¹ Walye mwaku pandayikiranga vyaku mayuva gha kumeho gha yona, mukonda shi kapi ghuna yiva ashi vinke vivhuro kushoroka mukuyenda mughure wa liyuva lya namuntji. ² Nakadidishi kuku pandayika naghumoye, renka vantu vapeke va ntunda virongo vakupandayike; hasha tupu nkene shi ovo wapira kuyiva va kupandayike. ³ Ove wayiva udito wamukumo waliwe na udito wa ntjako ya musheke ghuremu unene - ano ngoli udito ogho ayitangapo muntu wa mugova wapita kana pa ghuno naghuntje. ⁴ Ugara wa vantu va vakenya wapitakana mema gha ugara gha nkondo unene, ano ngoli ugara wa muntu wa lifupa wa pita kana paghuno ntani kwato wa kuvhura kughu kandanapo. ⁵ Kuharukira muntu kumeho ya vantu hasha tupu kupita kana omo ukara nashihoro shamuka hore-hore. ⁶ Muholi ghoye nkene akupa shito sha ghurema hasha tupu, ano ngoli nkene muna nkore woye aku kambeke lighoko lyendi pashipepe shoye mukengurure nawa. ⁷ Muntu wa kulya ana kuta nampili kumupa ushi wa ghutovali kapi nga ghulya, ano ngoli muntu nkene yina mukwata ndjara, nampili ndya da ururu kutovara unene. ⁸ Muntu wa kushuva mundi wendi ayende kumavhango gha ku ghure kwa fana yira shidira sha kupira shitunguru kwato uturo. ⁹ Maghadi gha rupekwa na vitutumukita vya lidumba lya liwa kuha fita monyo, ntani muna hepa ku pandura vaholi vavawa va kumupa maghano gha uhunga. ¹⁰ Walye mwa vhuramanga va ghunyenu ndi vaholi va vasho, ntani nkene ghuna kuwana udito kapishi kuyenda ghukashane mbatero kuva kuruvoye ovo vakaro ghure nove. Vantu vamaparambo ghoye kuvhura vakukwafe kupita kana vakuruvoye ovo vakaro ghure nove. ¹¹ Monande wa mumati, kara na ukonentu, mposhi monyo wande ngaghukare naruhafo; ntani nka ame nganu vhure kulimburura vantu vamakanyi. ¹² Vantu va ghukonentu kudimburura wangu nkene maghudito kuna kuya makura vavo vavande, ano ngoli vantu vakupira ndunge vavo kukutwa muma udito kuruku ntani vana kakuvera. ¹³ Muna virongo nkene kuna ku ghupa makongo muna hepa kukwata lirwakani lyendi likare kukwenu, ntani muna hepa kukwata lirwakani mposhi ngamupire kukombanita vi maliva vya makongo ogho vaghupa ngamu vhure kukupopera ku vakamali varukeshe. ¹⁴ Kehe ghuno wa kurambuka ngura-ngura yayinene aghambe na liywi lya kudameka unene mundjira ashi kuna kushwera ghunyendi lirago, olyo kapishi lirago ogho kuna tapa lifingo! ¹⁵ Mukamali wa kanwa na mutangu navyendi kwa fana yira mata ghamvhura ya kuroka unene liyuva mudima; ¹⁶ ghudito unene kumumwenikida yira momu shaditopa mu ku mwenikida mpepo ya kuyunga unene, ntani yira momu shaditopa muku fungatera maghadi nalighoko limwe tupu. ¹⁷ Vikugho kuvirora navikugho ntani vitwepe unene; mo nka waro, muntu kuronga vantu vaghunyendi vawane ukonentu. ¹⁸ Nkene aghu wapeke na ku pakera mbili shitondo sha ukuyu ove ngaghu lya ko nyango, ntani muntu wa ku pakera mbili muhona wendi ngawana mfumwa kwa muhona wendi. ¹⁹ Muntu nkene akenge mulitope lya mema ku mona shipara sha mwene mumema, mo nka waro muntu mwene ndje ayivo vya munda ya mutjima wendi. ²⁰ Mantjo na mutjima wa muntu kapi vya kutanga ashi vipire kuwederera na kutwikira mu kumona, kwafana yira shirongo shavafe kapi shayuranga shasho kuwederera mo vantu kehe pano ntani mudjonauli kapi ashayekanga mu kudjonaura monyo da vantu, ghuye kutwikira tupu ngoli. ²¹ Ngorodo na Siliveli kwayi hemunanga mulidiko lyamundiro yikare yina kushuka yina wapa yivembere; Muntu nkene ava mupandayiki vantu ntani nganeyeda makunenepito ogho ghakaro munda ya mumutjima wendi. ²² Nampili weni omo ngaghu toghona muntu wamu gova - yira momu vapumanga mahangu parupare - ano ngoli kapi ngaghu vhura kutoghona ghugova ghutundemo mumwendi. ²³ Mushita wamuwa kupakera mbili vimuna vyendi na ku vitakamita kehe liyuva, ²⁴ ntani limona kapishi lya kukarererapo. Nampili maghu hompa ghadimuhoko ngagha ka shayapo? ²⁵ Nkene mushoni waku kukuta ava ghutete va ghupongeke, mushoni waghupe kuvareka kumena ghukure; mushoni waku ndundu kughu pongayika ghukare ndya da ngombe. ²⁶ Ove kuvhura kuwana vyuma vya kudwata kushipapa sha ndjwi doye ntani ove kuvhura kughulita vimpendje vyoye ghuwanemo vimaliva ngaghu ruwaniteko mulifuva lyoye. ²⁷ Ove ngaghu wana mashini ghakulya - mu vimpendje vyoye - ngaghureliteko lipata lyoye na vana voye vavakadona.