Thikurumingwa 3
1
Nando dhaNyambi dheyire kwaYona roghuwadi, ghuinga eshi,
2
''Wimane ghu yende kuNinive, mbara dhiya dhodhikuru, kawa yuvithere mbudhi dhi na kurawera ghuka yuvithe.''
3
Podiyo Yona ghemanine no gha yendire kuNinive, kukutha kunando dhaNyambi. Ninive ne mbara dhodhikuru dha karire, munu ne ghakona ndani kuyenda mayuwa mahatu gha pite mo.
4
Yona gha tangire kungena mumbara dhi no apa gha manine kuyenda diyuwa dyokutanga, gha kuyererire no gha ghambire eshi, ''Mayuwa makumi mane shoghapite ndani Ninive ne nanyi gha kuwe.''
5
Hakaninive ha tawire nando dhaNyambi no ha tokorire eshi kehe yuno gha kona kudhirerekedha. Wahe ha vatire yiketji yothikukumba, kutunderera kwawakamakuto no hokupira mudyo.
6
Mbudhi dhaka kumine kwafumu ghomuNinive. Gha shwayire padipuna dyendi, gha shuturire yitere yendi yoghufumu, no ghavatire thiketji thothikukumba, no kuhungumana pamututwi.
7
Gha tumine nando dhi dhaghambire eshi, ''MuNinive, paghuraghuri wafumu nohakareri wendi: 'Mwa tawedhere kehe munu endi thiyama mukudya endi kunwa meyu.
8
Ene muninge kehe munu nothiyama thipwe kuvateka noketji ghothikukumba no kurapera kwaNyambi. Ninge kehe yuno gha thiye ghuyi wendi no yinu yoyimango yi gha tenda.
9
Pamwe Nyambi kukona gha tjindje maghano ghendi no gha thiye ghupata wendi ghushokuru podiyo eshi mbadi tufe.'''
10
Nyambi gha monine yi ha tendire, eshi ghana thiyi maghuyi ghawo. Podiyo Nyambi gha tjindjire maghano ghendi yokuhamena kumahumbithero agha gha ghambire eshi nanyi gha kuwahumbithe, mbadi gha wa humbithire.