¹ Apa hakarire muIkonighumbu haPaghulusi naBarnabasi hengenine musinagoge wawaJuda, mundhira edhi dhaningithire hanu hohengi haJuda nawaHirika hatawe. ² Ene haJuda awa hapirire kutawa hadhongere maghano hawaJuda nohawa tendire hatjitjupithe hatawi. ³ Ha karirepo nako dhodhingi, ha ghambire ghudhundeka ngcamu dhaFumu, nokutapa ghushupi gho kuhatera kumbudhi dhothineke. Ha rughanine mukutapa yidimukitho noyitetukitho kupitera munyara dhaPaghulusi naBarnabasi. ⁴ Ene hanu homumbara ha kutaghurire; hamwe hahatere kwawaJuda, hamwe kwawa apostoli. ⁵ Wahe haHayidena nawa Juda (pofotji nawa piterithi wawo) hayerekire kuwapetha no kuwa vukuma mawe, ⁶ ene apa ha yi nongonone yi, hatjirere kumbara dhaLycanaonian naDerbe nokudhimikunda edhi dhakarire pepi, ⁷ oku ha ka twarire kughutho kuyuvitha mbudhi dhodhiwa. ⁸ KuLystra katughuru ghumwe ghahungumanine, ghapirire ngcamu mumaghuru ghendi, thirema kutunda mushamurukero, aye shime gha shemwa kuyenda. ⁹ Murume yu gha yuvire Paghulusi ghana kughamba. Paghulusi gha munungurukire no ghamumonine eshi gha karire nomatawero gho kumwirura. ¹⁰ Ghaghambire nendi nodiywi dyo kwiyuka eshi, ''Wimane pamapadhi ghoye.'' Murume yu gha reyire muwiru nogha tangire kuyenda. ¹¹ Apa dhamonine mbunga eyi ghabtendire Paghulusi, hayeyure maywi ghawo no kughamba mundimi dhomuLycaonia eshi, ''Hanyambi hombango hana twiyera muthishwi thomunu.'' ¹² Hethire Barnabasi eshi ''Zeus'' no Paghulusa ''Hermes,'' yoyishi yodiye gha karire mughambi shokuru. ¹³ Mupristeri waZeus, awa hakarire no ngirishe panunda dhonurumbara, haretire mahove nomitemo kuthero; naye nombunga kwashanine kutapa muyambo. ¹⁴ Ene apa ha yi yuvire ha apostoli , Barnabasi naPaghulusi, hadjadjaghure yishupata yawo no kutjirera wangu mumbunga, ghudira, ¹⁵ ''Mwanu, nye muna kuyitendera yi? natwe twahanu, yira yamwe. Kuna kumuyuvithera mbudhi dhodhiwa, shi mushwaye mushwaye kuyinu yoyimango muhuke kwaNyambi, oyu ghavarekire diwiru, kaye, dikuruviya noyoyihe eyi yakara mo. ¹⁶ Pakare, gha tawedhere dhimuhoko dhodhihe dhipare dyodi dhahimine. ¹⁷ Ene shime, ghatapire ghushupi kuyinu yoyihe eyi gha tendire, omu gha tendire yoyihungu mukumupa mvura no kutapa thivaka thomuyangu dhodhikuru, kuyaritha mitjima dhenu noyidya noyishamberera.'' ¹⁸ Ngambi nomanando gha, Paghulusi naBarnabasi mbadi ha konine kushinga mbunga dhiya eshi mbadi ha djumbere muyambo kukwagho. ¹⁹ Ene haJuda hamwe ho kuAntioka nokuIkonium heyire nohahongaghure mbunga dhiya. Havukumine Paghulusi nomawe no hamupurundundire panunda dhombara, ghughayara eshi ghana fu. ²⁰ Oku shime hana mwimanena hakathishongero kumbadi dhendi, ghemanine no ghaka ngenine mumbara. Diyuwa dyo kurandako, gha yendire kuDerbe naBarnabasi. ²¹ Munyima dhokuyuvitha mbudhi dhodhiwa nokuwana haka thishongero, ha hukire kuListra, Ikonium, no kuAntioka. ²² Ha twarire kughutho kutanaritha midhimu dhawa kathishongero no kuwa tjokedha mukukara mumatawero ghughamba eshi, ''Twa kona kwingena mughuFumu waNyambi kupitera muyinyanda.'' ²³ Pakumana kutorora hapiterithi mukehe ngirishe, harapererire no kudhirerekedha, ghawa tapire kughutho waNyambi, omu ha tawire. ²⁴ Po ha pitire mumukunda waPisidia no heyire kuPamphylia. ²⁵ Apa ha ka yivithire nando dhendi muPerga, ha ghurumukire kuAttaliya. ²⁶ Kushwagha po ha voghedhire hayende kuAntiok, oku ha kutapire kuthineke thaNyambi kuyirughana eyi hamanine kurughana. ²⁷ Apa ha ka kumine kuAntiok no kaghongawedha ngirishe pofotji, ha ka tongorire yinu yoyihe eyi gha wa ruwanene Nyambi, no ngepi edi gha yandhwere ndhira kwawahayidena. ²⁸ Ha ka dhighaminemo nawa kathishongero.