¹ Ame namono ghopa Ndjwighana ghana yandhurura thofotji thoyikwoko noyiwadi thoyingangera, ndani nayuvu ghofotji thoyine yivareka yoyiyumi yinakughamba no diywi dyokuyuveka yira mushoro, "wiye" . ² Namonine ndani pakarire kakambe kokakenu, nomudhini ghanakwaterera ndamba, ndani hamupire thikoroni. Ghashwayire panunda yira yira mufundi , mukuninga naghafunde. ³ Apa ndjwighana ghayandhure thingangera thoghuwadi, nayuvire roghuwadi thivareka thoghuwadi thakughamba ,"wiye!'' ⁴ Munyima kakambe kamwe kashwayire- kokakihu. Mudhini wako hamupire matawedhero mukushwayitha thiraro mukaye, Podiyo haguva hakuphaghathane. Mudhini yu, hamupire dimende dishokuru. ⁵ Opa ndjwighana ghayandhure thingangera thoghuhatu , nayuvire thivareka thothiyumi thoghuhatu thakughamba, ''wiye!'' namonine kakambe kokeru nomudhini wako ghakwaterire yiyedhekerero yiwadi munyara dhendi. ⁶ Nayuvire yira maywi ghokukupitura mukatji koyivareka yoyiyumi yine yinakughamba eshi , kandjato kotumbi kupita dinyinga dyofotji, ene wa kuyipitha maghadhi no vinyu''. ⁷ Opa ndjwighana ghayandhurure thingangera thoghune, nayuvire diywi dyothivareka thothiyumi thoghune thakughamba ''wiye!''. ⁸ Kokumona kakambe kothina ghumbundu. Nomudhini wapo hamutire dina yifa, no ditungwedhi dyamukuthire. Hawapire ghuraghuri kuthofotji thoyine yopakaye, mukupagha nodimende, nodiyerenge, nomahamba ndani noyishereka yomukaye. ⁹ Opa ndjwighana ghayandhurure thingangera thoghukwoko, kokumona mwishi dhothinyaku mudhimu dhowa hapayire pamurandu ghonando dhaNyambi. noghushupi oghu hakarire nagho. ¹⁰ Hadirire nodiywi dyodikuru , ''rure rokukuma kupi, muraghuri ghoyinu yoyiheya, mupongoki noghushemwa, kate kupangura wahe awa hatunga pakaye, nokate kuwahumbitha kumanyinga ghetu?'' ¹¹ Munyima kehe hamupire thivata thothikenu, ndani hawatongwere eshi, hataterere muruvedhe rorufupi kamanana kate thirikanyethitara thowa haruwani hayendhagho nohaminagho owa nagho hakuwapaye. Thika nagho hapwire hapwire kupagha, hayitendire kemo. ¹² Opa ndjwighana ghayandhurure thingangera thoghukwoko nothofotji, namonine kwakarire makineno gho muve. Diyuwa dyakarire dinerupa yira ketji ghothikukumba nokaghonda kokuyara kavindiyere yira manyinga. ¹³ Nungwedhi dhokuwiru dhawire pamuve yira thitondo thoghukuyu ethi tharundumukire mbuyo dhodhishu kudingundunga dishokuru. ¹⁴ Diwiru dyakuhanyine yira mbapira edhi hanapeteka. Marundu ghomahe noyirudhi yahanyaghukire mumango ghayo. ¹⁵ Hafumu wahe hopamuve, hakamakuto, haraghuri, hatungi hakamangcamu no keheyu mupika endi ghohoro ghakuhorekire mwishi dhomawe mumarundu. ¹⁶ Haghambire kumarundu nokumawe eshi, muwere papetu mutundeke kurupara rwa yofotji royu ghahungumana padipuna , nokughupata wandjwighana. ¹⁷ Yoyishi diyuwa dishokuru dyoghukenya wendi ne ghuneya.