Ekondua oritjamirongo vivari na mbari
1
Nu omujengeri ue ndji urikirire o ndondu jo meja uo muinjo, o uerauera tjimuna o Kristal. Ama i piti oku za mo tjihavero tjo uhona tja Mukuru no tjo Ndjona.
2
pokati ko zondjira zo tjihuro. Nu ko vikere vio ndondu avi jevari pari o muti uo muinjo, mbu ja u hapa o vihape pekepeke o murongo na vivari, o mueze no mueze. O vijao vio muti mbui viari o vio ku verukisa o viuana.
3
Nu kape tjina ama pe uhuara ama pe kara o sengiro.Nunguari o tjihavero tjo uhona tja Mukuru no tjo Ndjona mavi kara mu tjo, nu o vakarere Ve mave karere Je.
4
Nu ovo mave munu o murungu Ue, nu ena Re ma ri kara mo vipara viao.
5
Nu kaku na ku kara o utuku ingo, nu kavena hepero je rambe poo jo ndjerera jejuva, orondu muhona Mukuru ma jerere muvo. Nu mave honapara aruhe nga aruhe.
6
Nu omujengeri ua tja nai ku ami, ''O mambo inga o matakame nu o uatjiri. Nu Muhona Mukuru uo zombepo zo vaprofete, ua hindire o mujengeri Ue oku raisa ku imba o vakarere Ve o vina mbi mavi tjitua mo ruveze o rusupi.
7
''Tara! Ami meja tjimanga! Omuningandu ingui ngu ma takamisa o mambo uo tjiprofeto tje Mbo ndi.''
8
Nu ami, Johanesa, ouami ngumba zuva nu emunu o vina mbi. Nu tjimbe vi zuva nevi munu, mba uira pehi oku rikotamena po zombaze zo mujengeri ngu je ndji raisire o vina mbi.
9
Eje opa tjera nai ku ami, ''Otjiti nao! Orondu ami o uami o mukarere o mukuenu, pueena o vakuenu imba o vaprofete, na imba mbe takamisa o mambo Uembo ndi.Rikotamena ku Mukuru!''
10
Nu eje ua tja nai ku ami, ''O rombo o mambo uo tjiprofeto Tjembo ndi, orondu o ruveze ruri popezu.
11
Ingui o muhasemba nga karere mo uhasemba ue. Nu ingui o mutundake nga karere mo ndundakero ue. Nu ingui ngu ri o musemba nga karere mo usemba ue. Nu ingui ngu ri o mujapuke, nga karere mo ujapuke ue.
12
Nu tara!, Ami me ja tjimanga.Nu o tjisuta tjandje tji ri pueena Ami, oku suta ko mundu auhe otja ko ngaro jo vitjitua vie.
13
O Uami o Alfa no Omega, o mutenga no museinina, ombutiro no ndjandero.
14
O vaningandu imba mbe koha ozombanda zao, kutja ve kare no usemba uo kuria ko muti uo muinjo no ku hita o tjihuro mo mivero.
15
Nunguari pendje kuna o zombua, no zondjai, no vakorondu, no vazepe, no vakarere vo visenginina, na ingui auhe ngua suvera noku kora o vizeze.
16
Ami, Jesu, mba hinda o mujengeri Uandje oku hongonona o vina mbi kuene mo zokereka. O Uami o muze no ndekurona ja David, o Njose ongenangene jo muhuka.''
17
Nu o Mbepo no Mukupua ve tja, ''Indjo!'' Nu auhe ngu ma zuu nga tje, ''Indjo!'' Nu auhe ngua tonjota, nge je, nu auhe ngu ma vanga nga tore o meja uo muinjo o tjari.
18
Orondu me hongonona ko mundu auhe ngu ma zuu o mambo uo tjiprofeto tjembo ndi:Nu o mundu auhe ngu ma ueza ko vina mbi, Mukuru ma ueza kuje o viuonga mbia tjangua membo ndi.
19
Nu auhe ngu ma isako ko mambo uo tjiprofeto tjembo ndi, Mukuru ma isamo o rupa rue komuti uo muinjo na mo tjihuro o tjijapuke, na mo vina imbi mbia tjangua membo ndi.***
20
Nu ingui ngu ma hongonona o vina mbi ma tja, 'Ii! Ami me ja tjimanga.'' Amen! Indjo Muhona Jesu!
21
O tjari tja Muhona uetu Jesu Kristu nga tji kare pueena ene amuhe. Amen.