¹ Nji kuhane kuli Fembe mukuenje uetu ua mukentu, Ovo ali ngamba ya tembele oyo yili mu Senkeli, ² chikuma linga mu mutambule muli Kalunga. Pangeni evi mu mana aku tuvakana vantu va kujela va Kalunga, na ku puitha mo nkala vioshe via ku mukuatha kutunda kuli yeni, muomu ali uakama muku kuatha vavengi na kuli yange naua. ³ Kunda ho Pilisilana Akuila, vakuetu vaka vipanga muli Kilistu Yesu, ⁴ yiya ou omo lia muono uange va vetuetha miono yavo. Nji hana kushangala kuli yavo, keti yange lika, vunoni lalo ku vitembele vioshe via vakua vifuti. ⁵ Kundaho vi tembele ovio via mumembo. Kundaho Epaenetase muthamba uange, ou ua kele vushuka vua kulivanga ku Asia kuli Kilistu. ⁶ Kunda ho Malia, ou jua pangele muakama omo liove. ⁷ Kunda ho Andolonikasa na Njunia, vakuluntu vange nava vakuetu vamu kamenga, vava zhivuke kuva postolu, na yavo vakale muli Kilistu kulutue liange. ⁸ Kunda ho Ampiliatase, muthamba uange muli Kalunga. ⁹ Kunda ho Ambanase, vakuetu va vipanga muli Kilistu, na Sitase, muthamba uange. ¹⁰ Kunda ho Apelese, veta vethele muli Kilistu. Kunda ho ovo va muimbo lia Alisitombolase. ¹¹ Kunda ho Helondiane, vakuluntu vange. Kunda ho ovo va muimbo lia Nasisase ou ua muli Kalunga. ¹² Kunda ho Talafaena na Talafosa vaka vipanga via Kalunga. Kunda ho Pelesise mukuetu, ou na pange muakama muli Kalunga. ¹³ Kundaho Lufase, ua kuhangula muli Kalunga, na vayina na vange. ¹⁴ Kunda ho Asinikitase, na Felengone, na Helemese, na Patolombase, na Helemenase, na vakuenje vendi ovo vakele navo. ¹⁵ Kunda ho Filolongase na Njulia, Neliase na mukuenje uendi ua mukentu, na Olimpase, na vantu va kuli kelela va Kalunga ovo vakele navo. ¹⁶ Likundeni ho umo na mukuavo muku li thsemba na ku jela. Vitembele vioshe via muli Kilistu vina mi kunduho. ¹⁷ Ngechi njina mi lambelela, vakuenje vange, mu thinganieka ovo va nehetha ho kulitepatha naku shevuitha. Vali na kuya ku lutue lia vilongetha viove una lilongetha. Tundako kuli yavo. ¹⁸ Vantu va chifua ocho kuva pangelele Kalunga ketu Kilistu, vunoni lia memo avo. Omo lia vulelu naku neha vihandeka viaku shevuitha vimbunge via va kua ku konkama. ¹⁹ Omo lia chimuetho chove cha kathingimiko cha hetele ku nkala umo. Nji jolela, ngocho kuli yove, vunoni nji yongola ukale ua kuzhangama kuli vije via chili, nava kua kujena mulonga kuli evi via kuviha. ²⁰ Kalunga ua chiyulo mualolo aka thsena satana muinthi lia mikono yeni. Ngozhi ya Kalunga ketu Yesu Kilistu yikale neni. ²¹ Timoteo, mukuetu mukua vipanga, na mi kunduh, na Lusiyasi, na Njasone, na Sosipata, vakuluntu vange. ²² Yange, Teshase, Ou ua thona mukanda ou, njina mi kundu ho muli Kalunga. ²³ Ngayase, na nthimanetha yange na vitembele vioshe, na kunduho, Elastusa, mukua kuhaka vimbongo via muimbo lia kama, na mikundu ho, hamo na mukuenje uendi Kuatase. ²⁴ Mukanda ua chili ku ua kele na velesikulu eyi. Ngozhi ya Kalunga ketu Yesu Kilistu yikale neni voshe. Amen. ²⁵ Ngechi kuli yendi ou a hatha kuku pangetha na nthili ku shuama ku muzhimbu uange na kuambulula kua Yesu Kilistu. Kushuama kuku jombolola kua tuyando tuje tuva shuekele mu vushueke ha miaka ya laha, ²⁶ vunoni ngechi via vombolokele na kuvilinga vavi zhivuke ha vithona via kapolofeto ku vifuti vioshe, haku kuatetha ko kua Kalunga ua ku kalelelako, muku neha kathingimiko ka kuthselela. ²⁷ Hali Kalunga ua ku zhangama lika, kuhitila hali Yesu Kilistu, vumpahu vu kaleleko miaka yoshe. Amen.