¹ "Mwayendhange nomwawiha, mu teghere kumatjwathanithero ghange agha sho ni ghambe kukwenu.'' ² Apa dha yuvire mbunga Paghulusi ghana kughamba kukwagho mundimu dhoThiheburayi, ha karire muthipore. Gha ghambire eshi, ³ "No muJuda, na pwire kushamuruka muTasusi ghomuSiliya, ene na kuhongera momuno mumbara kumapadhi ghaGamaliyeli. Ame na pwire kurawera no kukutha thiwana miragho dhawa kerekandongo wetu. Ame na kara nodirura dyo kwaNyambi, thika edi mudi dyaro mwahe. ⁴ Nakuthakuthire ndhira ndhi kate kuyifa, kughanga no kutapa mukashitiko wahe hatutughuru nawambuyama, ⁵ dyodi mupristeri shokuru nawamayami wahe kukona hanongonone. Nawanine mambapira kushwagha kukwawo ghawatawi homu Damasikusi, no nayendire ko mukawahutha munwato muJerusalema mukunawahumbitha. ⁶ Yahokokire ngeno eshi opa nakarire muruyendo ro pepi naDamaskusi, kapupi kamanana kokunisheghenyena pamutwe katji thishe thothikuru thomudiwiru. ⁷ Nawerere pamuve no kuyuva diywi dina kughamba kukwange eshi, "Saulusi, Saghulusi, nye ghuna kuni kuthakuthera?" ⁸ Nahuthire eshi, ' yowedye ne fumu?' gha ghambire kukwange eshi, 'Yame Jesusi ghomukaNasareti yoyame yu ghuna kukuthakutha. ⁹ Hanu wa hakarire pofotji nange ha monine thishe thi, ene mbadi hatjwathanine diywi dyo yu gha ghambire kukwange. ¹⁰ Naghambire eshi; ''nye shonitende Fumu? Fumu gha ningire kukwange eshi, "Wimane no yende kuDamaskusi, oko ngaghuka pwe ngatongwera yinu yoyiheya eyi sho ka tende.'' ¹¹ Mbadi na konine kumona pamurandu ghothishe thothikuru thanisheghenyene. No napwire kuyenditha panyara dhoea nayendi nawo, nakahukire muDamaskusi. ¹² Kuya nakawanine katughuru ghodina Ananiasi, katughuru yu ghayapire Nyambi mukukutha kumuragho no hamughambire thiwana kukutha mwawaJuda wa hatungire mo. ¹³ Gheyire kukwange, noghanememanine kumbadi dhange, noghaghambire eshi; '' Mughendhange Saulus, ninge ghumone.' Dhodho viri dhofotji ghonamumonine. ¹⁴ Ghaghambire eshi; ' Nyambi wawakerekandongo wetu gha kutorora ghudimuke mahimeno ghendi, mukamona Ghomuhunga, nokuyuva diywi dyendi dyakushwagha mukanwa kendi. ¹⁵ Yoyi mbo ghunakara ghomuushupi wendi kwawanu wahe kuhatera yi wamonine noyi wayuvire. ¹⁶ Pashanye ghunakutaterera? Wimane, ghupwe kuyogha nokuyogha maharwero ghoye, witha dina dyendi.' ¹⁷ Munyima dhokahuka kuJerusalema, no kume pakuraperera mungirishe, yahokokire eshi gha ni pire thimona. ¹⁸ Na mumonine ghana kughamba kukwange eshi, 'Tambuke no shwaye muJerusalema popano, yoyishi mbadi sho ha kone kutambura ghushupi ghoye gho kukwange.' ¹⁹ Gho na muningire eshi, ''Fumu, naho hathinda ha yidimukire eshi yame nawaturire munwato no kupuma awa hatawire kukoye mukehe sinagoge. ²⁰ Apa gha notokire manyinga gha Stefanus gho kanonga koye, name nothinda po na karire na yimonine, nemanine po ghukwatithako, no na kungire yivata yowa ha mupayire.' ²¹ Ene gha ningire kukwange eshi, 'Yende, yoyishi na himi kukutuma kokayenda kwawaHayidena.''' ²² Ha mutegherere kate gha ghambire yi. Munyima po ha kuyerere ghughamba eshi, ''Muyakunuke kwamunu gho kenge mukakaye, mbadi gha royera eshi gha kare no moyo.'' ²³ Apa ha kuyererire, ghushutura yivata yawo, ghuyerutha rukungu mumupepo, ²⁴ mukuru wawa kayita gha rawere eshi, Paghulusi ghapwe kureta mumondo. Gha tapire marawero eshi ghapwe kwipudhura no kumwashura, no podiyo eshi yithinda gha dimuke eshi pashanye hana kumwimanganyena hanu kengeyo. ²⁵ Apa ha manine kumughanga nomughodhi, Paghulusi gha ghambire kwamukuru wawamashurundate awa hemaninepo eshi, ''Ha yi mufundhwera mu kumwashura katughuru oyu ghakara eshi muka Roma ndi oku mbadi hana mupangura?'' ²⁶ Apa gha yiyuvire mukuru wawamashurundate yi, gha yendire kwamukurun wawakayita no kughamba eshi, ''Yipi ghuna kushana ghu tende? Oyu katughuru ne mukakakoghatji kaRoma.'' ²⁷ Mukuru wawakayita gheyire no kughamba kwendi eshi, ''Ni tongwere, gho mukakakoghatji kaRoma ndi?'' Petrusi gha huthire eshi, ''Kemo.'' ²⁸ Mukuru wawakayita gha huthire eshi, ''Manyinga ghomengi natapire mukuwana kakoghatji ko.'' Ene Paghulusi gha ghambire eshi, ''Amene no mukakakoghatji ka.'' ²⁹ Munyima ha tutughuru wa ha shanine kumwipudhura ha muthiyire wangu-wangu. Na mukuru wawa kayita naye gha tutukwire, apa dimukire eshi Paghulusi ne mukakakoghatji kaRoma, yoyishi yodiye gha mu ghangire. ³⁰ Diyuwa dyokurandako, mukuru wawakayita gha shanine kudimuka ghushemwa kuhatera kwawaJuda kuyirundera yaPaghulusi. Paghulusi gha pwire kushutura no gha rawere hapristeri hashokuru nowahe ha kandhango mukukuwana. Munyima gha retire Paghulusi no kumwimeka pakatji kawo.