1
Nu Jesu tja kumukire okuza ingo, ueja ke kondua v ra Judeja aeri hembandina ja Jordana. Nu otjimbumba tjovandu tja uoronganena pu Je rukuao. Nu otja kongaro je ja hapo Eje Ueve honga rukuao.
2
Nu Ovafarisei veja ku Je okuje ku mu rora, nu ave mu pura kutja, “Tjii kuri naua otja koveta omundu oku jesa omukazendu ue?”
3
Nu Ue ve zira nu atja nai kuvo, ''Mose ua pangurire kutja muaso ku tjitavi?
4
Nu ovo vatja, ''Mose ua jandjere ousemba komurumendu uoku tjanga ombapira jokuhanika nokumuesa.''
5
Nu Jesu ua zirire nu atja nai kuvo, ''Jari mena ro mitima vienu omikukutu opa tjangerere etuako ndi.
6
Nunguari okuza kombutiro joviutua Mukuru Ue ve utire omurumendu nomukazendu.''
7
Mezeva indi omurumendu opu mazu oku jesa ihe na ina nu a kakatere komukazendu ue,
8
Nu vevari imba mave rire onjama imue.
9
Okutja itji tjitja kutua kumue i Mukuru ape ningi omundu ngu metji hana.''
10
Nu tji vari mondjiuo ovahongeua Ve ve ke Mu pura rukuao komunda uo tjina tji.
11
Nu Eje uatja nai kuvo, ''Auhe nguma jesa omukazendu ue nu a kupu omukaendu omukuao, ma katukire omukazendu ue orukupo.
12
Nu omukazendu tja jesa omurumendu ue nu a kupua ijo omurumendu uarue, ma katuka orukupo.''
13
Nu ovo va jetere ounatje outiti ku Je kutja a jambeke omake ku uo. Nu ovahongeua Ve ve kandaizire imba mbe ve jeta.
14
Nunguari Jesu tja muna otjina tji, ua njengua nu A tja nai kuvo, ''Ueseje ounatje uje ku Ami, nu amu u tjaere, orondu ouhona ua Mukuru oua imba mberi otjauo.
15
Tjiri metja nai ku ene, Auhe ngu hina ku jakura ouhona ua Mukuru otjo kanatje okatiti, eje kanaa hiti mu uo katjiri.
16
Kuzambo Eje ua toora ounatje e u putaka mo maoko ue, nu Eu sere ondaja ame ujambeke omake.
17
Nu Eje tja utire ojenda Ue, omurumendu umue ua jendere ama utuka, a uoro ozongoro pomurungu Ue nu e Mu pura kutja, ''Muhonge Omuua, ami hi tjitevi kutja mbi kare nomuinjo uaaruhe?
18
Nu Jesu ua tjere kuje, ''Onguae tjimo ndji isana omuua. Kapena umue omuua pendje na Umue, ingui o Mukuru Erike.
19
Ove u tjiua omatuako: Kona ku zepako, kona ku katuka ko orukupo, kona ku vaka ko, kona ku hatoira ko omahongononeno uovizeze, kona ku tjita ko ovineja, jozika iho na njoko.'''
20
Nu eje ua zira na tja nai ku Je, ''Muhonge, ovina imbi avihe mbevi takamisa okuza kouzandona uandje.
21
Nu Jesu ua tara muje nu E mu suvere, nu Atja nai kuje, ''Mo kaere otjina tjimue uriri.Karandise ovina avihe mbi u navio nu u jandje kovasiona indino ove mo kara novihuze mejuru.Nukuzambo uje u toore otjikoroise nu undji kongorere.''
22
Eje ua hihamua tja zuva omambo inga nu a kaenda noruhoze momuinjo, orondu eje ua tumbire tjinene.
23
Nu Jesu ua jevajeva nu atja nai kovahongeua Ve, ''Opo pazeu tjinene ku imba mbenorutumbo oruingi oku hita mouhona ua Mukuru!''
24
Nu ovahongeua va himisiua ijomambo Ue. Nunguari Jesu ua zira rukuao nu atja nai kuvo rukuao, ''Vanatje, opo pazeu oku hita mouhona ua Mukuru!
25
Opapupu pongamero oku tuurunga Mondovi jonane oku kapita omutumbe oku hita mouhona ua Mukuru.''
26
Nu ovo va temua tjinene oku kapita, nu avetja nai mokati kavo oveni, Nunguari ouani ngu ma jenene oku jamua?
27
Nu Jesu ua zikire omeho Ue muvo nu atja nai, Itji kovandu kanaa tjiurika, nu kaperi nao ku Mukuru; Orondu ovina avihe viurika ku Mukuru.
28
Nu Petrusa ua uta okutja nai ku Je, Tara ete tua jesa ovina avihe nu tua kongorera Ove.
29
Nu Jesu ua zira nu atja,''Tjiri Metja nai kuene, Kapena mundu umue ngua jesa ondjiuo, poo omarumbi, poo ovamuangu poo ovatena, poo ina, poo ihe, poo ovanatje, poo ovikunino mena Randje no Mbuze ombua,
30
Ngu hina ku jakura nai moruveze indui: potusere ozondjiuo, nomarumbi, novamuangu, novatena, nooina, novanatje, novikunino, puena ozombamisiro, nu mouje imbui mbuma uja omuinjo uaaruhe.
31
Nu ovengi mberi ovatenga mave karira ovaseinina; nu ovaseinina mave karira ovatenga.''
32
Nu ovo vari mondjira ama vei ko Jerusalem, Nu Jesu Ueve hongorerere. Nu ovo va himinue nu ave Mu kongorere ava uruma. Nu Jesu ua toora imba omurongo navevari posio, nu A utu oku ve raera ovina mbia sere oku ka tjitua ku Je.
33
Tareje, ma tu i ko Jerusalem, Nu Omuna uomundu ma ka jandjeua kovapristeri ovanene, na kovatjange. Nu ovo mave ke Mu pangurira ondiro nu a ve Mu jandja kovozonganda.
34
Nu ovo mave ke Mu njekerera, nu ave Mu tjekere omate, nu ave Mu renge ozongora, nu a ve Mu zepa. Nu mejuva oritjatatu Eje ma penduka.''
35
Nu Jakobasa na Jojanesa ovanatje va Zebedeas, ve ja ku Je, navetja,'' Muhonge,Matu ningire kutja utu tjitire atjihe tji matu kuningire.
36
Nu Eje uatjere nai kuvo,''Mamu zeri kutja Mbi mu tjitire tjike?''
37
Nu ovo vatjere nai ku Je, ''Tupa kutja tuka haame puena ove moujere uoje, umue kokunene kuoJe umue kokumoho kuoJe.''
38
Nunguari Jesu ue vezira nai, ''Kamuna ku tjiua kutja mamu ningire tjike. Mamu jenene okunua ekopi ndi menu poo amu papitisiua nombapitisimo ndji me papitisiua najo?''
39
Nu ovo vatja nai ku Je, ''Matu jenene.'' Nu Jesu uatjere kuvo, ''Ekopi ndi menu ne ma munu ke kop. Nu mamu papitisiua nombapitisimo ndji me papitisiua mo.
40
Nunguari oku haama kokunene Kuandje poo kokumoho Kuandje ka kuandje oku jandja, nunguari otua imba mbe tu tuninua.
41
Nunguari imba omurongo tji va zuva itji ovo va pindikira oo Jakobasa na Johanesa.
42
Nu Jesu Ueve isanena kuJe nu atja nai kuvo, ''Mamu tjiua kutja imba mbe varua ozombara zoviuana kutja ve honapara kombanda jao, nu ovanene vauo ve raisa ouvara uao muvo.
43
Nunguari kapena ku kara nao mokati kenu. nunguari auhe nguma zeri oku rira omunene mokati kenu ngarire omukarere uenu,
44
Nu auhe uenu nguma zeri okurira omutenga, ngarire omukarere ua avehe.
45
Orondu Omuna uomundu kejerereere oku ungurua, nunguai Ue jere oku rira omukarere, noku jandja omuinjo Ue otjo tjisuta okujeta ondjamo kovengi.''
46
Nu veja ku Jeriko. Neje tjaa zire mu Jeriko puno ovahongeua Ve no tjimbumba tjo vandu, omuna ua Timausa, Bartimausa, omupotu omuningire, ua haamene pondjira.
47
Nu tja zuva kutja o Jesu uo Munasareta, ua uta okuura natja, ''Jesu, Muna ua Daavita, kara notjari naami!''
48
Ovengi va kandaiza omurumendu omupotu, amave muraere kutja nga muine. Nu nguari ua ravaera tjinene, ''Muna ua Daavita, kara notjari naami!''
49
Nu Jesu ua kurama nu a raere kutja nga isaneue. Nu uovo va isana ingui omurumendu omupotu, ave tja nai, ''Vandipara! sekama! Eje ma isana ove.''
50
Nu eje ua imbirahi posio ondjasa je, nu a zukuka, nu eja ku Jesu.
51
Nu Jesu uemu zira nu atja, ''Mo vanga kutja mbiku tjitire je?'' Nu omurumendu omupotu ua tjere, ''Muhonge, mevanga kutja mbi mune.
52
Nu Jesu ua tjere kuje, ''Kaende.Ongamburiro joje jeku verukisa.'' Nu motjimanga eje ua aruka okumuna, nu a kongorere Eje mo ndjira.