¹ Pamurandu shi twakara no ghu minisiteri, no thika di twa tambura neke, mbadi tuna kukasha. ² Mudyango dyo, twa shwena mandhira ghoghudhindo no ghothihonyi. Mbadi tuna kuyenda mughumbango, no mbadi tuna kupemukitha nando dhaNyambi. Mukuneghedhitha ghushemwa, tuna kukushupera twathinda kuyighayara ya kehe yuno mu meho ghaNyambi. ³ Ene ngeshi mbudhi dhetu dhodhiwa ne hadhifika, kwadhifika ngenyu ko wa hana kufa. ⁴ Mumwagho keho, Nyambi ghokaye kano ne ghafika maghano ghawo ghokupira kutawa. Yitunda mo keho ne, mbadi hana kukona kumona thishe thombudhi dhodhiwa tho ghurwedhima waKristusi, oyu gha kara eshi yo thishwi thaNyambi. ⁵ Atwe ne mbadi twa thinda tuna kuyuvithanga, ene Kristusi Jesusi eshi Fumu, no twathinda eshi twa pikenu pamurandu waJesusi. ⁶ Nyambi ne yoghaghambire eshi, ''Thishe mbo thina muneka mudikokore.'' Gha muneka mumitjima dhetu gha tape thishe thoghudimuki thofumwa dhaNyambi mumakarero ghaJesusi Kristusi. ⁷ Atwe twakara noghushwi ghuno mutundimbe toghuma, podiyo eshi yina keni eshi ngcamu dhokupitakanena ne dhahatera kwaNyambi no mbadi kukwetu. ⁸ Tuna kunyanda mukehe ndhira, ene mbadi tuna tovoha. Tuna pambana, ene mbadi tuna tovoha. ⁹ Hana kutukutha-kutha ene mbadi gha tu mwagha, kutuwithera pamuve ene mbadi kutudhongonona; ¹⁰ kehe pano twe kushimba muyirama yetu yifa yaJesusi, podiyo eshi ghuparo waJesusi ne ngo ghupwe kuneghedha muyirama yetu. ¹¹ Atwe twayumi ne kehe pano kututapa kuyifa pamurandu waJesusi, podiyo eshi ghuparo waJesusi ne ngo ghu kuneghe muyirama yetu yokufa. ¹² Yifa keho ne kuna kurughana mumwetu, ene moyo ne kuna kurughana mumwenu. ¹³ Ene twakara nomupepo ghofotji ghomakurupero kukutha koyi ha tjangire: ''Na tawa, no naghambire.'' Natwe karo twatawa, no tuna kughamba, ¹⁴ yoyishi twa dimuka eshi oyu gha tumine Fumu Jesusi ne mbo ghana tu tumuna pofotji naJesusi no ka tureta nenu mumakarero ghendi. ¹⁵ Yoyihe ne pamurandu wenu, podiyo eshi thineke thi thina kuwana huna ho hengi ne ngo thitendithe matapero ghondangi ghakuwedherere kufumwa dhaNyambi. ¹⁶ Podiyo tuna kupira kutovoha. Ngambi kenge tuna kuyonda panunda, mwishi ne kuna kututendurura kehe diyuwa. ¹⁷ Poruno ruvedhe, yinyanda yi ne kuna kuturoyithera yinu yofumwa yokuroruheya eyi ya piterera yimetithera yoyihe. ¹⁸ Atwe mbadi tuna kukambedheka yinu yokumona, ene ko yinu yokupira kumona. Yinu yokumona ne yopopano ngenyu, ene yokupira kumona ne yokuroruheya.