¹ Ame anu mono nka liwiru lyalipe na livhu lya lipe, liwiru lya kuhova na livhu lya kuhova alidongonokapo, ntani lifuta kapi nka lya kalirepo. ² Ame makura anu mono shitata shakupongoka, Jerusalemu ya yipe, kuna kusheumuka yitunde muliwiru kwa Karunga, kuna yi wapayiki yira momu vadwatekanga mukamali wa likwareko ana kuyendo kwa vyendi. ³ Ame makura anu yuvhu liywi lyalinene kuna kutunda muliwiru ku shipundi sha uhompa kuna kutunda ashi, ''Kengenu! Ndjugho ya Karunga yina yatiki mu vantu vendi, ghuye ngatunga na vantu vendi. Vavo ngava kara muhoko wa Karunga, Karunga mwene ngakara muvantu vendi ntani vantu vendi ngava kara mwa Karunga wavo. ⁴ Karunga nga kokota maruntjodi ghavo na ghantje ghatunde ko kushipara shavo, mfa kapi ngadi karako nka waro, naliguvo, namalira nkali, natni na kukora. Kapi ngavi karako. Mbyovyoshi vininke vya muhoko ngavi dongonokapo. ⁵ Oghu ashungiro kudhipundi sha uhompa aghamba ashi, ''Kengenu! Ame kuna kutura navintje vikare vyavipe.'' Ghuye atantere nka ashi, ''Tjanga vino mbyovyoshi dino nkango da ushili da lihuguvaro.'' ⁶ Ghuye antantere nka ashi, ''Vino navntje vina pu! Ame Alfa na Omega, Ame ntundiliro na uhura. Kehe uno ana kufo linota ngakanwa mema gha kupupa mumukuro wa monyo maghoko-ghoko mema gha liparu. ⁷ Kehe uno ngafundo ngawana upingwa na untje, Ame nganu kara Karunga wendi, ntani uye ngakara monande. ⁸ Ano ngoli kumbinga ya magova, na va vakupira lipuro, navo vakunyateko, nava dipayi, navo varushonda, nava vavapure, navakareli vaKarunga vavimpempa navantje, nava kavimpmpa, vavo kuna kuva taterera likurudiva lya kutwera mundiro wa mawe gha mundiro. Dino ndo mfa da Uviri. ⁹ Ghumwe wava Engeli aya kukwande, oghu akwatiliro shisha sha mahepeko gha utano-na uviri gha kuhulilira, aya kukwande aghamba ashi, '' Y kuno. Nuya kuneyede mufuko, mukamali wa likwareko wa ndjwighona.'' ¹⁰ Makura mpepo ya Karunga ayi ndamuna yintware mumpepo makura mu Engeli antwara kundundu ya yire unene aka neyede shitata sha kupongoka Jerusalemu oyi yina kutundo muliwiru kwa Karunga kuna kusheumuka. ¹¹ Mu Jerusalemu kwa yuramo uyerere wa Karunga, ntani ukenu wamo kupayima unene yira liwe lya diyamande ya ndiro lya pitakano naghantje, lya kufana yira liwe lya Jasipasi, oli lya vemberango yira likende lya kilisitare. ¹² Shitata kwa kalire na rugumbo rwa runene, rwa rure unene na marungavero murongo na maviri, ntani na va Engeli murongo nava viri vakukunga marungavero. Pamarungavero kwa tjangapo madina murongo na maviri gha malira ghava Israeli. ¹³ Kuviha vya upumeyuva kwa kalireko marungavero matatu, kuruha rwa mukuro kwa kalireko mavero matatu, kurha rwa utokero kwa kalireko mavero matatu. ¹⁴ Likuma lya shitata kwali tungira palitateko lya mawe murongo na maviri, ano kehe pano paliwe kwatjangapo madina ghava Apostoli murongo navaviri vandjwighona. ¹⁵ Mu Engeli oghu aghambiro name ghuye kwa kwatililire shifanikito na shimetito sha mpango ya ngorodo amete shitata, na marungavero ghasho, ntani na likuma lyasho. ¹⁶ Shitata kwa shidika shikare shahukane; shinema shamunaure shakushetakana na shinema shamunaupati. Mu Engeli kwa metire shinema sha shitata na mpango, makura awana shinema sha kutika ku kilometa mayovi maviri ( munaure, na munaupati na mumutika). ¹⁷ Mu Engeli amete nka mutika wa likuma, mutika wa likuma kwatikire pa metera dimurongo ntano-na yimwendino ndo metera varuwanitire vantu ( ndo nka waro aruwanitire mu Engeli). ¹⁸ Likuma lya shitata kwalitungire na mawe ghandiro gha Jasipasi ntani shitata shene kwa shiruwana na ngorodo yene-yene yakahuroko, ya kufana yira likende lya likenu. ¹⁹ Litateko lya shitata kwa shitatekera pa mawe ghandiro gha kukushuva-shuva. Liwe lya kuhova lya Diyamende ya Jasipasi, lya uviri lya Safira, lya utatu lya Agate, lya une lya Simaradi, ²⁰ lya utano lya Serenedonisiki,lya utano-na umwe lya Sarediyoni, lya utano-na uviri lya Kilisonalite, lya utano-na utatu lya Bereli, lya utano-na une lya Topasi, lya murongo lya Kilisoparasusi, lya murongo nali mwe lya Hiyasinte, ntani lya murongo na maviri lya ametusite. ²¹ Marungavero murongo na maviri gha shitata kwa kalire makwarara gha ndiro murongo-na maviri; kehe lino lirungavero kwa kalire likwarara limwe. Ndjira da mushitata kwa diruwana na ngorodo yene-yene, ya kufana yira likende. ²² Ame kapi namonine mo Ntembeli mu shitata, mbyovyoshi Hompa Karunga muna nkondo nadintje kumwe na ndjwighona mbo Ntembeli yamo. ²³ Shitata kapi sha hepa liyuva ndi kakwedi ashi litemenemo mukondashi uyerere wa Karunga ngo wakutemenamo, ntani ndjwighona ndjo ramba yamo. ²⁴ Dimuhoko damu udjuni ngadi yendera mu ukenu wamu shitata. Ntani vahompa vamu udjuni ngava yita mo limona lyavo. ²⁵ Marungavero ghamushitata ngagha paturuka shirugho nashintje, mukondashi matiku kapi nka ngagha karako. ²⁶ Vavo ngava yitamo mfumwa na uyerere wa dimuhoko, ²⁷ Kehe vino vya kunyata kapi ngavi ngenamo, kumwe navo vakuruwana vihuna na vimpempa navoshi, nkwandi mbovo tupu vatjanga madina ghavo mubuke ya monyo ya ndjwighona tupu.