¹ Kuna kutanga kukutanaghura twa thinda ndi? Mbadi twa nyanda marukwaro ghoghushupi gho kukwenu endi gho kukwetu, thika kenge hamweya, twa shana ndi? ² Amwe mwathinda ne yamwe marukwaro gho ghushupi oghu ha tjanga mumitjima dhetu, haghadimuka no kughatoya hanu wahe. ³ Mwa kuneya kare eshi amwene mwarukwaro rwaKristusi, yoyitundamo yoyirughana yetu. Mbadi hayi tjangire no Ingi ene paMupepo waNyambi ghomuyumi. Mbadi hagha tjangerire payikwere yo diwe, ene payikwere yomitjima dhawanu. ⁴ Oghu ne ghoghutjima ghu twakara nagho kupitera mwaKristusi kughutho waNyambi. ⁵ Mbadi twa kumenenamo twathinda yo kukupa keheyi yira kukwetu yatunda. Ene yikumithamo yetu ne kwaNyambi yatunda. ⁶ Nyambi vene yogha tutenda tukare twapikendi gho ghundambo ghoghupya. Oghu ghundambo ne mbadi gho rukwaro ene waMupepo. Yoyishi rukwaro ne kupagha ene Mupepo ne kutupa moyo. ⁷ Pano yirughana yayifa- hayitjangire mumarukwaro pamawe- kweyire noghurwedhima ghoghukuru kare hakaIsragheli mbadi hakonine kukungurukera kurupara rwaMosesi. Yoyishi rupara rwendi rwa rwedhimine thikuma, kurwedhima kwadhingunukire. ⁸ Ngepi ne keho mbo ghukara ghurwedhima ghushokuru gho yirughana yaMupepo? ⁹ No ngeshi yirughana yo kutetera ndhango yakarire noghurwedhima, ngepi ne keho edi wa kukara ghurwedhima gho yirughana yo ghuhungami! ¹⁰ Ghushemwa, koyiya gha tendire ya karire no ghurwedhima ghushokuru ene pano ne mbadi yina kufrwedhima shime, pamurandu gho kurwedhima oghu waghupitakana. ¹¹ No ngeshi yiya yo kudhongonoka yakarire no ghurwedhima, ngepi keho ne kughukuru wakukara gho ghurwedhima gho kukarererapo! ¹² Thika edi tudi no makurupero gho kengeya, tudi no ghutjima ghushokuru. ¹³ Atwene mbadi yira Mosesi, oyu gha fikire rupara rwendi podigho eshi haka Isragheli hapire kukenga nunu kughuhura ghothishe ethi thadhongonokire. ¹⁴ Ene maghano ghawo gha karire ghuthuta. Kate pashadyarero, apa hana toyanga ghundambo ghoghukurukuru ne, thihina thiya tho rudhi rofotji shime thakarera. Mbadi hathi shwayithako, yoyishi shimengwa mwaKristusi pithamo moha thishwayithererapo. ¹⁵ Ene ngambi pashadyarero, apa hana kutoya Mosesi, thikehe thi kufika mitjima dhawo. ¹⁶ Ene neshi munu ghahuka kwaFumu, thikehe ghana kuthi tundithapo. ¹⁷ Pano Fumu ne Mupepo. Oku ghudi Mupepo waFumu ne, kwakara mashutukero. ¹⁸ Pano twaheya, nomarupara gho kupira kufika, kumona ghurwedhima waNyambi. Hatu tjindjurura noghurwedhima gho kupitura kutunda kunaro dhimweya no kuyenda panaro dhimweya, thika edi ya tunda kwaFumu, ayene yo Mupepo.