¹ Keho Avilama ua tundile ku Ingito na kuya ku Nengeve, ikeye na, na mukentu uendi na vioshe vije viakele navio. Lote nendi ua ile navo. ² Keho Avilama uakele mpite ua vimuna, na palata na olu. ³ Ua tamekele kuenda mu vungenzhi vuendi kutunda ku Nengeve kuya ku Mbetele, ku muhela uje uakele mbalaka yendi, hakati ku Mbetele na Ali. ⁴ Ua yile ku muhela kuje vatungile laja mutula. Oku vatumbuile lizhina lia Yehova. ⁵ Ngeci Lote ou uendelele hamo na Avilama, nendi ua kele na vangamba, na vimuna, na vimbalaka. ⁶ Muhela ka ua puile mukuovokela voshe vavali hamo, muomu vufuko vuavo vua li lanethele, linga keti vakale kumo. ⁷ Mukemo, hakele vimpata hakati ka kaniungi ka vimuna via Avilama na kaniungi ka vimuna via Lote. Vaka Kanana na vakaPelezi hanthsimbu yaco vakele mu muhela uaco. ⁸ Mukemo Avilahama ua kuaniene na Lote, "Keti hakale kuli tepetha hakati kove nange, nahakati ka tuniungi vove nava vange; kunima yevi tuva vushoko. ⁹ Keti muhela uoshe uli kuli yove? Ya kulutue na kulitepa kuli yange. Nga uya ku cimoshue, ange njiya kucilio. Nambe nga uya kucilio, kunahu ange njiya ku cimoshue." ¹⁰ Keho Lote ua tengulukile, na kumona vishoni vioshe via Yolondau viakele muacili omo vana vi mbalumuina mema na kuoshe ku vingila via Zola, ngue liha lia Kalunga, ngue muhela uaku Ingito. Evi viakele kulutue Kalunga aka thimangane Sandoma na Ngomola. ¹¹ Ngeci Lote ua li hanguilile endi vavenia kutambula muhela uoshe ua Yolondau na kuenda aye tunde tangua, nava vushoko voshe valitepele umo ku mukuavo. ¹² Avilama uakele mu muhela ua Kanana, na Lote ua kele hamo mu vimbongi via muila. Ua hakele vimbalaka viendi hale na Sandoma. ¹³ Ngeci vantu vamu Sandoma va kele vakupiha vakua milonga kuli Yehova. ¹⁴ Yehova ua kuaniene na Avilama kunima endi Lote na litepe nendi, "Tala kutunda ku muhela ou unemana mu vuihi, kusulu, kuvucelo, naku vutokelo. ¹⁵ Muhela uoshe ou una mono, njikakuhana uo na mushovo uove ua ku kalelela. ¹⁶ Njika linga mushovo uove naku uilanetha ngue likungu lia mucifuti, linga nga muntu akatha kutanda likungu lia mu cifuti, keho na mushovo uove vakatha ku utanda. ¹⁷ Katuka, uende muvulahe na muvuihi vua muhela, muomu njika kuhana uo." ¹⁸ Keho Avilama ua tambuile mbalaka yendi, na kuija aku kale ku Kaluvaliu yaku Mamele, oyo yakele ku Hevelone, Kuje va tungile mutula ua Yehova.