¹ Un home da casa de Leví foi e tomou por muller unha filla de Leví. ² E a muller concibiu e deu a luz un fillo; e vendo que era fermoso, escondeuno por tres meses. ³ Pero non podendo ocultalo por máis tempo tomou un cesto de vimbios e calafateouno con asfalto e piche. Entón puxo o neno nel, e colocouno entre os vimbios á beira do Nilo. ⁴ E a irmá do neno púxose ao lonxe para ver que lle sucedería. ⁵ E a filla de Faraón baixou a se bañar ao Nilo, e mentres as súas doncelas se paseaban pola ribeira do río, viu o cesto entre os vimbios e mandou unha criada súa para que a trouxera. ⁶ Ao abrilo, viu o neno, e velaí, o neno estaba a chorar. E tívolle compaixón, e díxose: Este é un dos nenos dos hebreos. ⁷ Entón a irmá do neno díxolle á filla de Faraón: Queres que vaia e che chame unha nutriz das hebreas para que che críe o neno? ⁸ E a filla de Faraón respondeulle: Si, vai. E a moza foi e chamou á nai do neno. ⁹ E a filla de Faraón díxolle: Leva este neno e críamo, e eu dareiche o teu salario. E a muller tomou o neno e criouno. ¹⁰ Cando o neno medrou, ela levouno á filla de Faraón, e veu ser fillo seu; e púxolle por nome Moisés, dicindo: Pois tireino das augas. ¹¹ E aconteceu que naqueles días, crecido xa Moisés, saíu onde estaban seus irmáns e viu os seus duros traballos; e viu un exipcio golpeando un hebreo, un dos seus irmáns. ¹² Entón mirou ao redor e cando viu que non había ninguén, matou o exipcio e agachouno na area. ¹³ E ao día seguinte saíu e viu a dous hebreos que rifaban, e díxolle ao culpable: Por que golpeas o teu compañeiro? ¹⁴ E el respondeulle: Quen che puxo de príncipe ou de xuíz sobre nós? Estás a pensar en me matares coma mataches o exipcio? Entón Moisés tivo medo, e díxose: Certamente divulgouse o asunto. ¹⁵ Cando Faraón soubo do asunto, tratou de matar a Moisés pero Moisés fuxiu da presenza de Faraón e foise vivir á terra de Madián, e alí sentouse xunta un pozo. ¹⁶ E o sacerdote de Madián tiña sete fillas, as cales foron tirar auga e encheron os píos para daren de beber ao rabaño de seu pai. ¹⁷ Entón viñeron uns pastores e botáronas de alí, pero Moisés ergueuse e defendeunas, e deu de beber ao seu rabaño. ¹⁸ Cando elas volveron a Reuel, o seu pai, el díxolles: Por que volvestes tan pronto hoxe? ¹⁹ Respondéronlle elas: Un exipcio librounos da man dos pastores; e a máis tirounos auga e deu de beber ao rabaño. ²⁰ E el díxolles a súas fillas: E ulo? Por que deixastes o home? Convidádeo a que coma algo. ²¹ Moisés accedeu morar con aquel home, e el deulle súa filla Séfora a Moisés. ²² E ela deu a luz un fillo, e Moisés púxolle por nome Gersón, porque se dixo: Peregrino son en terra estranxeira. ²³ E aconteceu que pasado moito tempo, morreu o rei de Exipto. E os fillos de Israel xemían a causa da servidume, e berraron; e os seus berros, a causa da servidume, subiron a Deus. ²⁴ Ouvíu Deus o seu xemido, e lembrouse Deus do seu pacto con Abraham, Isaac e Jacob. ²⁵ E ollou Deus os fillos de Israel, e Deus tívoos en conta.