ہَیں۔ اَور اُس کے مُنہ سے شُعلہ نِکلتا ہے۔ ²² قُوّت اُس کی گردن میں رہتی ہے۔ اَور دہشت اُس کے آگے دوڑتی ہے۔ ²³ اُس کے گوشت تہیں ہَیں۔ اَور ایسے اُس میں جُڑی ہوئی ہَیں کہ ہَل نہیں سکتے۔ ²⁴ اُس کا دِل پتّھرکی طرح سخت ہے۔ اَور چکی کے نچلے پاٹ کی مانند مضبُوط ہے۔ ²⁵ اُس کے اُٹھنے سے بہادُر لوگ ڈرتے ہیں۔ اَور گھبرا کر بے ہوش ہو جاتے ہیں۔ ²⁶ اگر کوئی اُس پر تلوار یا بھالایا برچھا یا نیزہ چلائے تو کُچھ نہیں بنتا۔ ²⁷ وہ لوہے کی سُوکھی گھاس کی طرح اَور پیتل کو گلی سڑی ہوئی لکڑی کی مانند سمجھتا ہے۔ ²⁸ تیر اُسے بَھگا نہیں سکتا۔ اَور فلاخنوں کے پتّھر اُس کے لئے بُھس کی مانند ہَیں۔ ²⁹ ہتھوڑے کو وہ بُھس سمجھتا ہے اَور برچھی کے چلنے پر ہنستا ہے۔ ³⁰ اُس کے نچلے حِصّے نوکیلے پتّھروں کی مانند ہَیں۔ اَور وہ تیز نوکدار چیزوں پر ایسے لیٹ جاتا ہےگویا کہ وہ کیچڑ ہَیں۔ ³¹ وہ دریا کو ہانڈی کی طرح کھولاتا ہے۔ اَور سمُندر کو روغن کا برتن بناتا ہے۔ ³² وہ اپنے پیچھے روشن راہ بناتا ہے۔ تو معلُوم ہوتا ہے۔ کہ گہراؤ سفید بالوں والا ہو گیا ہے۔ ³³ زمین پر اُس کی مثال نہیں جو ایسا بے خوف پیدا کِیا گیاہو۔ ³⁴ وہ سب اُونچی چیزوں کو دیکھتا ہے۔ اَور تمام مغروروں کا بادشاہ ہے۔