¹ Shighe torombita muZiyoni, nodirithe alarumu padirundu dyange dyokupongoka! Ninge hanu wahe homuditunga dino hatutukwe nowoma, yoyishi diyuwa dyaFumu ne dina kumu; ghushemwa. adyo ne pepi didi. ² Adyo ne diyuwa dyomakokore nodikokore dishokuru, diyuwa dyomavuyi nodikokore dishokuru. Thika muvero gho diyuwa ghu washeghenyanga pamarundu, mashurundate hashawingi nongcamu ne pepi hadi. Mbadi kwakara mashurundate yira gho, nombadi mbo ha karako karo, ngambi munyima dhomuhoko dhodhingi. ³ Mudiro ne kuna kutumuke yoyihe eyi yidi kughutho wadyo, nomunyima ne maretha ghomudiro ghana kutumbuka. Muve ghudi yira thikwinino thaEdeni kughutho wadyo, ene munyima dhatho ne muthitu oghu ghuna pu kuhanyaghura kumudiro. Kemo, mbadiko ethi nga thi womba. ⁴ Kumoneka kwawamashurundate gha ne yira tukambe, no awo kutjira yira ghowa hana dhini patukambe. ⁵ Awo kuregha nomuyoyo yira gho tukara totukambe kuwiru dhomarundu, yira muyoyo ghomaretha ghomudiro gho kutumeka yithiki, yira mashurundate ghongcamu agha ghana kuroyithera yita. ⁶ Kughutho wagho hanu ne hadi muyinyanda yishokuru nomarupara ghawo ne ghana kutjindji. Ao kutjira yira hakayita hashokuru; ⁷ awo kudhina makuma yira haka yita; kuyenda kwawo, wahe mumuyira ghofotji, nombadi wa kutjora miyira dhawo. ⁸ No mbadiko oyu gho kuthindeka muyendhendi ghatunde mumurayini; awo kudjavura, keheyu mundhira dhendi; awo kutjora magindero ghawamwe ene mbadi wakutunda mumurayini wawo. ⁹ Awo kutambukera mumbara, kutjira padikuma, kudhina kumandhugho, nokupitera pamakende yira haka widhi. ¹⁰ Kaye kundandamena kughutho wagho, diwiru kututuma, diyuwa nokaghonda kukara dikokore, nonungwedhi kushagheka kutwedhima. ¹¹ Fumu gha yeyura diywi dyendi kughutho ghawa mashurundate ghendi, yoyigho eshi haka yita wendi ne hengi; awo ne ngcamu, awa hakumithangamo miragho dhendi. Kemo, diyuwa dyaFumu ne dikuru nodikukutu. Yidye gho kukona kudipara? ¹² ''Shime ngambi popano,'' ghana kughamba Fumu, ''Muhuke kukwange nomitjima dhenu dhodhihe. Mutambukerere, mudire, muguve.'' ¹³ Mutetaghure mitjima dhenu nombadi marwakani ghenu pithagho, nomuhuke kwaFumu Nyambi wenu. Ayene munongo noghakara nothineke, mbadi ghapatanga wangu noghakarerera muruhakitho, no ghana himi kutunda kutapa mahumbithero. ¹⁴ Yidye gha yidimuka? Mbo ghana piruka pamwe ghakukare nothineke, nokuthigha matungekero munyima dhendi, muyambo gho mbuto nomuyambo gho yinwa kwaFumu gho Nyambi wenu? ¹⁵ Shighe torombita muZioni, mwithe madhidhimekero ghokupongoka, nomakupakerero ghokupongoka. ¹⁶ Mukongwedhe hanu wahe; mwithe makupakerero ghokupongoka. Mukongwedhe hakuru wahe; mukongwedhe hanuke hohambiru notumbutututu. Muninge henga ghashwaghe mumangonda ghawo, nawa mbuyama awa hana kuroyithera kuyeka hatunde mumahemo ghawo. ¹⁷ Ninge haruti, hapika Fumu, hadire pakatji kothero nothinyaku. Ninge haghambe eshi, ''Thigherere hanu woye, Fumu, nombadi ghutende ghupingwa ghoye muthinu thokupira mudyo, eshi ditunga diwa sherere. Pashanye sho ha ghambere mukatji komatunga eshi, 'Kupi Nyambi wagho?''' ¹⁸ Podigho Nyambi ghahakire ditunga dyendi no yuvere neke hanu wendi. ¹⁹ Fumu gha huthire hanu wendi eshi, ''Mukenge, mbo na mu tumena mbuto, vinyu ghomupya, nomaghadhi. Mbo muna rikanyenena nayo, nombadi mbo ni mushwahura kughutho ghomatunga ghamwe. ²⁰ Mbo na tunditha haka nore ghokumbunda kayenda nenu, nombona watwara kuditunga dyokukutu edi hamwagherera. Mashurundate ghawo gho kughutho mbo ghana yendi kudikuruviya dyokudiva, nohakanyima mbo hana yendi kudikuruviya dyokuditokera. Munuko wagho mbo ghuna yeyuka, nomunuko ghoghumango mbo ghuna kuwedherera.'' Kemo, Aye gha tenda yinu yishokuru. ²¹ Mwayapa, mwaka ditunga; munyanyuke nomushamberere, yoyishi Fumu ne mbo ghana tendi yinu yoyikuru. ²² Mwayapa, amwe mwa yishereka! madyero ghomumuthitu ne mbo ghanemi, yitondo mbo yina shemi mbuyo, noyitondo yoghukuyu noyo mandjembere ne mbo yina shemi mbuyo mukuyarerera. ²³ Mushamberere, hanu homuZioni, mushamberere mwaFumu Nyambi wenu. Ayene ne mboghana mupa mvura ghopandombo nomboghana muretera yishavanganya, mvura ghopandombo nokwindha thika edi yakara. ²⁴ Mapurero ghenu mbo ghana yara mavumbukiro, notundimbe mbo tuna hupaghuka novinyu ghomupya nomaghadhi ghomapya. ²⁵ ''Mbona muhuthera ghaya mamwaka ghoyiyangura eyi dhadire dimba dhishokuru, dimba dho kumina, nodimba dhokuharanganya-mashurundate ghange ghongcamu agha natuma mukatji kenu. ²⁶ Mbo muna di thiwana nombo muna kuta, nokukugha dina dyaFumu Nyambi wenu, oyu gha tenda yitetukitha mukatji kenu, no mbadi mbo ni reta karo honyi kwawanu wange. ²⁷ Mbo muna dimuka eshi Ame ne mukatji kaIsiragheli nidi, noyame Fumu Nyambi wenu, nombadiko karo ghumwe, nombadi mbo ni reta karo honyi kwawanu wange. ²⁸ Mbo yina kara eshi mbo na poghomona mupepo wange kwawanu wahe, nohanenu hohangaghu nohohashengeteya mbo hana pumbu. Hakurupe hohakafumu mbohana roto yirota; Hatutughurughana mbo hana mono yimona. ²⁹ Nokwawa pika nohapika hohakamadi, mumayuwa gho mbo na poghomona mupepo wange. ³⁰ Mbo na nedha yitetukitha mudiwiru nomukaye, manyinga, mudiro, maghundhi ghomwithi. ³¹ Diyuwa mbo dina kara dikokore nokaghonda mbo kana kara manyinga, kughutho ghodiyuwa dyodikuro dyoghukukutu dyaFumu dyakwiya. ³² Mbo yina kara eshi kehe yu mbo ghetha dina dyaFumu ne mbo ghana pu kughamwena. Yodiyo pandundu dhaZioni nomuJerusalema mbo muna kara wa mbohomba, thika edi ghaghamba Fumu, nomukatji kowa mbohapara, awa ghetha Fumu.