Para o director de coro. Salmo dos fillos de Coré. Cantiga composta para Alamot ( voces brancas) ¹ Deus é o noso refuxio e fortaleza, o noso socorro nas dificuldades. ² Por tanto, non temeremos aínda que a terra mude e os montes esvaren no fondo dos mares; ³ aínda que ruxan as augas e se perturben, e abalen os montes coa súa bravura. Selah ⁴ As correntes do río, alegran a cidade de Deus, o santuario das moradas do Altísimo. ⁵ Deus está no medio dela; non será abalada, Deus axudaráa ao amencer. ⁶ Bruaron as nacións, cambalearon os reinos; e ao dar El a súa voz, a terra derreteuse. ⁷ O Señor dos exércitos está con nós, o noso refuxio é o Deus de Xacob. Selah ⁸ Vinde, ollade as obras do Señor, que fixo prodixios na terra, ⁹ que fai cesar as guerras até os límites do mundo, que esnaquiza o arco, corta a lanza e queima os carros no lume. ¹⁰ Acougade e sabede que eu son o Señor, excelso serei entre as nacións, excelso serei na terra. ¹¹ O Señor dos exércitos está con nós, o noso refuxio é o Deus de Xacob. Selah