1
Nu pa kara nai mesabata oritjavari okuza ku indi etenga kutja, kutja Eje ua pitirira mokati kovikunino viovikokotua. Nu Ovahongeua Ve va va pora ozondjatu zovikokotua, ave ze pukumuna momake nave ri.
2
Nu tjiva vOvafarisei vatja kuvo, Onguae tjima mu tjiti itji tji tja zerikua oku tjitua momasabata?
3
Nu Jesu mezirira uatja kuvo, Ene kamuja resa itji, kutja David ua tjitire vi tja tire ijondjara, na imba mbari puena e?
4
Kutja eje ua hita vi mondjiuo ja Muhona, tjaka toora nu a ri omboroto jomaraisiro, nu a jandja tjiva ku imba mbari puena e, indji ndja zerikua oku riua ijovandu avehe pendje novapristeri uriri?
5
Nu Eje uatja kuvo, Omuna uOmundu omuhona uesabata uina.
6
Nu pa kara nai rukuao mesabata ekuao, kutja, Eje ua hitire mosinagoge nu a hongo, nu pari nomurumendu umue ngua uonjene eke rokunene.
7
Nu ovatjange nOvafarisei ve Mu tarerere, kutja tjii ma verukisisa mesabata, kutja ve sore oku mu vara omunandjo.
8
Nunguari Eje ua tjivirue ouripura uao, nu atja nai komurumendu ingui ngua uonjene eke, Sekama u kurame pokati. Nu eje ua sekama nu a kurama.
9
Nu Jesu uatja kuvo, Me mu pura otjina tjimue; Okonuua momajuva uesabata oku ungura ouua poo ouvi, oku jama omuinjo poo oku u njona?
10
Nu Eje ua riangisire omeho Ue muvo avehe, na rire tja tja komurumendu, Uonjonona eke roje> Nu eje ua tjita nao. Nu eke re ari jaruruako rukuao tjimuna inde kuao.
11
Nu ovo ve urisirue oviuoze, nu ave hungire kumue kutja nga ve tjitevi ku Jesu.
12
Nu pa kara nai momajuva ingo, kutja Eje ua pitire nu ai kondundu oku ka kumba, nu Eje u aka kara mongumbiro ku Mukuru outuku auhe.
13
Nu tji pa tji, Eje ua isanena ovahongeua Ve ku Je; nu A toorora muvo omurongo navevari mba isana ovaapostele:
14
Simon, Eje ngua ruka Petrusa, na Andreas omuangu ue, Jamesa na Johanesa, Filipus na Bartolomeus,
15
Mateus na Tomas, Jamesa omuna ua Alfeus, na Simon nguja isaneua Zealotes,
16
Na Judas ua Jamesa, na Judas Iskariot rukuao ngua ka rira omumuhorore.
17
Nu Eje ua herukire puena vo nu arire tja kurama morutjandja, mokati kotjimbumba tjovahongeua ve notjimbumba otjinene tjovandu, tji tja zire mehi arihe ra Judea na Jerusalem, nokomikuro vio mironga via Tiran a Sidon, mbe ere oku Mu zuva, noku verukisiua komitjise viao;
18
Na imba mbari mondatumisire jozombepo ozohakohoke, no ovo va verukisiua.
19
Nu otjimbmba atjihe tjovandu tja pahere oku tuna ku Je, orondu omasa ija jezu mu Je nu a je verukisa avehe.
20
Nu Eje ua jerera omeho Ue kombanda jovahongeua ve, nu Atja, Ouene ovaningandu ene vasiona, orondu ouhona ua Mukuru ouenu.
21
Ouene ovaningandu mbu mu nondjara mu nai, orondu mamu urisiua. Ouene ovaningandu mbu murira nai, orondu mamu je ku jora.
22
Ouene ovaningandu ovandu tji mave munjengua, nu ave mu kondo koruuano ruao, nu ave mu jamburura nu ave mu nakere pendje otjovarunde, men arena rOmuna uOmundu.
23
Jorokeje mejuva indo, nu tukee ovindondoora vio ndjoroka. Orondu tareje, otjisuta tjenu otjinene mejuru. Orondu ooihe jao va tjitire ovina otjingevio kovaprofete.
24
Nunguari ouee, ku ene mbu mua tumba! Orondu ene mua jakura orusuvo ruenu.
25
Ouee kuene mbu mue kuta nai! Orondu mamu je ku tondjara. Ouee kuene mbu mu jora nai! Orondu mamu je ku kara noruhoze nu a mu riri.
26
Ouee kuene ovandu avehe tjima ve tanga ene! Orondu ooihe jao otjiva tjitire kovaprofete mbe hei ovouatjiri.
27
Nunguari metja nai kuene mbu mua puratene, Suvereje ovanavita na ene, tjitee ouua ku imba mbe mu njengua,
28
Sreje ondaja ku imba mbe mu senga, nu kumbireje imba mbe mu tumba navi.
29
Ku ingui ngue ku vete orupiu korutama rumue, jandja induo orukuao. Nu ku ingui ngua toora ondjasa joje, o panda nombaikiha.
30
Jandja ku ingui auhe ngu ma ningire ku ove, nu o paha ovina vioje ku ingui ngue vi toora.
31
Nu imba pu mamu zeri kutja ovandu ve tjite kuene, tjiteje nao uina kuvo.
32
Orondu ene tji mua suvere imba mbe mu suvera, mamu kotokerua i tjike? Orondu ovarunde uina va suvera imba mbe ve suvera.
33
Nu tji mamu tjiti ouua ku imba mbe tjita ouua kuene mamu kotokerua itjike? Orondu ovarunde ovo uina tjive tjita nao.
34
Nu tji mamu jazema ku imba mbu mu nomaundjiro uo ku jakura kuvo mamu kotokerua itjike? Orondu ovarunde uina ve jazema kovarunde, kutja ve jakure otjingevio.
35
Nunguari ene suvereje ovanavita na ene, tjitee ouua, jazemeje amu hina maundjiro uotjisuta. Nu otjisuta tjenu matji rire otjinene, nu mamu je ku isaneua ovanatje vOmukombandambanda. Orondu Eje tjena otjari ku imba mbe hatja okuhepa novarunde.
36
Opu muaso ku kara notjari orondu Iho uina tje notjari.
37
Amu pangura nu ene kamuna ku pangurua. Amu pe ondjo nu ene kamuna ku peua ondjo. Jesiree nu ene mamu jesirua.
38
Jandjeje nu matji jandjeua kuene, otjisasanekero tjo ndengu ombua, atja tumbirua pehi, tji tja hakihiua, tji matji tikatika, mave jandja mekoro ruoje. Orondu tji mamu sasanekerua nondengu jotjisasanekero itji tji mamu sasaneke natjo.
39
Nu Jesu ua serekarera otjisasanekero kuvo, Tjii omupotu ma jenene oku nana omupotu omukuao are? Kavena kuka uira motjitoto avejevari.
40
Omuhongeua keri kombanda jomuhonge ue, nunguari auhe ngua hongua ma kara otjomuhonge ue.
41
Nu onguae tjimo tara kokarupambaro kukeri meho romukuenu, nunguari o ha munu ombande ndjiri meho roje omuini?
42
Poo mo jenene vi oku heja omukuenu, Mukuetu, jandjera mbi isemo okarupambaro meho roje, ove omuini tji u hina kumuna ombande ndjiri meho roje omuini? Munatjavivi ove, rutenga nakera ombande ndjiri meho roje pendje, nu kuzambo otji mo munu naua oku homona okarupambaro ku ke ri meho romukuenu.
43
Orondu omuti omuua kau jeta otjihape otjivi, nu uina omuti omuvi ka ujeta otjihape otjiua.
44
Orondu omuti auhe u tjiukua notjihape tjauo. Orondu ovandu ka ve nikora omakuju motusu, nu omapunda uomivite kaje ka porua momisaona.
45
Omundu omuua u pitisa pendje ovina oviua okuza mombukiro ombua jovihuze momutima ue; nu omundu omuvi u pitisa pendje ovina ovirunde okuza mobuikiro jourunde momutima ue. Orondu otjinjo tji hungira okuza mu imbi mbia tumbara momutima.
46
Onguae tji mu Ndji isana Muhona, Muhona, nu tjimu ha tjiti imbi mbi hungira.
47
Auhe ngu meja ku Ami, nu a zuu omambo uandje nua tjiti uo, Me mu raisire kutja eje u asana ku tjike;
48
Eje ua sana komurumendu ngua tungire ondjiuo, nu a se oukoto, nu aka zika omazikameno ua jo kombanda joruua, nu omipupo vieja, nu ondondu ai rivanda nomasa mondjiuo indjo, nu ai he i njinganjingisa ko orondu ojo ja zikirue kombanda joruuua.
49
Nunguari ingui ngu ma zuu nu a ha tjiti, u asana komurumendu ngua tungire ondjiuo mehi noku hina mazikameno; ondondu mu je rivandere nomasa, nu ojo ai u motjimanga, nu omazundakero uondjiuo ndji jari omanene.