¹ Podigho, mumayuw gho noparuvedhe ro, apa na kahutha hatjwayuki waYuda naJerusalema, ² mbo kongawedha matunga ghomahe, nombona kawareta kuthikorogho thaJehoshafati. Kombo ni kawapangwera koko, pamurandu ghowanu wange noghupingwa wange Isiragheli, oyu ha watjere mukatji komatunga, no yoyishi hataghure ditunga dyange. ³ Ha tjwayura hanu wange hohengi, hatjindjitha mungaghughana nothikumbu, nohaghuritha mushengeteyaghana kuvinyu podigho eshi hanwe. ⁴ Pano, pashanye muna patera nange, Tironi, Sidoni nomikunda dhodhihe dhaFilistiya? Mbo muna ni ruwera ndi? Ngambi ngo mwa kuni ruwere, popo vene na kumuhuthera yiruwera yenu pamitwi dhenu. ⁵ Yoyishi mwashimba siliveri nongorondo wange, nomwareta yinu yange yoyiwa thikuma mamatembeli ghenu. ⁶ Mwa ghuritha hanu homu Juda naJerusalema kwawa Hirika, podigho eshi muwa shwayithe kokayenda nomuve wagho. ⁷ Mukenge, tamba niwa dhiruthe, kutunda kuya kudyango mwawa ghurithire, nombona hutha yiruwera yenu pamitwi dhenu. ⁸ Nanyi na kughurithe hanenu hoha tutughuru nohashengeteya, kunyara dhawanu homu Juda. Awo mbo hana kawa ghuritha kwawaSabiyani, kuditunga dyo kayenda, Fumu ne ghana mana kughamba.'' ⁹ Muyuvithe yino mukatji komatunga: ''Mukuroyithere mwathinda kuyita; mwimeke hatutughuru wenu hokutanara; muwaninge hahenye popepi; muninge hatutughuru wahe hoyita heye. ¹⁰ Mufure mayegho ghoyikekere yenu ghakare mamende nomamoko ghenu ghakare maghonga. Ninge hakashu haghambe eshi, 'Na tanara.' ¹¹ Mutambukerere nomwiye, mwahe mwe matunga ghopepi; mukukongawedhe mwahe kuno. Fumu, murete mangwenya ghenu ghashokuru. ¹² Ninge matunga gha kupinduthe ghathinda nogheye kumuronga waJehoshafati. Oko ne kona kahungumana naka pangure maunga ghomahe ghomaparaghumbo. ¹³ Muturemo thikeshitho, muyangu ne ghuna kumumo. Mwiye, mukame mandjambere, thikamitho ne thina yara. Tundimbe ne kuna kuhupaghuka, ghuyi wagho ne ghungipa thikuma.'' ¹⁴ Poghudi muyoyo gho kupimbanitha, muyoyo gho kupimbanitha mumuronga ghondhango. Yoyishi diyuwa dyaFumu ne dina kokera mumuronga ghondhango. ¹⁵ Diyuwa nokaghonda mbo yi nerupa, noningwedhi mbadi mbo dhi sheghenya. ¹⁶ Fumu mbo ghana kuyerera yira nyime muZiyoni, no kuyeyura diywi dyendi muJerusalema. Diwiru nokaye mbo yina kunyungu, ene Fumu mbo ghana kara mondo ghawanu wendi, nodyango dyokupira maghukukutu kwawanu ho muIsiragheli. ¹⁷ ''Podigho mwa kudimuka eshi Amene noFumu ghoNyambi wenu oyu gha tunga muZiyoni, dirundu dyange dyo kupongoka. Podigho Jerusalema gha kupongoka, nombadiko mashurundate gha kudjavweramo karo. ¹⁸ Nanyi mbo yi kare mudiyuwa dyo eshi marundu ne mbo ghana djudju vinyu gho mutowi, turundughana mbo tuna djudju manhwe, noyipungwera yoyihe mbo yina hupadhoka nomeyu, nombomuna poghomoka meyu mundhugho dhaFumu no kuvetera muronga gho muShittimu. ¹⁹ Egipute mbo ghana kara ditunga dyodimango edi hamwagherera, naEdomu mbo ghana kara muthighutu oghu hathigherera, pamurandu ghoghukore oghu hatenda kwawanu homu Juda, yoyishi hanotora manyinga ghawanu hokupira murandu muditunga dyawo. ²⁰ Ene muJuda ne mbo muna tungu hanu kuroruheya, nomuJerusalema mbo muna tungu hanu kutunda muhoko nomuhoko. ²¹ Mbo na hutha manyinga ghawo agha napira shime kuhutha, yodigho eshi Fumu ne muZioni ghatunga.''