¹ Opa twa kuyakunukire nawo twayendire kudiya twashimbire ndhira kutamba kuthitata tha Cosi, nodiyuwa dyo kurandako kuthitatatha Rhodes, no kushwagha po kuthitata tha Patara. ² Apa twakawanine thikepa thina kutjinaghana ghutamba ku phonicia; twayendire kudiya notwakuthekire. ³ Munyima dho kukambekedha Cyprusi, kumuthiya kumutara ghorumoho dho thikepa, twakuthekire ku Syria no kathekera ku Tyra, oku thakashuruthere thikepa murongero wath. ⁴ Munyima twawanine hakathishongero, twakariremo mayuwa kwoko nomawadi; Kupitera mwamupepo ghokupongoka natwikere kumu kumbera Paulusi mukupira kuyenda ku Jerusalema. ⁵ Apa ghakapwire mayuwa ghetu, twashwayire nokutwikera ndhira dhetu no nawo wahe, nawambuyama wawo nohanawo hakupakerere netu tushwaghe muthitata . Ghotwakatongamene kumbombwa, twarapere, ⁶ no twakupire dirumeritho . Potwakuthekire nothikepa, na hahukire kudighumbo. ⁷ Opa twamanine kuvoghedha kushwagha Tyre, twakakumine ku Ptolemaisi. Oko twakarumerithire hatawi nokakara nawo diyuwa dyofotji. ⁸ Diyuwa dyo kurandako twashwayire no tuyenda ku Caesareya. Twa kengenine mudighumbo dyaPhilipusi, muevangeliste, oyu ghakarire ghofotji ghopawakwoko no hawadi; no twakarire nendi. ⁹ Katughuru yu ghakarire no hana hane hohakamadighana wa hapirire kukundama kwawatutughuru wa hapumbire. ¹⁰ Apa twakarire mo mayuwa, peyire katughuru yu ghatundere ku Judeya muporofeta ghodina Agabusi. ¹¹ Gheyire kukwetu no ghashimbire muya wa Paulusi. Ghakughangithireko maghuru ghendi nomoko nokughamba eshi, ''Dyoghunakughamba Mupepo Ghokupongoka, dyombohaghanga haJuda homu Jerusalema katughuru ghothinda shamuya, no mbo hanamutapa mumoko ghawahayidena.'''' ¹² Apa twa yi yuvire yinu yi, natwe nawanu awa ha tungire padyango diya twa mukumbere Paghulusi eshi mbadi gha yende kuJerusalema. ¹³ Munyima Paghulusi gha huthire eshi, ''Yipi muna kutenda, kudira no kuhayaghura mutjima wange? Ame na kuroyithera, mbadi mu kunighanga ngenyu, ene kufa ngenyu muJerusalema mudina dyaFumu Jesusi.'' ¹⁴ Dyodi ya karire eshi mbadiko oku ya gha konine kumuhongaghura, atwe twa karire teghete po twa ghambire eshi, ''Ninge mahimeno ghaFumu ha gha tende.'' ¹⁵ Munyima dhomayuwa gha, twa shimbire mandjato ghetu no twa yendire kuJerusalema. ¹⁶ Oku ko ha yendire netu ha ka thishongero kutunda kuCaesarea. Heyire na katughuru gho dina Mnason, katughuru ghomu Cyprus, mukathishongero gho kare. oyu sho tu kare nendi. ¹⁷ Apa twa ka kumine muJerusalema, hashere ha ka tambure no yishamberera. ¹⁸ Diyuwa dyo kurandako Paghulusi gha yendire na Jacobusi, nawa mayami wahe awa ha karirepo. ¹⁹ Apa gha wa morore, gha tongorire thofotji-thofotji yoyihe eyi gha tendire Nyambi kwawaHayidena kupitera muyiruwana yendi. ²⁰ Apa ha yiyuvire yi, ha kuyire Nyambi, no ha ghambire kukwendi eshi, ''Mone shi mushere, mayonvi mangatji ha tawire mukatji kawa Juda. Nawo wahe hashanine kupungura muragho. ²¹ Hawa tongwera yo kuhatera kukoye, eshi kuhonga haJuda wahe awa ha tunga mukatji kawa Hayidena mu kuthiya miragho dhaMosesi, no wa wa tongwera eshi mbadi hakona kenena hanawo, no mbadi ha kuthakuthe thitjo thawo. ²² Yipi sho tutende? Nawo nanyi ha kuyiyuve eshi namwe mweya kuno. ²³ Podigho eshi tende eyi tuna kutongwera. Tudi na ha tutughuru hahatu awa hana mana kwedhera. ²⁴ Shimbe ha tutughuru wa no kukenithe ghothinda munyima nawo hathinda, noghuruwere yirughanitha yawo podigho eshi ha kukurure mitwi dhawo. Podigho eshi kehe yu nanyi ghadimuke eshi eyi ha wa tongwera kuhatera kukoye ne mbango. Nanyi ha kuyitjwathane eshi nowe kukutha muragho. ²⁵ Ene kuhatera kwawaHayidena awa hatawa, twa wa tjangera mu kuwa rawera eshi ha kushwayithe kuyinu eyi ha yambitha kuyitjwandjo, kumanyinga, yothiikokotera norungu.'' ²⁶ Munyima Paghulusi gha shimbire hatutughuru wa, no diyuwa dyo kurandako gha kukushukithire pofotji nawo. Munyima pohengenine mungirishe, no kuwadimukitha mayuwa gho kukukushukitha ha kughakumithemo no muyambo ha kughuwa tendere wahe. ²⁷ Munyima dhomayuwa kwoko nomawadi. haJuda hamwe hokuAsiya, ha monine Paghulusi mungirishe, hadhodhengire mbunga no ha turire manyara ghawo papendi. ²⁸ Awo ha kuyererire eshi, ''Mwa tutughuru waIsraeli, mutughamwene. Oyu ne yo katughuru oyu gha honganga hanu yo kuhatera kunyatha hanu muragho modi dyango. Kushwayithako yo, aye karo gha reta ghaHirika mungirishe no karo gha nyateka dino dyango dyo kupongoka.'' ²⁹ Awo hamonine pakutanga Trophimus mukaEfesusi nendi munurumbara, no ha ghayarire eshi Paghulusi gha mu retire mungirishe. ³⁰ Nurumbara dhodhihe dhashambererire, no hanu hatjirire pofotji no haka kwatire Paghulusi. Awo ha mu kokire panunda dho ngirishe, nomathero ha gha yandhere. ³¹ Apa ha yerekire kumupagha, mbudhi dheyire bkwamukuru wawakungi eshi Jerusalema ne muthivunganyi ghadi. ³² Popo vene gha shimbire hakayita no mukuru wawamashurundate no ha tjirire kumbunga, apa ha monine hanu mukuru wawakayita nawa kayita, hashayekire kupuma Paghulusi. ³³ Munyima mukuru wawa mashurundate gha henyine no kukwata Paghulusi no gha warawere eshi ha mu ghange nomenge mawadi. No gha mwipurire eshi yodiye dye no nye gha tenda. ³⁴ Hamwe mumbunga ha kuyererire thinu thofotji no hamwe yayo. Apa gha yimonine mukuru wawamashurundate mbadi ghana kumona mo ghushemwa pamurandu gho muyoyo, no gha kumbere Paghulusi ha murete mumondo. ³⁵ Apa gheyire pathidhineno, ha mu shimbire hama shurundate pamurandu gho divoshera dyawanu. ³⁶ Mbunga dhawanu dha kuthire munyima ghu kuyerera eshi, ''Mushwaye kukwendi!'' ³⁷ Paghulusi mukumureta mumondo, gha ghambire kwamukuru wawamashurundate eshi, ''Kukona ni ghambe yinu kukoye ndi?'' Mukuru wawamashurundate gha muhuthire eshi, ''Kughamba we Thihirika? ³⁸ Mbadi yowe ya muka Egipute ghumwe oyu ghemanganyene no kupiteritha hanu mayovi mane mu kupagha hanu mumaboreya? ³⁹ Paghulusi gha ghambire eshi, ''Amene no muJuda munurumbara dhaTarususi muSilisiya. Amene no mu kakakoghatji ko nurumbara dhomudyo. Na kukanderera, ni tawedhere ni ghambe nawanu.'' ⁴⁰ Mukuru wawamashurundate gha mupire matawedhero, Paghulusi ghemanine pathidhineno no gha ravire dyoko dyendi kwawanu, Apa ha porere wahe, gha ghambire nawo mundimi dhoThiheburayi. Gha ghambire eshi,