¹ Ukonentu kuna kughamba na liywi lyalinene? Ntani ndunge nado kuna kughamba na kudameka unene? ² Ukonentu kuna yimana pawiru ya ndundu pepi nandjira, pamagwanekero ghandjira, kuna yimana ndjikiti. ³ Kuna yimana kumeho ya livero lya shitata, ntani na mulivero lya kungenena mushitata, kuna kuyiyira ashi. ⁴ "Nanwe, vantu, nakughamba; kuna kumuyita namuvantje anwe mwakaro mu udjuni. ⁵ Anwe varunde, kurongenu ukonentu; ntani anwe mavaya, karenu nandunge da kukwata lighano. ⁶ Yuvhenu, nkango dande dadiwa unene, navintje ovi nakumutantera vya uhunga. ⁷ Ovi na kughamba vya ushili, ntani ame kapi na ghambanga vimpempa. ⁸ Ame navintje ovi naghambanga vya ushili; kwato vyakupira mulyo ndi vyakupukita. ⁹ Kwavo vakaro mu uhungami navintje vya kena; nkango dande kwahungama kwavo vawano ukonentu. ¹⁰ Wanenu marongo ghande ghakupitakana vimaliva; wanenu ukonentu waku pitakana ngorodo yene-yene yakahuroko. ¹¹ Ukonentu wa pitakana makwarara ghandiro unene; kwato kehe shino wa hora shakushetakana kumwe name. ¹² Ame, ame ukonentu, ame kwa kara na maghano, ame kwa kara na ndunge da uhunga. ¹³ Kufumadeka Hompa nko kunyenga udona. Ame kwa nyenga vaku kunenepita ntani nava vaku kutumba, na ndjira dadidona, na nkango da vimpempa. Ame navinyenga. ¹⁴ Ame Kwakara namaghano ghamawa gha ukonentu; ame kwa kara na ndunge; ame kwa kara na nkondo. ¹⁵ Ame na tapango maghano ku vaHompa vapangere mu uhunga, ntani va pangeli va ruwane na veta mu uhunga. ¹⁶ VaHompa nava ndje ame navapango veta, na mfumwa, vapangere mu uhunga. ¹⁷ Ame kwa hora navantje ovo vakaro na shihoro name, ntani kehe ghuna wa ku ntjana, ana hepa kungwana. ¹⁸ Ame kutapa ungagho na mfumwa, ntani kutapa limona na upongoki wa kukarererapo. ¹⁹ Ushwi wa kutunda kukwande wa pitakana ngorodo, wa pitakana ngorodo yene-yene; ntani wapitakana pitakana vimaliva. ²⁰ Ame kuyenda mu ndjira ya uhungami, na kukwama ndjira ya uhunga. ²¹ Makura, ovo vakaro nashihoro name ngava kawana upingwa wa limona lyalinene; nganu tapa limona lyaliyingi kukwavo. ²² Ame wa kuhova nakaliro na Karunga pa kutanga, kuviruwana vyendi, navintje vya kutamekera. ²³ Ame ahovire kuturapo - nukare wa kuhova, kukara namonyo wagho udjuni shimpe pandere. ²⁴ Ame kwa ntjampuruka - nukare wakuhova kumeho ya kuturapo lifuta, na dimukuro da kupupa mema. ²⁵ Ame vahovire kushampuruka nukare wakuhoverera dado ndundu dadinene na ndundughona, shimpe panderepo. ²⁶ Karunga ame ahovire kuturapo nukare wakuhoverera, kumeho yaku shita livhu na wiya kumeho ature mbundu yikare mu udjini. ²⁷ Ame mpo nakalire opo atulire liwiru likareko, ntani napo atulire dimutunda dakuntji ya lifuta dikareko. ²⁸ Ame mpo nakalire opo vatulire maremo ghakareko kuliwiru ntani na po vatulire mema ghamuluta ghakare ghana yima ndjikiti. ²⁹ Mpo nakalire opo vatulire dimutunda da lifuta opo ngaghaya shayera mema ghamulifuta, mposhi kapishi ngagha pitakane dimutunda, da ku gaunune mema na livhu lya likukutu. ³⁰ Ame kwa kalire kunyonga yendi, nukare mutungi wa ukonentu kumwe na mutapi maghano; ghuye kwa kalire naruhafo rwa kehe liyuva rwakutunda kukwande, ame kwa kalire na ruhafo rwa runene kumeho yendi. ³¹ Ame kwa kalire na ruhafo rwa runene kulishito lyendi, ntani ame kwa kalire na ruhafo kumwe na vana vendi. ³² Anwe, vadinkantu, tererenu kukwande, ruwanenu vino na kumutantera ngamu kare na lirago. ³³ Tererenu ku marongo ghande nga muwane ukonentu; kapishi nga mu ushuve. ³⁴ Kehe uno wa kuterera kukwande nga kara na lirago. Ghuye ngaya ngakara kehe liyuva palivero lya mundi wande, ngataterere palivero lya ndjiugho yande. ³⁵ Kehe ghuno wa kuya kukwande aya ngwane, kuwana monyo, ntani Hompa ngakara nashihoro kukwendi. ³⁶ Kehe ghuno wa kupira kuya kukwande kapi nga ngwana, mwene ana kudjonauro liparu lyendi; kehe uno anyengo me kwahora mfa."