¹ Hanu hamwe hatundire muJudeya kuAntioka no kuhonga hatawi ghughamba eshi, ''Shimngwa oyu ha kena kukutha muragho waMosesi, mbadi mbo pwa kughamwena.'' ² Eyi ya turire Paghulusi naBarnabasi munanani dhodhikuru pakatji kawo. Podigho haPaghulusi naBarnabasi hawa torore hayende kate kuJerusalema ha ka kuwane nawa apostoli nawamayami kudipwero di. ³ Podigho awo, pakuwatuma ngirishe, hapitire muFonisiya naSamaria hayuvithire mapirukero ghawa Hayidena. Ha retire yishamberera kwawa tawi wahe. ⁴ Apa heyire kuJerusalema, dha ka watumburire ngirishe, ha apostoli nawa mayami, noha yuvithire yoyihe eyi ghawa tendera Nyambi wahe. ⁵ Hatutughuru hamwe awa ha tawire, awa ha hatere kumbunga dhawa Farasayi, hemanine no kughamba eshi, ''Yaroghera kuwa kena no kuwarawera ha kuthe miragho dhaMosesi.'' ⁶ Podigho ha apostoli nawa mayami hapongire mukukengurura yinu yi. ⁷ Munyima dho nanani, Petrusi ghemanine ghaghambire kukwawo eshi; ''Mwatawi, mwadimuka eshi kapupi kamanana panakapita Nyambi ghatapire thitorora mumwenu kupitera mukanwa kange hahayidena hayuve mbudhi dhodhiwa, nohatawe. ⁸ Nyambi yu ghadimuka mutjima ghatapire ghushupi kukwawo pakuwapa Mupepo Ghokupongoka thika kenge ghayitendire kukwetu. ⁹ Mbadi ghaturire makutjakero pakatji ketu nawo, mukukenitha mitjima dhawo pamatawero. ¹⁰ Napo pashanye munakuyerekera Nyambi, pakukutera djoko pamathingo ghawakathishongero edhi hapirire kukona hakerekandongo wetu natwe? ¹¹ Ene twatawa eshi mbotunapu kughamwena kupitera muthinyeke thafumu Jesusi, thika kenge hakarire wo. ¹² Mbunga dhodhihe dhaporere ghutegherera kwaBarnabas na Paulusi ghatapire yidimukitho no yitetukitho yi ghrughanine Nyambi mukatji kawahayidena kupitera mumwawo. ¹³ Munyima dhokushagheka kughamb, Jacobusi ghahuthire, ghamba eshi, ''Mwatawi, munitegherere. ¹⁴ Simoni ghatongore ngepi ghaghamwene Nyambi hahayidena muthineke thendi nothitambo eshi ghatumburemo hanu kudina dyendi. ¹⁵ Manando ghawaporofeta ghanakughu noghano thika di hayitjanga, ¹⁶ munyima dhoyinu yi mbonahuka, no mboninatendi karo thidyero thaDaviti thi thawa ; mbonemeka nokuhutherapo yoyihe yi yayipa. ¹⁷ Awa hakuthiyarako mbohanashana Nyambi pofotji nawa hayidena awa netha mudina dyange.' ¹⁸ oyi ne yoghaghambire Fumu eshi, koyu ghadimuka yitenda yendi kutunda ruvedhe rokare. ¹⁹ Podigho thiturithapo thange eshi mbadi twakona kuhumbitha hahayidena owa hana piruka kwaNyambi. ²⁰ Ene mbotunawatjangera eshi hakona kushwagha kudidhiro dyoyitjwandjo, kurungu, kunyama dhoyiyama yokukufera, nokughunyinga. ²¹ Mosesi ghayiyuvithire mukehe thitata muruvedhe rokare noghayiyaghurire muma sinagoge kehe sabata. ²² Nani ghoyamonekire ghuwa kwawapostoli nokwawamayami, nongirishe dhodhiheya, mukutorora Judasi yuhethire shi Barnabasi, naSilasi owa hakarire hakuru ghongirishe, nokuwatuma ku Antiokiya naPaulusi na Barnabas. ²³ Hatjangire yino eshi; '' kwawapostoli nomayami, hatawi haghendhenu, nokwawahayidena ghohawawi muAntiokiya, Siriya, nomu Ciliciya: Dirumeritho! ²⁴ Yoyishi twayuvire eshi hanu hamweya mbadimo mukatji ketu, no hamupetha noyihonga yi yakupambanitha midhimu dhenu. ²⁵ Yamoneka ghuhunga kukwetu, twe twakara nomaghano ghofotji, mukutorora hanu hokutuma kukwenu nawayendhetu hohahakwa Barnabas na Paulusi, ²⁶ harume wa hata moyo dhawo pamurandu ghodina dya Fumu wetu Jesusi kristus. ²⁷ Podiyo tunakutuma Judasi na Silasi, awa hakunamutongwera hathinda yinu yofotji mumanando ghawo. ²⁸ Yamonekire ghuwa kwa Mupepo Ghokupongoka nokukwetu, mukudhira kumupa murongero ghoghukuru kupiterera yi yidi mudyo; ²⁹ eshi muyakunuke kuyinu yi hatupura kuyitjwandjo, ghuninga, yinu yokukufera, no rungu. Ngeshi ghamukuyakunutha mwathinda kuyinu yi, mboyinakara ghuwa nenu. Muthiyarepo.'' ³⁰ Awo opa hawathiyire heyire kuAntiokiya; munyima dhokughongawedha mbunga dhawanu pofotji, hawapire mbapira. ³¹ Pakumana kudhitoya, hashambererire thikuma pamurandu ghomatjokedhero. ³² Judasi naSilasi, nohaporofeta, hatjokedhire hatawi no manando ghomengi no kuwatanaritha. ³³ Munyima dhokanako ghana, hawatumine hashwaghe mwawatawi hahuke kowa hawatumine. ³⁴ Silasi ghashanine eshi ghathiyare. ³⁵ Ene paulusi na Barnabas hakarire muAntiyokiya, ghuhonga nokuyuvitha (nohanu hamweya) nando dhaFumu. ³⁶ Munyima dhomayuwa ghongandji Paulusi ghaningire kwa Barnabasi eshi, ''Tuyende keho no kadhingura hatawi mu yitata yoyihe mu twayuvithere nando dhaFumu, notukamone eshi ngepi hadi.'' ³⁷ Barnabasi ghashanine eshi ngo hashimbire naJohanesi yu hethire shi Markusi. ³⁸ Ene Paulus mbadi ghayighayarire eshi thiwana kushimba Markusi yu ghakawathiyire mu Pamphylia nombadi ghatwikere karo kurughana nawo. ³⁹ Dhakarirepo nanani dhodhikuru pakatji kawo podigho eshi hakuyakunuke, na Barnabas ghashimbire Markusi noghakakuthekire hayende kuCyprusi. ⁴⁰ Ene Paulusi ghatororire Silasi no hashwayirepo munyima dhokuwakuruperitha hatawi kuthinyeke thaFumu. ⁴¹ Ghoghayendire dha Syria na Cilicia, ghutanaritha mangirishe.