1
Ovengi mba tuako eke ko ku tjanga osemba ohunga novina mbia tjitua mokati ketu,
2
Otja tji via serekarerue kuete, i imba mbe vi muine komeho, no vahandjaure Vembo,
3
Mba vaza aeri naua kuami uina, tji mbaza noku kondonona ovina avihe naua okuza kombutiro, oku ku tjangera vio naua toja koku kongorerasana kuavio, mutengua omujozikua Theofilas,
4
Kutja ove u tjiue naua outakame uo vina imbi mbi ua hongua.
5
Momajuva ua Herod ombara ja Judea, muari omupristeri uorive, ngu ja isaneua Sakarija, nguja ungurire morupa rua Abia. Nu omukazendu ue uazire movasuko va Aaron nena re uari Elisabet.
6
Nu pouvari uao vari ovasemba pomurungu ua Mukuru, nu ava takamisa omatuako no zoveta za Mukuru azehe.
7
Nu ovo kavari no muatje orondu Elisabet uari o ngandji. Nu ovo avejevari vari ave kurupa tjinene.
8
Nu pa kara nai kutja, eje ngunda ama ungura otjiungungura tjoupristeri otja korupa rue pomurungu ua Muhona,
9
Komuhingo uongaro joupristeri, otjiungura tjo ku njosa ovinuke oviua mondemberi ja Muhona tja uira kuje mena rozohonga.
10
Nu otjimbumba atjihe tjovandu tjari pendje ama tjikumbu oruveze ruomatuimisiro uovinuke.
11
Nu pamunikire kuje omuengeri a a kuramene kokunene kuotjiningiririsiro tjovinuke.
12
Nu Zakarias the mu muna ua kurunga nu omburuma aja muje,…(gnv)
13
Nunguari omuengeri uatja nai ku Je, O tira ko, Sakaria, orondu ongumbiro jo je ja zuvirua, nu Elisabet mukazendu uoje me ku pandukire omuatje omuzandu, nu ove moje ku mu ruka Johanesa.
14
Nu ove mo kara nendjoroka nenjando, nu ovengi maveje ku njandera onguatero je.
15
Orondu eje ma rire omunene pomurungu ua Muhona, nu kena ku nuako omavinu uo muvite poo omanuua omazeu. Nu eje meje ku urisiua Nombepo Ondjapuke okuza mezumo raina.
16
Nu eje meje ku tanaurira ovanatje ovengi va Israel ku Muhona Mukuru uao.
17
Nu eje meje ku kaenda komurungu Ue mombepo na momasa ua Erija, oku tanaurira omitima viooihe kovanatje, novahazuva kounongo uovasemba, oku tuna ovandu kutja ve rongerere Muhona.
18
Nu Sakaria uatja nai Komuengeri, Itji ami meje ku tji tjiua vi? Ami tji mbiri omurumendu omukururume no mukazendu uandje tja uorongotisiua ijomajuva omengi.
19
Nu mezirira omuengeri uatja nai kuje, Ouami Gabriel, ngu mbi kurama pomurungu ua Mukuru. Nu mba hindua kove oku ku hepurira ombuze ombua indji.
20
Nu tara, mo seti eraka, kona ku jenena oku hungira, nga ke juva ovina mbi ndi mavi tjitua, orondu ove ko kamburire komambo uandje ouo nguma jee ku jenenisiua moruveze ruauo.
21
Nu ovandu vaundjire Sakaria nu ave himisiua ijokutja ua uombisiua itjike pupetambo mondemberi.
22
Nu eje tja pitire pendje ke peurireko oku hungira kuena vo, nuovo va muna kutja okutja u aka kara nombunikisiro mondemberi.Nu eje ua ugnurire ovisanekero kuvo nokuhina kuhungira.
23
Nu pa kara nai kutja, omajuva ue uoku ungura otjiungura tjoupristeri tji ja manuka, eje ua jaruka kondjiuo je.
24
Kombunda jomajuva ngo, omukazendu ue Elisabet otja rira otjingundi nu a tara oure uomieze vitano. Amatja,
25
Muhona Ua tjiti nai kuami momajuva inga,orondu omeho Ue tji jari kombanda jandje, oku isako ohoni jandje mokati kovandu.
26
Nu momueze outja hamboumue omuengeri Gabriel ua hindua okuza ku Mukuru kotjihuro tja Galilea, tjitji isaneua Nasaret,
27
Komusukona ngu hija rara puena ovarumendu, ngua varekerue ijomurumendu uena ra Josef, ue tundu ra David. Nu ena ra ingui omusukona ngu hija rara puena omurumendu ingui rari Maria.
28
Nu omuengeri ueere kuje natja, Minikua ove nguua mbimbirua notjari otjinene. Muhona uri puena ove. Ove ua serua ondaja mokati kovakazendu.
29
Nu eje the mu muna arire tja zungua ijo mambo ue momuijno, nu e ripura kutja indji ombinika jomungemuano.
30
Nu omuengeri uatja kuje, Otira Maria, orondu Muhona tja tjariparera ove.
31
Nu tara! Ove mokutu oungundi motjikuatero tjoje, nu o panduka omuatje omuzandu, nu ena re mo mu ruku JESU.
32
Nu Eje marire omunene na isaneua Omuna Uomukombandambanda. Nu Muhona Mukuru ma jandja ku Je otjihavero tjouhona tja ihe David.
33
Nu meje ku kara nouvara kombanda jondjiuo ja Jakova ngaaruhe, nu ouhonapare ue kanaa u janda ko.
34
Nu Maria otja tja komuengeri, Mape kara vi nai, ami tjimbi ha tjiua omurumendu.
35
Nu ouengeri ua zira natja kuje, Ombepo Ondjapuke mai ja kombanda joje, nomasa Uomukombandambanda aje kovere ove. Ingui Omujapuke ngu meje ku kuatua ijove opu meje ku isanenua Omuna ua Mukuru.
36
Nu tara, omuramuee, Elisabet, eje uina ua kuta oungundi moukurundu ue, nu imbui omueze outja hamboumue ku ingui ngua isanenue kutja ongandji.
37
Orondu ku Mukuru kapena tjimue tji tji haurika.
38
Nu Maria uatja, Tara, ouami omukarere ua Muhona. Nga ku tjitue kuami otja kembo roje. Nu omuengeri ua zirepo puje.
39
Nu momajuva ingo Maria, ua ire kehi rozondundu, kotjihuro tja Juda, mohakahana
40
Nu eje ua hitire mondjiuo ja Sakaria na minike Elisabet.
41
Nu pa kara nai kutja, Elisabet tja zuva ombinika ja Maria, okanatje ka tuka motjikuatero tje, nu Elisabet arire the urisiua Nombepo Ondjapuke.
42
Nu eje ua hungira neraka enene natja, Ove ua serua ondaja mokati kovakazendu, nu otjihape tjo tjikuatero tjoje tja serua ondaja.
43
Nu itji the ndji zire pi, kutja ina Jomuhona uandje uaso ku ja kuami.
44
Orondu, Tara, eraka rombinika joje tji rautu oku zuvaka komatui uandje, okanatje ka tukisiua ijondjoroka motjikuatero.
45
Nu uaserua ondaja ingui ngua kambura orondu ovina imbi mbia raerua I Muhona mavi jenenisiua.
46
Maria uatja, omuinjo uandje maupe ondjozikiro ko Muhona,
47
Nombepo jandje ja joroka mu Mukuru omujame uandje.
48
Orondu Eje tja muna oruveze oru hina ndengu ruo mukarere ue, nu tara okuza ku nai ozondekurona azehe mazeje kundji isana omunandaja.
49
Orondu Eje ingui Omunamasa uendji tjitire ovina ovinene, nu Ena Re Ejapuke.
50
Nu otjari The tjiri kombanda jaimba mbe nondira ku Je, okuza kondekurona nga kondekurona.
51
Eje ua tjita oviomasa nokuuoko Kue, Eje uapiza imba mbe ritongamisa mouripura uomitima viao.
52
Eje ua hakurura ovanamasa kovihavero viouvara, nu A tongamisa ovehinandengu.
53
Eje Ue kutisa ovanandjara novena oviua, nu imba ovatumbe Ue ve ramba nokuhina tjina.
54
Eje ua vatera omukarere Ue Israel, mo ku zemburuka otjari Tje,
55
Otja Tja hungirire kootate, ku Abraham nakondui je ngaaruhe.
56
Nu Maria ua kara puena je ngeri omieze vitatu, nu a jaruka kondjiuo je omuini.
57
Noruveze rua jenenisiua ruokutja Elisabet a panduke. Neje ua panduka omuatje
omuzandu.
58
Novararanganda ve nozamumue ve tjva zuva omuano Muhona mbua raisa otjari Tje otjinene ku je, ovo va karere nondjoroka puenae.
59
Nu pa kara nai kutja mejuva oritja hambondatu ovo veja oku sukarisa okanatje, novo v eke ruka Sakarija, amave ke rukire mu ihe.
60
Nunguari ina ua zira natja, kako, nunguari eje ma rukua Johanesa.
61
Novo vatja ku je, Kapena umue uo muhoko uoje ngu isaneua nena ndi
62
Novo va ungura ovisasanekero ku ihe oku mu pura kutja ma vanga kutja omuaje a rukue une.
63
Neje ua ningirire otjitjangero, nu atjanga, amatja, Ena re o Johanesa. Novo va himua avehe.
64
Nu tjimanga otjinjo tje arire tji tja patururua nereka re ari kuturua. Neje a hungire na tanga Mukuru.
65
Nondira ja raukira kombanda jaimba mba turire ongondoroka navo. Novina mbi via serekarerue mehi arihe ra Judea rozondundu.
66
Navehe mba zuvire ovina imbi, va puikire vio momitima viao, amavetja , Ingui marire omukemuatje? Orondu Eke ra Muhona rari puenaje.
67
Nu ihe Sakarija ue urisirue Ijombepo Ondjapuke, nu a profeta amatja,
68
Nga jozikue Muhona Mukuru ua Israel, orondu tja varura na kutura ovandu ve.
69
Nu nguetu jerururire onja jondjamo mondjiuo jomukarere Ue David,
70
Otja indi tja hungirire novinjo viovaprofete ve ovajapuke, mba karere ko okuza kombutiro jouje,
71
Kutja matu jamua kovanavita naete, no keke raimba mbe tu tonda
72
Oku jenenisa omakuizikiro uotjari nga tjitire kootate, noku zemburuka omerikutiro pamuee Ue omajapuke,
73
Norujano ndua janene ku tate Abraham
74
Kutja eje meje ku tjita kutja ete tu kuturue kutja tu sore oku mu ungurira nokuhina oma,
75
Moujapuke nousemba pomurungu Ue, omajuva ajehe uohupo jetu.
76
Nove, mutje, moje ku isaneua omuprofete ua Ingui Uokombandambanda; orondu ove moje ku kaenda pomurungu ua Muhona oku tuna ozondjira Ze.
77
Oku jandja ondjiviro jondjamo kovandu Ve nondjesiro jomauvi uao.
78
Mena rounjanutima uotjari tja Mukuru uetu, ouo mbua raukira kombanda jetu otjomapitiro uejuva okuza kombanda
79
oku jandja ondjerera ku imba mba haama mondorera na momuzororema uondiro, noku tumburira ozombaze zetu kondjira jotjari.
80
Nomuatje ue kurire na kara nomasa mombepo, nu uari mokuti ongaango nga kejuva nda raisiua ko Isiraera.