¹ Tjangera muEngeli wambunga Kriste yamu Efeso ashi: Dino ndo nkango daghu ana kwaterero mbungururu ntano-nambiri muliwoko lyendi lya rulyo ntani ogho ana kuyendo pakatji kama uyweko gharamba matano namaviri gha ngorodo ashi, '' ² Ame nayiva virughana vyoye, naghudito ghoye, ntani nalididimiko lyoye, ntani nayiva ashi kapi wakengereranga vantu vavadona, ano ngoli ove kuvasheteka ovo vakutwenyango vavene ashi vaApostoli, vavo vahana kukara ashi mbo, mbyo wavamona ashi vavo ashi vaApostoli vavipempa. ³ Ame nayiva lididimiko lyoye namu washimba maghudito ghamangi mukonda yalidina lyande, ano ngoli kapi waroroka. ⁴ Ano ngoli ame nakara naudito nove mbyovyoshi kapi ghunakara nashihoro name yira momu wakalire nashihoro shakuhova. ⁵ Vhuruka ashi kuninko oko watunda. kushighure ghurughane ovyo kaghurughananga pamuhovo. Ntjene kapi ghuna kukushighura, ndi nganuya nuya kughupepo ntani nganuyaghupepo nka Uyweko ghoye waramba palivhango lyagho. ⁶ Ovyo wakara navyo vyaviwa mbyevino: Ove wanyenga virughana vya Vanikolayite, yira momu navinyenga name. ⁷ Ogho akaro namatwi, ayuvhe ovyo yina kutanta mpepo kumbunga Kriste. Kwa kehe ghuno ana kufundo nganukamurenka ngakalye kushitondo sha monyo, osho shakaro mushikunino sha Karunga.''' ⁸ ''Tjangera muEngeli wambunga Kriste ya Simerena ashi: ' Dino ndo nkango daghu wakuhoverera ntani ndje wakuhulilira, ghuye kwafire ano ngoli ntantani weno ghuye ana kara namonyo: ⁹ '' Ame nayiva ghudito ghoye naruhepo roye, ano ngoli ove ghumungavo. Ame nayiva ovyo vamurundira vantu ovo vakutwenyango vavene ashi vavo vaJuda, ano ngoli vavo kapishi vaJuda. Vavo vambunga yaSatana. ¹⁰ Kapishi ngamutjire mahepeko ogho ngaghamuwano. Kengenu! Mudjonauli ngatura vaunyenu vamwe mudorongo ntani anwe ngamukara mumasheteko, anwe ngamukara mumaudito mayuva murongo. ,Kara nalipuro ghulimburukwe dogoro kumfa, ame nganuka kupa nkata yamonyo. ¹¹ Kehe ghuno akaro namatwi, ayuvhe ovyo yina kutanta mpepo kumbunga Kriste. Kehe ghuno ana kufundo kapi ngadikamuyitira udito mfa da uviri.''' ¹² '' Tjangera muEngeli wambunga Kriste yaPeregamu ash: Odino ndo nkango dagfhu akaro narufuro rwarutwe rwakuteta kuviri: '' ¹³ Ame nayiva ko kulivhango oko watunga, nko shakara shipundi sha Satana sha Uhompa. Ano ngoli ove mbyo wakwaterera lidina lyande. Ame nayiva ashi kapi washuva lipuro lyoye lya kukwande, nampili mumayuva gha Antipasi mukareli nambangi yande, walipuro lyalinene, ogho vadipayire mo mukatji kenu, nkoko atunga Satana. ¹⁴ Ano ngoli nakara navininke ovyo nashana nukuvyuke mbyovino ashi: Mpovali vamwe shimpe nda vakwaterera kumarongo gha Balamu, ogho arongo Balaki ashi ateghe shiraha ngava lyatemo vaIsraeli mposhi ngava lye ndya dakudjambera kuva Karunga vavimpempa kumwe nakushondera. ¹⁵ Ntani nka, ove kwakara navamwe ovo vakwaterero kumarongo ghava Nikolate, ogho nanyenga name. ¹⁶ Kushighure, mposhi! Ntjene kapi ghuna kukushighura, Ame nganuya kukoye wangu-wangu, makura nganuyakurwite narufuro rwamukanwa kande. ¹⁷ Oghu akaro namatwi, ayuvhe ovi yina kutanta mpepo kumbunga Kriste. Kwa kehe ghuno ana fundo, nganukamurenka ngakalye mana oyo yahoramo, ntani nka ame nganuka mupa liwe lyalikenu olyo vatjanga lidina lyalipe olyo vapira kuyiva vantu nkwandi ndjegho vana lipa tupu pentjendi.''' ¹⁸ '' Tjangera muEngeli wambunga yaTiyatira ashi: ' Dino ndo nkango daMona Karunga, ogho ana kuyukumo mantjo yira makara ghamundiro, ano mpadi dendi kuna fana yira shikugho shangoporo vana putju kuna kuvembera: ¹⁹ '' Ame nayiva virughana vyoye: shihoro shoye nalipuro lyoye na Ukareli ghoye ntani nalididimiko lyoye. Ame nayiva ashi virughana vyoye vyakuhulilira vyapitakana vyakuhova. ²⁰ Ano ngoli ovino mbyo na shana nuvyuke kukoye: vya kukengerera ghuno mukadi Jesebela, ogho akutwenyango mwene ashi muPorofete. Marongo ghendi kuna kupitakana vantu vande vashondere kumwe na kulya ndya na nyama oyo vadjambera kuva Karunga vavipemba. ²¹ Ame kwa mupa shirugho akushighure, ashuve rushonda rwendi ano ngoli ghuye kapi ana shana kukushighura. ²² Kenga! Ame nganu murangeka pa Uro na ma uvera kumwe tupu nava ashonderanga navo nganu vayuvita kukora unene, nkene kapi vana kukushighura vatunde kuviruwana vyavo. ²³ Vana vendi nganu vadipagha po navantje ngavapwepo, mposhi ngava yivirepo va mbunga Kriste na vantje ashi ame kukona-kona mudi mutjima davantu kumwe na maghayaro ghavo. Ame nganu futa kehe ghuno kutwara muviruwana vyendi. ²⁴ Kukwenu namuntje anwe mwatungo mu Tiyatira, anwe mwapirango kukwama ghano marongo ntani kapi mwayiva vihorama vyavinene vya Satana yira momu vavitwenyanga-ame kuna kumutantera ashi, 'Ame kapi nganu muwederera ko ma udito nagho peke.' ²⁵ Mpo ngoli ashi, kwatererenu kulipuro oli muna kara nalyo weno dogoro nganu yatike. ²⁶ Kehe ghuno ana kufundo ntani ghuye ngaruwane viruwana vyande dogoro kughuhura, ghuye nganu mupa nkondo ngapangere dimuhoko.' ²⁷ Yira momu vatapa kukwande nkondo vavava naye mo ngoli ngapangera na mburo ya shikuwo, kumwe na kuva toghona vatavauke yira vyuma vya lirova. ²⁸ Yira momu vatapa vavava nkondo nadintje kukwande, name nganutapa mbungururu ya kutema ngura-ngura yayinene kwa kehe ghuno ngafundo. ²⁹ Kehe ghuno akaro na matwi, ayuvhe ovino yina kutanta mpepo ku mbunga Kriste.