[میر مُغّنی کے لئے۔ مزمُور۔ از داؔؤد] ¹ ۔اَے خُداوند مَردِ خبیِث سے مُجھے چُھڑا۔ مُجھے مَردِظالمِ سے بچائے رکھّ۔ ² ۔یعنی اُن سے جو دِل میں بُرے منصُوبے باندھتے۔ اَور روز مرّہ جھگڑا بَرپا کرتے ہَیں۔ ³ ۔وہ سانپ کی مانند اپنی زُبان تیز کرتے ہَیں۔ اُن کے ہونٹوں کے نیچے اَفعی کا زہر ہَے۔ (سِلاہ) ⁴ ۔اَے خُداوند۔ شریر کے ہاتھ سے مُجھے رِہائی بخش۔ مُجھے مَردِ ظالِم سے بچائے رکھّ ۔ جو اِس کوشِش میں ہَیں کہ میرے پاؤں کو اُکھاڑ دیں۔ ⁵ ۔مغرُور میرے لئے پھندا چُھپاتے۔ اَور جال کی طرح رَسّیاں پھیلاتے ہَیں۔ وہ راہ کے کِنارے میرے لئے دام لگاتے ہَیں۔ (سِلاہ) ⁶ ۔مَیں خُداوند سے کہتا ہُوں کہ میرا خُدا تُو ہی ہَے۔ اَے خُداوند میری اِلتجا کی آواز سُن لے۔ ⁷ ۔اَے مالِک خُداوند اَے میرے قادِر مُخلِص۔ جنگ کے دِن میں تُو میرے سر پر سایہ کرتا ہَے۔ ⁸ ۔اَے خُداوند شریر کی مُرادیں پُوری نہ کر۔ اُ کے منصوُبوں کو اَنجام نہ دے۔ ⁹ ۔میرے گِرد وپیش کے لوگ سر بُلند کرتے ہَیں۔(سِلاہ) اُن کے مُنہ کی شرارت اُنہی کے سر پر پڑے۔ ¹⁰ ۔ وہ دَہکتے انگارے اُن کے سر پر برسائے۔ وہ اُنہیں گڑھوں میں ایسے دھکیلے کہ پھِر نہ اُٹھیں۔ ¹¹ ۔بَد زُبان شخص زمین پر قائم نہ رہے گا۔ مَردِ ظالِم ناگہاں آفت کا شِکار ہو گا۔ ¹² ۔مَیں یہ جانتا ہُوں کہ خُداوند۔ مُحتاج کی وکالت اَور مِسکین کے حَق کی حِفاظت کرتا ہَے۔ ¹³ ۔یقیناً۔ صادِق تیرے نام کا شُکر کریں گے۔ اَور راستکار تیرے حضُور رہا کریں گے۔