Thikurumingwa 4
1
Oyi ne mbadi ya hafithire Yona no gha patire thikuma.
2
Podiyo Yona gha raperire kwaNyambi ghuninga eshi, ''Nyambi, mbadi yoyi napo na ghambire oku shime muditunga dyetu nidi? Yo na shanene ni tjirere kuTarishishi yoyi-- yoyishi na dimukire eshi owe ne ghoNyambi ghomunongo, neke, mbadi kupata wangu no wakara no ruhakitho, ndani kutjindja maghano ghoye ghupire kuhumbitha hanu awa hana kuharura.
3
Pano keho, Nyambi, na kukanderera, ni paghe, hasha vene nife mbadi yira wa kupara.''
4
Nyambi gha ghambire eshi, ''Thiwana kenge ghuna pata we?
5
Podiyo Yona gha shwayire mumbara no ghaka hungumanine kumutara ghodiva dyombara. Ghaka tendire thishashara no gha hungumanine mo podiyo eshi gha mone eshi nye shoyihokokere mbara.
6
Nyambi gha royithire thitondo no gha thi tendire thi mene pawiru dhaYona podiyo eshi thi kare mumvure kumutwi wendi thimukunge kumutenya. Yona ne ghashamberire thikuma kuthitondo thiya.
7
Ene Nyambi ne gha tumine divinyo mathiku-thiku ghokurandako. Dya dire mudhi ghothitondo ndani thitondo tha kukutire no tha fire.
8
Yahokokire ngeno eshi apa dya vire diyuwa, Nyambi gha tumine mupepo ghoghuyenyu ghokudiva. Shime karo, diyuwa dyasheghenyene pamutwi waYona kare gha kashire Yona. Yona gha shanine kufa. Gha ghambire kukwendi thinda eshi, ''Hashe vene nife mbadi yira kupara.
9
Podiyo gha ghambire Nyambi kwaYona eshi, ''Yiwa we ghutokoteke thitondo ndi?'' Yona gha huthire eshi, ''Thiwana kenge natokota, ngambi kuyifa.''
10
Nyambi gha ghambire eshi, ''Ghuna vera neke thitondo, othi wa pira kughayera, endi ghuthi menithe. Tha menine mughuthiku no kufa mughuthiku.
11
Kukwange keho ne mbadi ni fere neke hakaNinive, dhiya mbara dhodhikuru, omu ha kara hanu ho kupitakana pa120,000 awa hapira kudimuka makutjakero ghonyara dhawo dhorudyo nodhorumoho, karo dhingi mo shemwa ngombe ndi?''