¹ Ahanda ukuvasambilizya havili muluvazu ulwa sumbi, pe impuga impiti yihamuzyungulilawuyo. Pe aha kwela mu vwato vwe vwali mwa sumbi, pe ahihala mumo. Impuga yonti yali paluvazu ulwa sumbi. ² Avavuzizye ivintu ivwinji muviholanio, muvimanyisyo vwakwe, izi zye aziyanzile kuvavo. ³ ''Yivwa! uhalima ahavala ukupesa imbeyu zyakwe. ⁴ Lwe akupesa, imbeyu zimo zihagwila mwidala, pe iviyuni vihinzaga nukuzilya. ⁵ Izyamwavo zihagwila piyalavwe, pe patali itope ilyinji. Mwaluvilo zihumila, pa mulandu pali itope ilya kushepa. ⁶ nkandi lwe lifumile izuva, pe imbeyu zihafwa, mulandu zitimiliye nama gululuzi, pe zihumila. ⁷ Yoka iyamwavo yihagwa pamimva. Amimva gahakula pe ziha fyolongana, pe zitahahoma insanga. ⁸ Imbeyu izinji zihagwa pitope lya muvundo pe zihamela zihakula nukwela inyinulo yihava 30, 60 nape gangava pamo pamo ukushizya.'' ⁹ Pe uwene ahati, ''Uno wenga amaskutwi alinago, we atejelezyaje!'' ¹⁰ Pahavalilizyo he uYesu ali weka, vevali kupipi nawo navala 12 vahamuvuzilizya wuyo iva vwili. ¹¹ Ahati kuvavo, ''vipeliwe kumwe ivwa kukwilu vya shinamwene sha Mulungu. Lole kuvakunzi shili mu vwili, kuti lwe nga vakwenya, leha venye, nkandi vatakwenya, ¹² kuti lwe ngavakwivwa, leha vivwe, nkandi vatakwivwisya, pamo vali pinduha pe uMulungu ahavahovoshela.'' ¹³ Ahayanga kuvava, ''mutakwivwisya ishili ishi? Pe mungivwisya vuli vuli ivwili vyinti?'' ¹⁴ Uhapesa ahapesa izwi. ¹⁵ Aga gegamu gegali munzila, kwe amazwi gapesilye. Lwe vivwa, mwaluvilo usetano ahinza nukusenda amazwi gega pesilwe mumwavo. ¹⁶ Pe izi zye mbeyu zye zyapesilwe piyalavwe; wuwenu, lwe ayivwa izwi, mwaluvilo akuliposhela nuluseshelo. ¹⁷ Lole ama gululuzi nagamo, pe vakujimbilila pahavalilo hansi. Pisinda lwenga vakuyangwa mulanduwizwi, pe mwaluvilo vakupunula. ¹⁸ Izyamwavo zye zipesilye mumimva. ava vevala ve vakwivwa izwi, ¹⁹ Loli vakusajila ivya munsi nukuhopekwa nishuma nukukumbushila ivintu ivyinjiv ye vikwinjila mukasi nukubuda izwi, pe litakulema insanga. ²⁰ Zye zipesilwe pansi inyinza vevalave vakutejelezya izwi, kulyitishizya nukuhoma ivihomwa 30, 60 nape hangava 100 pamo nukupitilizya. ²¹ Uyesu ahayanga navo ahati, ''Mukuvihaga inyali munyumba kuti mugubishile mushiseje pamo yive muntende mushitala? Mukwinjilaga nayo nu kwihazya pashisajishilo. ²² Nashimo she shivwamile she shitalivoneha, nashimo isha kukwilu she shitalivoneha apa zelu. ²³ Uno wenga ali nago amakutwi aga kutejelezya, we atejelezyaje!'' ²⁴ Ahayanga navo ahati, ''Tejelezya kuzye mukwivwa, ishipimo shisho she mukupimila avanji viliyonjela pimwe. ²⁵ Mulandu we ali navyo, kuwuyo alipewa ivyinji, uno we atenavyo, nashe ali alinasho shilisendiwa.'' ²⁶ Ahayanga havili ahati, ''Ishinamwene sha Mulungu shiholine nu muntu we akupesa imbeyu yakwe mumugunda wakwe. ²⁷ akusyupila pavusiku akunyamuha umusanya, iuyene imbeyu yihamela nukukula, uwene lye atayivonyi. ²⁸ Insi yikuhoma insanga payeka: ishavwando umulemvi, pe yikupyanizya amatwe, ilelo pe likupela insanga ninsanga ingomu zye zikwizula mumatwe. ²⁹ Apene nyene pe gayanzile insanga zyeleye, mwaluvilo ahatuma ishakuvunila, she imvuno yifisile.'' ³⁰ Sona ahati, ''shoni she tungaholania nuvu Mwene vwa Mulungu, shili vuli she tungavombela pakulingania shenesho? ³¹ vuli fwe hasanga hamuzimwa, he, henga hapesa hansi kunsanga zyonti. ³² Loli lye avyaye, pe hakukula hakulusya vyonti ivya mwavo, hakutenga ninsanga impiti, ilelo pe niviyunivya kumwanya vikujenda nukutenjela ivisalanzo munzunda yakwe.'' ³³ KU vyili ivyinjiivi pe ahayanga kuvavo muvwinji nkani ukuti mpaka vivwisye, ³⁴ nkandi atahayanga kuvavo kwambula viholanio. loli vwe ali weka, ahalingania vjonti kuva sundikwa vakwe. ³⁵ Pisiku lila, vwe hamazuva hinzile, pe ahayanga ku vavo, '''Nzaga tuvale twenye uluvazu ulunji.'' ³⁶ Pe vahafuma nukuyileha impuga, vahamusnda u Yesu poka, nkandi mwe ahavela, muvwato. kuhava nama vwato, aganji gegaha jendaga nawo. Pe ³⁷ yihavula inkungu impiti nkani, amavilingwa gahadomoshela muvwatopolihizula naminzi. ³⁸ Uyesu ahava mwisinda muvwato, pe avisile ishakutunyulila. Pe avene vahamunyamusya, vahayanga, ''Musambilizi, utakupasya kuti twavala kufwa?'' ³⁹ Ahanyamuha, ahapilila inkungu, ahayanga kwa sumbi. ''pumaga! uve mya!'' Pe inkungu yihihalana pe kuhima umutende umupiti. ⁴⁰ pe ahayanga ahati kuvavo, ''shonishe muli nilyoga? Mushili mute nu lwitiho?'' ⁴¹ Vivuye nilyoga ipiti havili vahayanga kuwoka nuwamwavo, ''Uno we wuwenu, mulandu ninkungu vulo nu sumbi vikumwivwila?''