¹ Munyima dhoyinu yi ko kumona kwange haengeli hane ha nemana mumashonga ghokaye, awa ha karire hana kwaterera dhimupepo dhine dhomukaye podiyo eshi mbadiko mupepo shoghupungere mukaye, padikuruviya, endi mukehe thitondo. ² Ko kumona karo kwange muengeli ghumweya ghana kushwayerera kumavero ghodiyuwa, oyu gha karire nothitareka thaNyambi ghomuyumi. Gha kuyererire no diywi dyodikuru kwawaengeli hane awa hapire matawedhero mukuyipitha kaye nodikuruviya: ³ ''Mwayipitha kaye, dikuriviya, endi yitondo kare tu ture thitareka mutuhungupara twawa pika Nyambi.'' ⁴ Na yuvire nomora dhowa ha pwire kutareka: 144,000, awa hapwire kutareka mu kehe mushovo gho hanu homuIsragheli: ⁵ mayovi dikumi nomawadi awa ha tundire mudiko dyaJuda, mayovi dikumi nomawadi awa ha tundire mudiko dyaRubeni, mayovi dikumi nomawadi awa hatundire mudiko dyaGadi, ⁶ mayovi dikumi nomawadi awa hatundire mudiko dyaAseri, mayovi dikuma nomawadi awa hatundire mudiko dyaNaftali, mayovi dikumi nomawadi awa hatundire mudiko dyaManase, ⁷ mayovi dikumi nomawadi awa hatundire mudiko dyaSimiyoni, mayovi dikumi nomawadi awa hatundire mudiko dyaLevi, mayovi dikumi nomawadi awa hatundire mudiko dyaIsakari, ⁸ mayovi dikumi nomawadi awa hatundire mudiko dyaSebuloni, mayovi dikumi nomawadi awa hatundire mudiko dyaJosefu, no mayovi dikumi nomawadi awa hatundire mudiko dyaBenyamini ghapwire kutareka. ⁹ Munyima dhoyinu yi nakengire, no namonine hanu hohengi gho kupira kutara kehe yuno-mukehe mushovo, mako, mwawaguva nomandimi-hanemana kughutho ghodipuna no kughutho ghondjwi. Gha shupatire yivata yoyikenu nogha kwatererire mite dho makindhu muma nyara ghawo, ¹⁰ no hethire nodiywi dyo dikuru: ''Makomweneno gha kara kwaNyambi ghowihetu, oyu gha hungumana padipuna, nokwaNdjwi!'' ¹¹ Haengeli wahe hadhingumwetwedhire nawa mayami no yikamoyo yine, no ha nyongamine marupara ghawo kughutho ghodipuna. Hakuyire Nyambi, ¹² ghuninga eshi, ''Ameni! Makuyero, difumanekero, ghunyanyami, matumero, dikuto, nomangcamu kwaNyambi kuroruhe nororuheya! Ameni!'' ¹³ Kokunipura yofotji ghopawamayami eshi, ''Hadye napo wa, hapwa kuvateka noyitere yoyikenu, no kupi ha tunda?'' ¹⁴ Ame namuhuthire eshi, Hekudyange, wadimuka,'' no haningi kwange eshi, ''Awo ne howa hashwayire muyinyanda yoyikuru. No ha yoyire yivata yagho no kuyitenda ghukenu mumanyinga ghoNdjwi. ¹⁵ No thitambo thi, ghadi kughutho ghodipuna dyaNyambi, hamukuyire mutenya noghuthiku mutembeli wendi. Oyu gha hungumana padipuna nanyi haka yamba yambere thishasha yuwo papawo. ¹⁶ Mbadi mbo hafa karo ndhara, nodinot temba. Nothishe tho diyuwa mbadi mbo thiwa tumeka. ¹⁷ Ndjwighana oyu ghakara mukatji kudipuna mbo ghana wakungu, no mboghana wa neghedha kumeyu gho divetu-vetu dyomuparo, naNyambi mbo ghana kuyura kehe dihodhi edi dya kushorondonda mumeho ghawo.''