¹ مَیں نے اپنی آنکھوں سے عہد کِیا۔ تو پِھر میں کِسی کنواری پر کیوں بُری نظر ڈالوں۔ ² کیونکہ عالِم بالا پر خُدا کی طرف سے کیا حِصّہ ہے۔ اَور بُلندیوں پر قادرِ مُطلِق کی طرف سے کیا مِیرَاث ہے؟ ³ کیا شریر کےلئے ہلاکت نہیں اَور بَدکردار کے لئے مُصِیبت نہیں؟۔ ⁴ کیا وہ میری راہوں کو نہیں دیکھتا ۔اَور میرے تمام قدموں کو شُمار نہیں کرتا؟۔ ⁵ اگر مَیں جُھوٹ کی راہ چلا ہُوں یا میرے پاؤں نے فریب کرنے کے لئے جلدی کی ہے۔ ⁶ (مَیں عدالت کے سّچے ترازُو میں تولا جاؤں۔ اَور خُدا میری بے گُناہی جان لے)۔ ⁷ اگر میرا قدم رستے سے پِھرا ہو یا میرے دِل نے میری آنکھوں کی خواہش کی پیروی کی ہو یا میرے ہاتھوں کو کوئی داغ لگا ہو۔ ⁸ تو مَیں بوؤں اَور دُوسرا کھائے۔ اَور میری پیداوار جڑ سے اُکھاڑی جائے۔ ⁹ اگر میرا دِل کِسی عورت پر آیا ہُؤا ہو اَور اگر مَیں اپنے ہمسائے کے دروازے پر گھات میں بیٹھا ہُوں۔ ¹⁰ تو میری بیوی دُوسرے کے لئے چکّی پیسے۔ اَور غیر مَرد اُس پر جُھکیں۔ ¹¹ کیونکہ یہ گُناہ عظیم ہے۔ ایسا جُرم جس کی سزا قاضی دیتےہَیں۔ ¹² یہ ایک آگے ہے جو کھا کر ہلاک کرتی اَور میری ساری پیداوار کو اُکھاڑ دیتی ہے۔ ¹³ اگر مَیں نے اپنے غُلام یا اپنی لونڈی کا حَق مارا ہو جب اُنہوں نے مُجھ سے جھگڑا کِیا۔ ¹⁴ تو جب خُدا اٹھے گا تو میں کیا کروں گا اور جب وہ پوچھے گا تو میں کیا جواب دوں گا۔ ¹⁵ جس نے مُجھے پیٹ میں بنایا کہ اُسی نے اُسے بھی نہ بنایا؟کیا ایک ہی نے ہمیں رحِم میں پیدا نہ کِیا؟ ¹⁶ اگر مَیں نے مِسکینوں کی ضرورت کو پُورا نہ کیا ہو۔ یا بیواؤں کی آنکھ کو افسُردہ کِیا ہے۔ ¹⁷ یا مَیں نے اپنا نوالہ اکیلے آپ ہی کھایا ہے۔ اَور اُس میں سے یتیم نے نہیں کھایا۔ ¹⁸ نہیں مَیں باپ کی طرح لڑکپن ہی سے اُسے پالتا رہا۔ اَور ماں کے پیٹ ہی سے بیوہ کی راہ نمائی کرتا رہا ہُوں۔ ¹⁹ اگر مَیں نے کِسی کو کپڑے نہ ہونے کی وجہ سے مَرتے دیکھا ہے یا مِسکین کو جس کے پاس اوڑھنے کو کُچھ نہ تھا۔ ²⁰ اگر اُس نے مُجھے دُعا نہ دی ہو۔ اگر وہ میری بھیڑوں کی اُون سے گرم نہ ہُؤا ہے۔ ²¹ اگر مَیں نے یِتیم پر اپنا ہاتھ اُٹھایا ہے۔ جس وقت کہ مَیں نے پھاٹک میں اپنا اقتدار دیکھا۔ ²² تو میرا کَندھا شانہ سے نِکل جائے۔ اَور میرا بازُو جوڑ سے ٹُوٹ جائے۔ ²³ کیونکہ خُدا کا خوف مُجھ پر بھاری تھا۔ اَور اُس کی حشمت کے آگے میری کُچھ طاقت نہ رہی۔ ²⁴ اگر مَیں نے سونے پر اعتماد کِیا ہے۔ یا کُندن سے کہا ہے کہ تُو میرا بھروسا ہے؟۔ ²⁵ اگر مَیں خُوش ہُؤا ہُوں۔ کہ میری دولت بہت زیادہ ہُوئی اَور کہ میرے ہاتھ نے بُہت کُچھ حاصِل کِیا۔ ²⁶ اگر مَیں نے سُورج پر نظر کی ہے جب وہ چمکا۔ یا چاند پر جب وہ آب و تاب میں چلتا تھا۔ ²⁷ اَور میرا دِل خُفیتہ فریفتہ ہُؤا ہے۔ اَور میرے مُنہ نے میرے ہاتھ کو چُوما ہے۔ ²⁸ تویہ بھی ایک ایسا جُرم ہوتا جس کی سزا قاضی دیتے ہیں۔ اِس لئے کہ یوں میں نے خُدا جو عالمِ بلا پر ہے کا اِنکار کِیا ہوتا۔ ²⁹ کیا میَں اپنے دُشمن کی ہلاکت سے خُوش ہُؤا ؟یاجب اُس پرآفت آئی تو میں شادمان ہُوا؟ ³⁰ بلکہ مَیں نے تو اپنے مُنہ کو اتنا گُناہ بھی نہ کرنے دیا کہ اُس کی جان کے لئے لعنت کی آرزُو کروں۔ ³¹ کیا میرے خَیمے کے لوگ نہیں کہتے تھے۔ ایسا کون ہے جو اُس کے دسترخوان کے گوشت سے سیر نہیں ہُؤا؟ ³² پردیسی کو رات گلی میں نہیں رہنا پڑا۔ بلکہ مَیں مُسافِر کےلئے اپنا دروازہ کھولتا تھا۔ ³³ کیا مَیں نے اپنا گُناہ چُھپایا ہے۔ جیسے کہ اِنسان بَدی کو اپنے سینہ میں پوشِیدہ رکھنے کے لئے کرتے ہیں؟ ³⁴ اِس لئے کہ میں بڑے گُروہ سے ڈر گیا۔ اَور خاندانوں کی حقارت سے خوف کھایا۔ یہاں تک کہ مَیں خاموش ہو رہا۔ اَور دروازے سے باہر نہ نِکلا۔ ³⁵ کاش کوئی ہو جو میری سُنے؟ دیکھو یہ میرا دستخط شُدہ فردِ جُرم ہے۔ قادرِ مُطلِق مُجھے جَواب دے۔ اَور میرا مُدعی اپنی شِکایت تحریر کرے۔ ³⁶ یقیناًمَیں اپنے کندھے پر اُسے اُٹھا لیتا۔ اَور اپنے سر پر تاج کی طرح اُسے رکھتا۔ ³⁷ مَیں اپنے قدموں کا شُمار اُس پر ظاہر کرتا۔ اَور صاحبِ رُتبہ کے جانے کی طرح اُس کے پاس جاتا۔ ³⁸ اگر میری زمین میرے خلاف چلّائی ہے۔ اَور اُس کی کھیتی کی ریگّھاریاں روئی ہَیں۔ ³⁹ اگر مَیں نے قمیت ادا کئے بغیر اُس کے پھَل کھائے ہَیں۔ یا میری وجہ سے اُس کے مالکوں کی جان چلی گئی ۔ ⁴⁰ تو اُس میں گیہُوں کے بِدلے خاردار جھاڑی اَور جَو کے بدلے کڑوے دانے اُگے۔ اَیُّوبؔ کی باتوں کا اِختتام۔