¹ Nu ejuva ro ropentekoste tji reja, ovo avehe vari mondunge imue moruveze rumue. ² Nu tjimanga pe ja ombosiro tjimuna omasingiro uo tjivepo tjo masa, okuza mejuru, no tjo tje ura mo ndjiuo mu va haamene. ³ No maraka, otja o uo muriro, ja munika kuvo, nouo ja hanenue nu aje kakara pehi kombanda ja auhe uao. ⁴ Novo avehe ve urisirue i jo Mbepo o Ndjapuke, nu va utire o kuhungira no maraka uarue, otja o Mbepo o Ndjapuke Pe ve pere oku njamukura. ⁵ Nu pa karere o Vajuuta mbu avekara mo Jerusalema, o Varumendu o vatakame mu Mukuru, mba zire mo viuana avihe kehi je juru. ⁶ Nunguari o mbosiro ndji tji ja zuvaka, nu otjimbumba tja uongara nave ivaiva orondu auhe uavo ueve zuvire amave hungire meraka re omuini. ⁷ Novo avehe va himinue nave temua; nave tja, ''Tareje, Imba mbu mave hungire imba ka va Galilea? ⁸ Nu onguae tji ma tu ve zuu, auhe ama hungire neraka retu ronguatero? ⁹ O Vapasiena, no Vamete, no Vaelama, novature va Misopotamia, no va Juteja, no va Kapatosia, no va Pondusa, na Asia, ¹⁰ Piringia, na Pamfilia, na Engipte, no tukondua tua Libia mongondoroka ja Sirene, no vandu vozonganda va Roma, o Vajuuta, no vozonganda mbe rikuamba ko ngamburiro jo Vajuuta, ¹¹ , no va Kerete, no Vaarapa, ma tu ve zuu amave hungire mo maraka uetu oveni ovitjitua ovihimise via Mukuru.'' ¹² Novo va himinue avehe nave ivaiva; amave purasana kutja, ''Itji matji heje tjike? ¹³ Nu tjiva va njekerere nu va tjere,''Ovarumendu imba ve ura omavinu omape.'' ¹⁴ Nunguari Petrusa ua sekamene puena imba omurongo na umue, na jere eraka re na tja kuvo, ''Ene varumendu va Judea na imba amuhe mbu mua tura mo Jerusalema, itji ngatji tjiukue ku ene; nu purateneje ko mambo uandje. ¹⁵ Orondu o vandu mba kave purukire otja tji mamu ripura, orondu ngunda oiri oitjatatu je juva. ¹⁶ Nunguari itji otji tja hungirirue I jo Muprofete Joel: ¹⁷ 'Nu mapeje ku kara nai mo majuva uo maandero,'' Mukuru matja nai, ''Ami Me je ku tirira o Mbepo Jandje kombanda jo njama aihe. Nu ovanatje venu ovazandu no vakazona maveje ku profeta, no varumendu omitanda venu maveje ku muna ozo mbunikiro, no varumendu ovanene maveje ku rota oturoto. ¹⁸ Nu tjiri mo vakarere Vandje ovarumendu no vakaendu mo majuva ngo Me tirire mo o Mbepo Jandje, nave profeta. ¹⁹ Me raisa ovihimise mejuru kombanda, novikaneno kehi kombanda jehi, o mbindu, no muriro, no matuimisiro uo muise. ²⁰ Ejuva marije ku tanaurirua ko ndorera, no mueze aurie ombindu ko murungu ue Juva ndina, inde nene ra Muhona ari heeja. ²¹ Nu mape kara nai kutja auhe nguma isana ena ra Muhona, ma jamua.'' ²² Ene varumendu va Israel, zuveje omambo inga: Jesu ua Nasareta o Murumendu ngua tjiukisiua i Mukuru mokati kenu no viungura vio masa, no vihimise no vikaneno, Imbi Mukuru mbia tjitire mu Je mokati kenu, otja ene oveni uina tji mamu tjiua. ²³ Nu omurumendu ingui ngua jandjerue mo uripura mbua zikamisiua komeho; no ndjiviro jo komurungu ja Mukuru,nu ene, O ngu mua toora nomake uo varumendu omarunde, a mu Mu papere kotjikoroise na mu Mu zepa. ²⁴ Nunguari Mukuru Ue Mu pendura, Tje Mu kutura komihihamo vio ndiro, orondu kape urikire kutja eje a pandekue i jo. ²⁵ Orondu David ua hungirire nai ohunga na Je, ''Ami mba muine Muhona komeho aeri pomurungu uandje aruhe, orondu eje uri keke randje indo ro kunene kutja e ha njinganjingisiua. ²⁶ No mutima Uandje ua jorokere nu eraka Randje arire tjire ura ondjoroka. Nu rukuao, onjama Jandje otji mai suva mo maundjiro. ²⁷ Orondu Ove kona ku jesa omuinjo Uandje motjovakoke, poo oku jandjera Omujapuke Uoje oku muna omauorero. ²⁸ Ove ua raisa kuami o zondjira zo hupo; Ove Mo Ndji urisa no ndjoroka, no murungu Uoje.' ²⁹ Varumendu o vakuatuapamue, okusemba kutja mbi hungire kuena ene noukutuke ohunga na tate mukururume Daavita, kutja eje ua ta na pakua nu ombongo je iri puena ete nga ku ndino. ³⁰ Nunguari eje tjari omuprofete nu tja tjivirue kutja Mukuru Ue mu janenene no rujano, kutja mo tjihape tjimue tjo rukuato rue, otja ko njama, me e oku havera o tjihavero tje tjo uhona. ³¹ Eje tja muine imbi komeho mbi via sere okukara ko nu ua hungirire ohunga na Kristu, kutja omuinjo ue kau naku jesiua motjovakoke, nu uina onjama Je ka i naku muna omaorero. ³² Nu ingui Jesu -Mukuru uemu pendura, nu ete atuhe tji turi ozohatoi. ³³ Nu ambano, Eje otja tja jererua ko kuoko okunene kua Mukuru na jakura mu ingui Tate, inga oma kuizikiro uo Mbepo Ondjapuke, Eje otja tirira itji tji mamu munu noku zuva. ³⁴ Orondu Daavita ka rondere komajuru, nunguari eje ma tja, ''Muhona ua tja ko Muhona uandje, ''Haama ko kunene ko kuoko Kuandje, ³⁵ nga tji Mba ungura ovanavita na Ove itjihavero tjo zombaze zo je.''' ³⁶ Nambano Otjiuana tja Israel atjihe otji tja so uku tjiua tjiri kutja Mukuru Uemu ungura avihe Omuhona na Kristu, ingui Jesu ngu mua papera ko tjikoroise.'' ³⁷ Nambano ovo tjiva zuva itji, arire tjiva tauka omitima, nave tja ku Petrusa, na imba ovaapostelo avehe, Varumendu ovakuetu, ngatu tjitevi?'' ³⁸ Nu Petrusa otja tja kuvo,'' Riverereje kondanaukiro nu mu papitisiue, auhe uenu, mena ra Jesu Kristu ko ndjesiro jo mauvi uenu, nu mamu jakura otjijandjeua tjo Mbepo o Ndjapuke. ³⁹ Orondu o makuizikiro tji jeri ouenu no vanatje venu na ku avehe mberi kokure, ovengi avehe Muhona Mukuru uetu mbu Ma isana.'' ⁴⁰ No mambo omakuao o mengi eje ua hatoira ongahukiro na zeuparisa, amatja, ''Rijameje oveni mondekurona ndja jepa ndji.'' ⁴¹ Nu va jakura embo re nu ave papitisiua, nu vaueziua kejuva ndo ominjo omajovi jetatu. ⁴² Novo va karere no utakame mo mahongero napo mauaneno uovaApostolo , na mo matejero uo mboroto, na mozongumbiro. ⁴³ Nu ondira jeja kombanda jo muinjo auhe, novihimise no vikaneno ovingi via ungurirue i jo Vaapostelo. ⁴⁴ Nu imba avehe mba itaverere va ri pamue nave uaneke ovina viao avihe mumue. ⁴⁵ Novo va randisa omaturiro uao no vina viao, nave vi hananasana avehe, otja kouhepe uo mundu. ⁴⁶ Nu ejuva nejuva ovo va uanenene mo ndemberi no ndunge imue.Nu rukuao amave teja omboroto okuza mo ndjiuo imue oku jenda ko nguao, nave ri o vikuria viao pamue no ndjoroka no mitima mbia kutuka, ⁴⁷ amave tanga Mukuru nave kara no njune mo vandu avehe, nu aruhe Muhona Ua uezire ko mbongo imba mbu jave jamua.