1
Nu Jesu tja kotoka mu Kaperanauma, kombunda jo majuva omatiti, ombuze jo kutja uri monganda ja handjauka.
2
Nu tjimanga pa uongarere ovandu ovengi, nga tji pehari noruveze, na pomuvero poruauo,nu Eje ua zuvarisa embo kuvo.
3
Nu pe ere ovarumendu vane ava tjindi omuremane oku mujeta ku Je.
4
Nu tji ve he pe urire oku ja posi Je mena rouingi uovandu, arire tji va isako omututu uondjiuo mbu uari kombanda ja Jesu, nu tji vaza noku topora ondovi, arire tjiva herurire po otjimata mu mua rarere ingui omurumendu omuremane.
5
Moku muna ongamburiro jao, Jesu uatjere ko murumendu omuremane,''Muatje, ove ua jesirua omauvi uoje.''
6
Nunguari pari vemue vo vatjange mba haamene mbo nu ovo ve ripurire momitima viao,
7
Onguae omurumendu ingui tji ma hungire nai? Ma hungire ozondjambu ku Mukuru? Ouani ngu jenena oku jesira omauvi pendje na Mukuru erike?
8
Nu tjimanga Jesu tja muna mombepo Je kutja mave ripura nao mo mitima viao. Ua tja nai kuvo, ''Onguae tji mamu ripura ovina mbi momitima vienu?
9
Nambano opapupu o o pene, oku raera omurumendu omuremane kutja, 'Ove ua jesirua omauvi uoje,' poo okutja, 'Sekama, toora otjimata tjoje nu u kaende?”
10
Nunguari kutja mu tjiue kutja Omuna uo mundu unouvara oku jesira omauvi kombanda jehi, ''Eje ua tjere nai ku ingo muremane,
11
''Ami me ku raere, sekama, toora otjimata tjoje, nu u jende kondjiuo joje.”
12
Nu eje ua sekama mo hakahana, a toora otjimata, nu a piti mo ndjiuo po murungu uao, nu avehe va himinue tjinene nu ave hivirike Mukuru, amave tja, ''Katuna pu tua muine otjina tjo saneno indji.''
13
Nu eje ua kaenda rukuao kene romuronga, nu ombunga jovandu aihe aija ku Je, nu Eje eve hongo.
14
Nu Eje tji ma kapita imbo, a munu Levi omuna ua Alfeusa, a a haama pehi po masutisiro uo tjimamariva tjouhona mehi, nu atja nai kuje, ''Ndji kongorera.'' Nu eje arire tja sekama nu emu kongorere.
15
Jesu a a ri eriro mondjiuo ja Levi, peno ovasutise vo vimariva vio uhona mehi no vanauvi ovengi veja a veje oku haama okuria puena je no vahongeua ve, orondu ovo vari ovengi nu ve mu kongorerere.
16
Nu ovatjange nOvafarisei tji ve mu muna ama ri puena ova sutise vo vimariva viouhona mehi novanauvi, vatja nai ko vahongeua ve, “Onguae tji mari puena ovasutise vo vimariva vio uhona mehi no varunde?”
17
Nu Jesu tja zuva tji, eje uatja nai kuvo, “Ovandu mberi naua morutu kave hepa onganga, nunguari i hepiua i imba mba vera. Ami hi jere okuisana ovasemba nunguari mbe jera okuisana ovanauvi ko meriverero nondanaukiro jo ku poka kouvi.
18
Nu ovahongeua va Johanesa na imba vOvafarisei a ave ritjaere kovikuria.Ovandu tjiva veja nave tja nai ku Je, ''Onguae ovahongeua va Johanesa na imba ovOvafarisei tjive ritjaera kovikuria nu imba ovoJe tjive heri tjaere kovikuria?''
19
Nu Jesu uatja nai kuvo, ''Tjii ovanatje mberi mo mukandi mave jenene okuritjaera ovikuria ngunda omukupe aeri puena vo? Ingui omukupe ngunda a eri puena vo ovo ka vena okujenena oku ritjaera ko vikuria.
20
Nunguari omajuva ma eja ingui omukupe tji mee ku toorua muvo, nu otji mavee ku ritjaera kovikuria mo majuva ingo.
21
Kapena mundu ngu rapa erapi epe momutuaro omukuru. Orondu e rapi indi epe marije ku njondorora omutuaro imbui o mukuru, nu omataukiro uapo majee ku rira omavi katjiri.
22
Kapena omundu ngu ma pakere omavinu omape mo zondjatu zo mikova uo mavinu ozonguru. Orondu omavinu omape maje pamuna inda ozondjatu zo mikova, nu omavinu ajetika, nozondjatu a ze zundaka.
Nunguari omavinu omape je tuua mo zondjatu zo mikova uo mavinu ozombe.
23
Nu mejuva ro Sapata Jesu ua kaendere mokati ko vikunino vio vikokotua, nu ovahongeua ve otji va jaruka oku pora ozondjatu zo vikokotua ngunda ama ve kaenda.
24
Nu Ovafarisei va tja nai ku Je, ''tara, onguae tji ma ve tjiti otjina tjitja zerikua oku tjitua mesapata.?''
25
Neje uatja nai kuvo, ''Ene kamuja resa itji Davida tja tjitire, tjari nouhepe, indi tja tiro ndjara pamue na imba mbari puena vo?
26
Kutja ua hita vi mo ndjiuo ja Mukuru mo majuva ua Abiatha omupristeri omunene, tja karia omboroto jo maraisiro, ndja zerikua kovandu avehe, pendje novapristeri uriri, nu rukuao a jandja jo ku imba mbari puenae?''
27
Nu Jesu uatja nai kuvo, ''Esapata ra ungurirua omundu nu omundu ka unguririrue Esapata.
28
Nu Omuna uo mundu otjinga aeri omuhona uesapata uina.''