¹ Weno vyashorokire vavo vantu vapongire vakundurukide Jesus ntani nakutegherera kunkango daKarunga, ashi ghuye kwayimanine kulidiva lya Gennesaret. ² Ghuye amono mawato maviri ogho vashegheka kuntere yalidiva. Vashakangcongco vatundiremo ntani kwakushire makwe ghavo. ³ Jesus arondo muwato ghumwe wavo, ashi waSimoni, ntani nakumupura ghuye aghu vyutire mumema kashinano kakafupi naghurundu. Makura ashungiri kumwe nakushonga vantu vamuwato. ⁴ Apa amanine kughamba, atantere Simon ashi,'' Twara wato kulitondo ntani teya makwe ghukwate.'' ⁵ Simoni alimburura nakughamba ashi,'' Muhona, atwe kuna hugu matiku naghantje, ngoli navimwewshi tuna kwata, ano ngoli ngoli munkango doye, kuni ghateya makwe.'' ⁶ Apa vamanine vino, vavo vapongaghikire shivaro shashinene sha ntjwi, ntani makwe ghavo ghatavaukire. ⁷ Vavo ava pyata kko vaunyavo vakaliro muwato wapeke ashi vaye vaya vavatere. Vavo avaya avayuda mawato naghantje, mpo avarekire kudama. ⁸ Ano ngoli Simoni Petrus, apa avi monine, awere kungoro daJesus, nakughamba,'' Tundako kukwande, ame mukafumu wandjo, Hompa.'' ⁹ Ghuye vyamutetwire, ntani navantje ovo vakaliropo, pakukwata kwa ntjwi odo vaghupire. ¹⁰ Vino vyahamitiliremo Jakob na Johanesi, vana vaZebedee, ovo vakaliro ghuholi naSimoni. Jesus aghamba kwa Simoni,'' Washa kara naghoma, morwa ashi kutunda pano ngaghukwata vantu.'' ¹¹ Apa vayitire mawato ghavo kughurundu, ava shuvu navintje ntani vamukwamine ghuye. ¹² Payire shirugho ghuye opo kwakalire mushitata shimwe, mukafumu ayuro navingondwe mo akalire. Opo amonine Jesus, akugandere kushipara shendi kumwe nakumukanderera, nakughamba ashi,'' Hompa, ntjene shi ghunavi panda, kughundenka nikene.'' ¹³ Makura Jesus agwanikilita lighoko lyendi ntani amukwata ghuye, nakughamba,'' Navipanda. Kena.'' Pashirugho ntjosho vingondwe avi mutundu. ¹⁴ Ghuye amu rondora asha tantera kehe ghuno ano ngoli amu tantelire,'' Yenda nandjira yoye, ntani nakukaku negheda naumoye kwa muPristeli ntani kadjambe mukukena koye, kutwara omo amurawira Mosesi, umbangi kukwavo.'' ¹⁵ Ano ngoli vitundwamo vyakuhamena avi kuhanene kughure, mbunga yayinene yavantu ayiya kumwe nakuyategherera kumashongo na kuyava verura kumauvera ghavo. ¹⁶ Ano ngoli atundupo nakuyenda mumavango ghamburundu akaraperere. ¹⁷ Payire liyuva limwe ghuye kwashongire, Pakalire vaFalisayi navarongi vaveta panya ovo vatundiliro kukehe mukunda waGalileya naJudeya ntani naJerusalema. Nkondo daHompa papendi dakalire mukuvaverura. ¹⁸ Vakafumu avaya vanashimbire mukafumu washirema shamundambo, vavo ava shana ndjira mukumuyita munda nakuya murangeka kuuto waJesus. ¹⁹ Kapi vawanine ndjira yakumuyita munda mukonda yambunga, makuran ava rondo pawiru yandjugho kumwe nakumusheghumuna mukafumu kupitira palimpe, ghuye paghuro wendi, mukatji kavantu, kuvyukilira kumeho yaJesus. ²⁰ Mukumona lipuliro lyavo, makura Jesus aghamba ashi,''Mukafumu, ndjo doye vanadikughupirepo.'' ²¹ Varongi matjangwa navaFalisayi ava vareke kukupura mapuro ghano, nakughamba ashi,'' Are ghuno anaku ghambo vya kushwaghura? Are wakuvhura kughupirapo ndjo ano ngoli nkwandi Karunga pantjendi?'' ²² Ano ngoli Jesus, apa anongwinine ovyo vaghayalire, alimburura nakughamba kukwavo ashi,'' Vinke muna kukupulira vino mudimushima denu? ²³ Ovyo vina karo ghureru kughamba, ndjo denu vanadimudongwenenepo' ndi kughamba' shapuka nakuyenda'? ²⁴ Ano ngoli ovyo mbyo muna hepa kuyiva ashi Mona Muntu akara naghuna nkondo pano palivhu mukughupirapo vantu ndjo davo,''_ ghuye aghamba kumukafumu washirema_'' Ame kuna kukutantera, shapuka, damuna ghuro woye kumwe nakuyenda kumundi woye.'' ²⁵ shirugho ntjosho ashapuka kuuto wavo nakudamuna ghuro ogho aralire. Makura ayendi kumundi wendi, kuyererepeka Karunga. ²⁶ Kehe ghuno kwatetukire ntani vayererepekire Karunga. Vayulire naghutjirwe, kughamba ashi,'' Tuna mono vininke vyavinene namuntji.'' ²⁷ Kunyima yavishorokwa vino, Jesus atundupo akayende amono mufutiti wamutero walidina Levi ghuye ana shungiri kutende yava futiti mutero. Ghuye aghamba kukwendi,'' Nkwame.'' ²⁸ Makura Levi ashapuka nakumukwama ghuye, ashuvu navintje kunyima. ²⁹ Makura Levi arughana shipito shashinene mumundi shaJesus. Vafutiti mutero vayingi vakaliropo ntani navamwe ovo vakukundurukidiro kuntishe nakulya kumwe navo. ³⁰ Ano ngoli vaFalisayi naValirongi matjangwa vavo ava tapa runyeghenyo kuvavarongwa vendi, nakughamba ashi,'' Vinke muna kulyera naVafutiti mutero navanandjo?'' ³¹ Jesus ava limburura,'' Vantu vavawalika kapi vahepa mupangi; vaveli tupu pantjavo. ³² Ame kapi nayera mukuya kugha vahungami, nani ngoli navana ndjo vakushighure.'' ³³ Ava ghamba kukwendi,'' Varongwa vaJohanesi kavadiliranga nakuraperera, ntani Varongwa vaVafalisayi kava rughananga vyakukufana. Ano ngoli Varongwa voye kulya nakunwa.'' ³⁴ Jesus aghamba kukwavo,'' Kuvhura kehe ghuno kurughana likwareko vantu mukudilira mukwali ano ghuye mukwali naye vana kara? ³⁵ Ano ngoli liyuva ngaliya apa mukwali ngava mughupako kukwavo, makura mumayuva ogho ngava dilira.'' ³⁶ Makura Jesus aghamba nka shifanikito kukwavo.'' Naumweshi ruha rwashikeshe shashipe kulirwakani nakushirughanita mukuvandeka kulirwakani lyalikurukuru. Ntjeneshi ghuye arughana ovyo, ghuye ngataura lirwakani lyalipe, ntani ruha rwashikeshe shakulirwakani lyalipe kapi ngashigwaneka kulikeshe lya lirwakani lyakukurupa. ³⁷ Naumweshi wakutura vhinyu yayipe mushuma sha vhinyu shashikurukuru. Ntjene avi rughana ovyo, vhinyu yayipe ngayitaghura shuma, ntani vhinyu ngayitekamo ntani shuma ngashidjonauka. ³⁸ Ano ngoli vhinyu yayipe yina hepa kuyitura mushuma shashipe. ³⁹ Naumweshi pakumana kunwa vhinyu yayikurukuru ashane yayipe, ghuye kughamba ashi, ' Yayikurukuru hashako.'''