¹ Nkene utenda aghu kara ko pakurombo ndi mvhura yiroke pa shirugho shakukesha, mo ngoli vya fana nkene muntu wa mugova awana lipundi lya umpititi pa shirugho sha lipuko mu livhango lya lipuko. ² Mafingo kwato kukuyitira shiponga nkene kwato ovyo wa djona, kwa fana yira vidira vyuku tuka vishane kwa kutembara ngoli kwato uturo. ³ Nkambe nkwandi kuyi shepura ngora ntani yina kuyenda, shidongi kwandi kushitura shitoma mukanwa ntani shidamuna murongerero ntani muntu wa mugova kwandi kumutoghona mumughongo na mburo ntani aruwana kehe shino. ⁴ Washa tapa lilimbururo ku lipuro lya ugova, nove kuvhura ngaghu fane yira ndjeghu ana puro lipuro lya ugova. ⁵ Lipuro lya ugova kuli limburura na lipuro lya ugova, mposhi ogho ana puro lipuro adimburure ashi ghuye nane kwato ndunge, na mpili momu akumona ukonentu. ⁶ Nkene aghu tumu muntu wa mugova atware mbudi ove naghu moye ghuna kundemburo maghuru mbyo una kuyitiri ukorokotji. ⁷ Maghuru ghaghurema na kuvhurashi kuruwana viruwana kehe vino ghagho kundje-ndjerera tupu, kwa fana yira muntu wa mugova ana kughambo vishewe ahana kuyiva ashi vinke vya tanta. ⁸ Kutura liwe likare mungumi nkene kapi una kuponya shidira kwa fana yira kutura muntu wa mugova akare na likuto na mpili weni ngamumu pandayika kwato osho ngaruwana sha uhunga. ⁹ Muntu wa mugova nkene kuna kughamba vishewe kwa fana yira muntu wa unkorwi ana kukuduro rumiya mulighoko lyendi. ¹⁰ Mutapi viruwana nkene akutu muntu wa mugova wakuya mwene kukwendi kuyuvita kukora vantu vavayingi kumutjima ntani ghuye kufana yira ngumba ana royo ditambe kuvantu. ¹¹ Mbwa kuyenda yika lye viruki vyavo shikando sha uviri, kwa fana yira muntu wa mugova wa kuvyukuruka viruwana vyendi vya ugova. ¹² Ghureru kuronga muntu wa mugova. Ano ngoli udito unene kuronga muntu wa kukumona ashi ghuye kwa kara na ndunge unene? ¹³ Muntu wa udwa kwa kara na ghoma ntani ghuye kughamba kehe pano ashi, "Nyime mpwali mushitaura! Nyime mpwali mundjira!" ¹⁴ Muntu wa udwa kukumangerera kehe pano pambete, kwato kuyenda ghure yira momu vatura livero ku ngundi ligharuke na kukughara. ¹⁵ Muntu wa udwa na kuvhurashi kuteta vitima pashisha adamune ature mukanwa kendi alye. ¹⁶ Muntu wa udwa kukumona mwene ukonentu kupitakana vantu vatano-nava viri vama ghano ghamawa. ¹⁷ Kukutura munkango odo dakaro ashi kapi dakuhama kwa fana yira muntu ana kuyendo mundjira makura awane mbwa ya ugara yina rara ayi kwate kumatwi. ¹⁸ Muntu wa kupurumuka wa kuponya ngumba dishore mundiro, ¹⁹ kwa fana yira muntu wa kukonga atjilite vamaparambo ghendi dogoro kunyima ntani ana kughamba ashi, "Kuna dana ghuka tupu?" ²⁰ Vikuni nkene vina veve, mundiro ghuna hepa kudima; oko kwa piro ushoti, kwato dimutangu. ²¹ Makara kuhamweka vikuni vitwere mundiro ntani vikuni kurukumita mundiro utwere unene, Vantu vakanwa kuyita dimutangu. ²² Nkango da ushoti kutovara unene pakudi ghamba; vantu kudi lya unene dogoro va dikute murutu. ²³ Nkango da upyu odo va horeka nawa-nawa, kwa fana yira siliveli yene-yene va horeka mupoto ya lirova lya mukusho wa mbiriha. ²⁴ Muntu wa kukunenepita kuhoreka nyengo yendi munda ya nkango dendi dadiwa. ²⁵ Kuvhura aghambe nkango da uhunga, ano ngoli washa vipura, mukondashi munda ya mutjima wendi kwa yura urunde. ²⁶ Ghuye kuvhura kuhoreka nyengo yamunda ya mumutjima wendi, ano ngoli kehe uno ngavi dimburura ashi ghuye murunde. ²⁷ Vantu vakutima makwina vavene ngava weromo ntani vantu va kuteya vaghu nyavo viraha vavene ngavi kwata. ²⁸ Ove wa nyenga ghunyoye nkene aghu muyuvita kukora kumutjima ntani nkango da vimpempa kuyita lidjonauro.