¹ Ukonentu kwa dika mundi wa mwene; mbyo wa shintjamo ngundi ntano na ntatu odo vadika na mawe. ² Ukonentu kwa dipaya shimuna awapayike nyama, mbyo aku wapayikira vinyu yendi, ntani mbyo ayara shitafura awa payike shipito. ³ Ghuye kwatuma vakareli vendi va vakadona; vayende kundundu yayire unene ya mushitata vakayiyire ashi, ⁴ "Kehe uno mugova? Aye kuno aya ngene mo!" Kwa kehe uno apiro ukonentu aghamba ashi, ⁵ "Yenu, muyalye ndya, ntani muyanwe na vinyu oyino na wapayiki. ⁶ Shuvenu ghudona mposhi ngamuparuke; yendenu mukwame mu ndjira ya uhungami. ⁷ Kehe uno waku pukurura varunde kuwana lishwaghu lya mwene, ntani kehe uno wa ku harukira vadiniKarunga kuwana matuka. ⁸ Kapishi kutapa maghano kuvantu va ghurunde, ngava kunyenga; tapa maghano kuvantu va ukonentu, vavo ngava kuhora unene. ⁹ Ronga vantu va ukonentu, ngava wederere ukonentu wavo; ronga vahungami, mposhi ngaghu wederere marongo ghavo. ¹⁰ Kutjira Hompa ngo ukonentu wa kuhoverera, ntani kuyiva upongoki ghuna ndunge wa unenepo. ¹¹ Ame wakuvhura kuvhukita mayuva ghoye, ntani naku wederera mwaka da liparu lyoye. ¹² Nkene ashi ove wa kara na ndunge, odo ndunge dana ghumoye, ntani nkeneshi ove wakara na urunde, ogho ghoye wa na umoye." ¹³ Ugova kwa fana yira mukodi wa kuteya matwi; wa kupira kuyiva vintu ntani ghuye kwato ntjoni. ¹⁴ Ghuye kwa shungira palivero lya ndjugho yendi, pashipundi shendi shakaro pa ndundu yayire unene ya mushitata. ¹⁵ Ghuye kuna kuyiyira ayite ovo vana kupito vayende mundjira, yavo ya kuvyukilira. ¹⁶ "Kehe uno akaro na ugova aye aya ngene muno," kwavo vapiro maghano ava tantere ashi. ¹⁷ "Mema ghaku vaka mawa unene, ntani mboroto ya widi ya kulya mukahore-hore kutovara unene." ¹⁸ Ano ngoli uno murume kapi ayiva ashi navantje ovo angeneka uno mukadi mumundi wendi vapwa kufa, navantje mpovali kuntji-ntji ya mushirongo shava fe.